ਮਾਰਸ਼ਲ ਆਰਟ ਕਲਾਸ ‘ਚੋਂ 4 ਸਾਲਾ ਮਾਸੂਮ ਚੁੱਕਿਆ, ਮਾਂ ਨੇ ਪਤੀ ‘ਤੇ ਲਗਾਏ ਅਗਵਾ ਦੇ ਦੋਸ਼
Ludhiana Child Kidnap Case; ਲੁਧਿਆਣਾ ਵਿੱਚ ਇੱਕ 4 ਸਾਲਾ ਬੱਚੇ ਨੂੰ ਕੁਝ ਵਿਅਕਤੀਆਂ ਵੱਲੋਂ ਮਾਰਸ਼ਲ ਆਰਟ ਕਲਾਸ ਵਿੱਚੋਂ ਜ਼ਬਰਦਸਤੀ ਚੁੱਕ ਕੇ ਲਿਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਬੱਚੇ ਦੀ ਮਾਂ ਮੋਨਾਲਿਕਾ ਨੇ ਦੋਸ਼ ਲਗਾਇਆ ਹੈ ਕਿ ਉਸ ਦੇ ਪਤੀ ਅਤੇ ਸਹੁਰੇ ਪਰਿਵਾਰ ਨੇ ਉਸ ਦੇ ਪੁੱਤਰ ਦਾ ਅਗਵਾ ਕੀਤਾ ਹੈ। ਪਤੀ ਨਾਲ ਉਸ ਦਾ ਤਲਾਕ ਦਾ ਕੇਸ ਅਦਾਲਤ ਵਿੱਚ ਚੱਲ ਰਿਹਾ ਹੈ।
ਮੋਨਾਲਿਕਾ ਨੇ ਦੱਸਿਆ ਕਿ ਉਹ ਹਰ ਰੋਜ਼ ਦੀ ਤਰ੍ਹਾਂ ਵੀਰਵਾਰ ਸ਼ਾਮ ਕਰੀਬ 6:15 ਵਜੇ ਆਪਣੇ 4 ਸਾਲਾ ਪੁੱਤਰ ਸੁਵਾਸ ਨੂੰ ਸੁੰਦਰ ਨਗਰ ਸਥਿਤ ‘ਦਿ ਗ੍ਰੇਟ ਇੰਡਿਅਨ ਮਾਰਸ਼ਲ ਆਰਟ ਸਕੂਲ’ ਵਿੱਚ ਟ੍ਰੇਨਿੰਗ ਲਈ ਛੱਡ ਕੇ ਆਈ ਸੀ। ਕੁਝ ਹੀ ਸਮੇਂ ਬਾਅਦ ਉਸ ਨੂੰ ਪਤਾ ਲੱਗਾ ਕਿ ਕੋਈ ਵਿਅਕਤੀ ਬੱਚੇ ਨੂੰ ਕਾਰ ਵਿੱਚ ਬਿਠਾ ਕੇ ਲੈ ਗਿਆ ਹੈ।
ਸੀਸੀਟੀਵੀ ਵਿੱਚ ਕੈਦ ਹੋਈ ਪੂਰੀ ਘਟਨਾ
ਘਟਨਾ ਨੇੜੇ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ। ਫੁਟੇਜ ਵਿੱਚ ਸਿਲਵਰ ਰੰਗ ਦੀ ਬਲੇਨੋ ਕਾਰ ਵਿੱਚੋਂ ਦੋ ਨੌਜਵਾਨ ਉਤਰਦੇ ਦਿਖਾਈ ਦਿੰਦੇ ਹਨ। ਉਹ ਸਿੱਧੇ ਮਾਰਸ਼ਲ ਆਰਟ ਕਲਾਸ ਅੰਦਰ ਜਾਂਦੇ ਹਨ ਅਤੇ ਕੁਝ ਸਕਿੰਟਾਂ ਬਾਅਦ ਮਾਸੂਮ ਸੁਵਾਸ ਨੂੰ ਜ਼ਬਰਦਸਤੀ ਗੋਦ ਵਿੱਚ ਚੁੱਕ ਕੇ ਕਾਰ ਵਿੱਚ ਬਿਠਾ ਕੇ ਫਰਾਰ ਹੋ ਜਾਂਦੇ ਹਨ।
ਜਲਦਬਾਜ਼ੀ ਦੌਰਾਨ ਬੱਚੇ ਦਾ ਸਿਰ ਕਾਰ ਦੇ ਦਰਵਾਜ਼ੇ ਨਾਲ ਵੀ ਟਕਰਾ ਜਾਂਦਾ ਹੈ, ਜਿਸ ਤੋਂ ਬਾਅਦ ਉਹ ਮੌਕੇ ਤੋਂ ਨਿਕਲ ਜਾਂਦੇ ਹਨ।
ਮਾਂ ਨੇ ਸੋਸ਼ਲ ਮੀਡੀਆ ਰਾਹੀਂ ਮੰਗੀ ਮਦਦ
ਪੁੱਤਰ ਦੇ ਲਾਪਤਾ ਹੋਣ ਤੋਂ ਬਾਅਦ ਮੋਨਾਲਿਕਾ ਨੇ ਰੋਂਦਿਆਂ ਸੋਸ਼ਲ ਮੀਡੀਆ ‘ਤੇ ਇੱਕ ਵੀਡੀਓ ਜਾਰੀ ਕਰਕੇ ਪੁਲਿਸ, ਪ੍ਰਸ਼ਾਸਨ, ਮੀਡੀਆ ਅਤੇ ਲੋਕਾਂ ਕੋਲੋਂ ਆਪਣੇ ਬੱਚੇ ਨੂੰ ਸੁਰੱਖਿਅਤ ਵਾਪਸ ਲਿਆਉਣ ਦੀ ਅਪੀਲ ਕੀਤੀ। ਉਸ ਨੇ ਦੱਸਿਆ ਕਿ ਦੋਸ਼ੀ ਇੱਕ ਸਿਲਵਰ ਬਲੇਨੋ ਅਤੇ ਕਾਲੇ ਰੰਗ ਦੀ ਮਹਿੰਦਰਾ ਥਾਰ ਵਿੱਚ ਆਏ ਸਨ।
ਪਤੀ ਦਾ ਪੱਖ ਵੀ ਆਇਆ ਸਾਹਮਣੇ
ਦੂਜੇ ਪਾਸੇ, ਪਤੀ ਕਰਨ ਬਾਵਾ ਨੇ ਅਗਵਾ ਦੇ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਉਸ ਨੇ ਕੋਈ ਕਿਡਨੈਪਿੰਗ ਨਹੀਂ ਕੀਤੀ। ਉਸ ਦਾ ਦਾਅਵਾ ਹੈ ਕਿ ਪਤਨੀ ਦੇ ਪਰਿਵਾਰ ਵੱਲੋਂ ਹੀ ਫ਼ੋਨ ਕਰਕੇ ਬੱਚੇ ਨੂੰ ਨਾਲ ਲੈ ਜਾਣ ਲਈ ਕਿਹਾ ਗਿਆ ਸੀ।
ਤਲਾਕ ਦਾ ਕੇਸ ਚੱਲ ਰਿਹਾ ਹੈ
ਮੋਨਾਲਿਕਾ ਮੁਤਾਬਕ, ਉਸ ਦਾ ਵਿਆਹ 27 ਜੁਲਾਈ 2020 ਨੂੰ ਟਰਾਂਸਪੋਰਟਰ ਕਰਨ ਨਾਲ ਹੋਇਆ ਸੀ। ਵਿਆਹ ਤੋਂ ਕੁਝ ਸਮੇਂ ਬਾਅਦ ਉਸ ਨੂੰ ਪਤੀ ਦੇ ਕਿਸੇ ਹੋਰ ਮਹਿਲਾ ਨਾਲ ਕਥਿਤ ਨਾਜਾਇਜ਼ ਸਬੰਧਾਂ ਬਾਰੇ ਪਤਾ ਲੱਗਾ, ਜਿਸ ਕਾਰਨ ਦੋਵਾਂ ਵਿਚਾਲੇ ਵਿਵਾਦ ਵੱਧ ਗਿਆ।
ਉਸ ਨੇ ਦੱਸਿਆ ਕਿ ਨਵੰਬਰ 2025 ਤੋਂ ਉਹ ਆਪਣੇ ਪੁੱਤਰ ਨਾਲ ਮਾਇਕੇ ਰਹਿ ਰਹੀ ਹੈ ਅਤੇ ਦੋਵਾਂ ਦਾ ਤਲਾਕ ਦਾ ਮਾਮਲਾ ਅਦਾਲਤ ਵਿੱਚ ਵਿਚਾਰ ਅਧੀਨ ਹੈ। ਉਸ ਦਾ ਦੋਸ਼ ਹੈ ਕਿ ਜੇਕਰ ਪਤੀ ਨੂੰ ਬੱਚੇ ਨਾਲ ਮਿਲਣਾ ਸੀ ਤਾਂ ਉਸ ਨੂੰ ਕਾਨੂੰਨੀ ਪ੍ਰਕਿਰਿਆ ਅਪਣਾਉਣੀ ਚਾਹੀਦੀ ਸੀ, ਨਾ ਕਿ ਇਸ ਤਰ੍ਹਾਂ ਜ਼ਬਰਦਸਤੀ ਬੱਚੇ ਨੂੰ ਚੁੱਕ ਕੇ ਲਿਜਾਣਾ।
ਪੁਲਿਸ ਨੇ ਜਾਂਚ ਕੀਤੀ ਸ਼ੁਰੂ
ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਪੁਲਿਸ ਨੇ ਮਾਂ ਦੀ ਸ਼ਿਕਾਇਤ ਦੇ ਆਧਾਰ ‘ਤੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਸੀਸੀਟੀਵੀ ਫੁਟੇਜ ਅਤੇ ਹੋਰ ਸਬੂਤਾਂ ਦੇ ਆਧਾਰ ‘ਤੇ ਮਾਮਲੇ ਦੀ ਹਰ ਪੱਖ ਤੋਂ ਜਾਂਚ ਕਰ ਰਹੀ ਹੈ।
