ਭੋਆ ਹਲਕੇ ਦੇ ਨਵੇਂ ਚੇਅਰਮੈਨਾਂ ਦਾ ਕੈਬਨਿਟ ਮੰਤਰੀ ਲਾਲ ਚੰਦ ਕਟਾਰੂਚੱਕ ਵੱਲੋਂ ਸਨਮਾਨ
AAP chairman appointment; ਵਿਧਾਨ ਸਭਾ ਹਲਕਾ ਭੋਆ ਦੇ ਪਿੰਡ ਕਟਾਰੂਚੱਕ ਵਿਖੇ ਅੱਜ ਇੱਕ ਵਿਸ਼ੇਸ਼ ਸਨਮਾਨ ਸਮਾਰੋਹ ਦਾ ਆਯੋਜਨ ਕੀਤਾ ਗਿਆ, ਜਿਸ ਵਿੱਚ ਪੰਜਾਬ ਦੇ ਕੈਬਨਿਟ ਮੰਤਰੀ ਲਾਲ ਚੰਦ ਕਟਾਰੂਚੱਕ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਇਸ ਮੌਕੇ ਆਮ ਆਦਮੀ ਪਾਰਟੀ ਵੱਲੋਂ ਹਾਲ ਹੀ ਵਿੱਚ ਹਲਕਾ ਭੋਆ ਦੇ ਵੱਖ-ਵੱਖ ਵਿੰਗਾਂ ਅਤੇ ਭਾਈਚਾਰਿਆਂ ਲਈ ਨਿਯੁਕਤ ਕੀਤੇ ਗਏ ਚੇਅਰਮੈਨਾਂ ਨੂੰ ਸਰੋਪੇ ਪਾ ਕੇ ਸਨਮਾਨਿਤ ਕੀਤਾ ਗਿਆ। ਸਨਮਾਨਿਤ ਕੀਤੇ ਗਏ ਚੇਅਰਮੈਨਾਂ ਵਿੱਚ ਸੈਣੀ ਬਿਰਾਦਰੀ ਦੇ ਹੀਰਾ ਲਾਲ, ਰਾਮਗੜੀਆ ਬਿਰਾਦਰੀ ਦੇ ਮਨੋਜ ਮੌਜੀ, ਰਾਜਪੂਤ ਬਿਰਾਦਰੀ ਦੇ ਦਵਿੰਦਰ ਸਿੰਘ, ਕ੍ਰਿਸਚਨ ਭਾਈਚਾਰੇ ਦੇ ਸਤਨਾਮ ਮਸੀਹ, ਮੁਸਲਿਮ ਭਾਈਚਾਰੇ ਦੇ ਮੱਖਣ ਦੀਨ ਅਨੂ ਗੁੱਜਰ, ਪ੍ਰਜਾਪਤੀ ਬਿਰਾਦਰੀ ਦੇ ਸੋਮਰਾਜ ਟੋਨੀ, ਐਸ ਸੀ ਭਾਈਚਾਰੇ ਦੇ ਅਸ਼ਵਨੀ, ਸ਼ਰਮਾ ਬਿਰਾਦਰੀ ਦੇ ਸ਼ੈਲੀ ਸ਼ਰਮਾ, ਬਾਜ਼ੀਗਰ-ਵਾਲਮੀਕੀ ਬਿਰਾਦਰੀ ਦੇ ਹਰਵਿੰਦਰ ਫੌਜੀ ਅਤੇ ਖੇਡ ਵਿੰਗ ਦੇ ਆਰਿਫ ਮੁਹੰਮਦ ਸ਼ਾਮਲ ਸਨ।
ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਕੈਬਨਿਟ ਮੰਤਰੀ ਲਾਲ ਚੰਦ ਕਟਾਰੂਚੱਕ ਨੇ ਕਿਹਾ ਕਿ ਪਾਰਟੀ ਵੱਲੋਂ ਹਲਕਾ ਭੋਆ ਦੇ ਲਈ ਨਿਯੁਕਤ ਕੀਤੇ ਗਏ ਇਹ ਚੇਅਰਮੈਨ ਆਪਣੀ ਮਿਹਨਤ, ਸਮਰਪਣ ਅਤੇ ਲੋਕ ਸੇਵਾ ਦੀ ਭਾਵਨਾ ਸਦਕਾ ਇਸ ਸਨਮਾਨ ਦੇ ਹੱਕਦਾਰ ਬਣੇ ਹਨ। ਉਨ੍ਹਾਂ ਕਿਹਾ ਕਿ ਆਮ ਆਦਮੀ ਪਾਰਟੀ ਆਪਣੇ ਹਰ ਵਰਕਰ ਅਤੇ ਅਹੁਦੇਦਾਰ ਦੇ ਯੋਗਦਾਨ ਦੀ ਕਦਰ ਕਰਦੀ ਹੈ ਅਤੇ ਉਨ੍ਹਾਂ ਨੂੰ ਬਣਦਾ ਮਾਣ-ਸਨਮਾਨ ਦਿੰਦੀ ਹੈ। ਉਨ੍ਹਾਂ ਉਮੀਦ ਪ੍ਰਗਟਾਈ ਕਿ ਨਵੇਂ ਨਿਯੁਕਤ ਚੇਅਰਮੈਨ ਪਿੰਡ-ਪਿੰਡ ਜਾ ਕੇ ਲੋਕਾਂ ਨਾਲ ਜੁੜਨਗੇ, ਸਰਕਾਰ ਦੀਆਂ ਲੋਕ ਭਲਾਈ ਯੋਜਨਾਵਾਂ ਨੂੰ ਘਰ-ਘਰ ਤੱਕ ਪਹੁੰਚਾਉਣਗੇ ਅਤੇ ਆਮ ਆਦਮੀ ਪਾਰਟੀ ਨੂੰ ਹੋਰ ਮਜ਼ਬੂਤ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੇ।
