ਚੰਡੀਗੜ੍ਹ ’ਚ ਗੰਦਗੀ ਫੈਲਾਉਣ ’ਤੇ ਲੱਗੇਗਾ ਭਾਰੀ ਜੁਰਮਾਨਾ, 500 ਤੋਂ 15 ਹਜ਼ਾਰ ਰੁਪਏ ਤੱਕ ਦਾ ਹੋ ਸਕਦਾ ਹੈ ਚਲਾਨ
Fines to be imposed for littering in Chandigarh: ਚੰਡੀਗੜ੍ਹ: ਚੰਡੀਗੜ੍ਹ ਵਿੱਚ ਕੂੜਾ-ਕਰਕਟ ਫੈਲਾਉਣ ਵਾਲਿਆਂ ਖ਼ਿਲਾਫ਼ ਹੁਣ ਸਖ਼ਤੀ ਵਧਾਉਣ ਦੀ ਤਿਆਰੀ ਹੈ। ਨਗਰ ਨਿਗਮ ਵੱਲੋਂ ਸਾਲਿਡ ਵੇਸਟ ਮੈਨੇਜਮੈਂਟ 2026 ਤਹਿਤ ਨਵਾਂ ਪ੍ਰਸਤਾਵ ਤਿਆਰ ਕੀਤਾ ਗਿਆ ਹੈ, ਜਿਸ ਵਿੱਚ ਜੁਰਮਾਨਿਆਂ ਦੇ ਨਾਲ ਘਰਾਂ, ਦੁਕਾਨਾਂ, ਦਫ਼ਤਰਾਂ ਅਤੇ ਹੋਟਲਾਂ ਤੋਂ ਕੂੜਾ ਚੁੱਕਣ ਲਈ ਮਹੀਨਾਵਾਰ ਯੂਜ਼ਰ ਫੀਸ ਵੀ ਨਿਰਧਾਰਤ ਕੀਤੀ ਗਈ ਹੈ।
ਪ੍ਰਸਤਾਵ ਮੁਤਾਬਕ ਜਨਤਕ ਥਾਂ ’ਤੇ ਕੂੜਾ ਸੁੱਟਣ ’ਤੇ 500 ਰੁਪਏ, ਖੁੱਲ੍ਹੇ ਵਿੱਚ ਕੂੜਾ ਸੁੱਟਣ ’ਤੇ 15 ਹਜ਼ਾਰ ਰੁਪਏ ਤੱਕ ਅਤੇ ਜਨਤਕ ਡਸਟਬਿਨ ਵਿੱਚ ਘਰ ਜਾਂ ਦੁਕਾਨ ਦਾ ਕੂੜਾ ਪਾਉਣ ’ਤੇ ਵੀ 15 ਹਜ਼ਾਰ ਰੁਪਏ ਤੱਕ ਦਾ ਚਲਾਨ ਹੋ ਸਕਦਾ ਹੈ। ਖੁੱਲ੍ਹੇ ਵਿੱਚ ਕੂੜਾ ਸਾੜਨ ’ਤੇ 10 ਹਜ਼ਾਰ ਤੋਂ 25 ਹਜ਼ਾਰ ਰੁਪਏ ਤੱਕ ਜੁਰਮਾਨੇ ਦੀ ਵਿਵਸਥਾ ਕੀਤੀ ਗਈ ਹੈ।
ਯੂਜ਼ਰ ਫੀਸ ਅਤੇ ਜੁਰਮਾਨੇ ਦੀਆਂ ਦਰਾਂ ਵਿੱਚ ਹਰ ਸਾਲ 1 ਜਨਵਰੀ ਤੋਂ 5 ਫ਼ੀਸਦੀ ਦਾ ਵਾਧਾ ਕਰਨ ਦੀ ਤਜਵੀਜ਼ ਹੈ। ਇਸ ਤੋਂ ਇਲਾਵਾ ਬਿੱਲ ਜਾਰੀ ਹੋਣ ਦੇ 30 ਦਿਨਾਂ ਅੰਦਰ ਯੂਜ਼ਰ ਫੀਸ ਨਾ ਭਰਨ ’ਤੇ 10 ਫ਼ੀਸਦੀ ਲੇਟ ਪੇਮੈਂਟ ਸਰਚਾਰਜ ਲਾਇਆ ਜਾ ਸਕਦਾ ਹੈ। ਇਹ ਰਕਮ ਪਾਣੀ ਦੇ ਬਿੱਲ ਜਾਂ ਪ੍ਰਾਪਰਟੀ ਟੈਕਸ ਦੇ ਨਾਲ ਵਸੂਲ ਕੀਤੀ ਜਾ ਸਕੇਗੀ। ਇਹ ਏਜੰਡਾ 22 ਸਤੰਬਰ ਨੂੰ ਹੋਣ ਵਾਲੀ ਨਗਰ ਨਿਗਮ ਹਾਊਸ ਦੀ ਮੀਟਿੰਗ ਵਿੱਚ ਪੇਸ਼ ਕੀਤਾ ਜਾਵੇਗਾ।
ਅਗਾਊਂ ਫੀਸ ਜਮ੍ਹਾਂ ਕਰਵਾਉਣ ’ਤੇ ਛੋਟ
ਪ੍ਰਸਤਾਵ ਵਿੱਚ ਯੂਜ਼ਰ ਫੀਸ ਅਗਾਊਂ ਜਮ੍ਹਾਂ ਕਰਵਾਉਣ ਵਾਲਿਆਂ ਲਈ ਵੀ ਛੋਟ ਦੀ ਵਿਵਸਥਾ ਕੀਤੀ ਗਈ ਹੈ। ਇੱਕ ਸਾਲ ਦੀ ਫੀਸ ਪਹਿਲਾਂ ਭਰਨ ’ਤੇ 12 ਮਹੀਨਿਆਂ ਦੀ ਬਜਾਏ 10 ਮਹੀਨਿਆਂ ਦੀ ਫੀਸ ਦੇਣੀ ਪਵੇਗੀ। ਇਸੇ ਤਰ੍ਹਾਂ 6 ਮਹੀਨਿਆਂ ਦੀ ਫੀਸ ਅਗਾਊਂ ਜਮ੍ਹਾਂ ਕਰਵਾਉਣ ’ਤੇ ਸਾਢੇ 5 ਮਹੀਨਿਆਂ ਦੀ ਫੀਸ ਵਸੂਲੀ ਜਾਵੇਗੀ।
ਕੂੜਾ 4 ਸ਼੍ਰੇਣੀਆਂ ਵਿੱਚ ਵੱਖ ਕਰਨਾ ਹੋਵੇਗਾ
ਘਰਾਂ ਤੋਂ ਨਿਕਲਣ ਵਾਲੇ ਕੂੜੇ ਨੂੰ ਚਾਰ ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਵੰਡ ਕੇ ਦੇਣ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਘਰ ਵਿੱਚ ਕੂੜਾ ਵੱਖ-ਵੱਖ ਨਾ ਕਰਨ ’ਤੇ 400 ਰੁਪਏ ਜੁਰਮਾਨਾ ਲਾਇਆ ਜਾ ਸਕਦਾ ਹੈ। ਦੁਕਾਨਦਾਰਾਂ ਅਤੇ ਰੇਹੜੀ-ਫੜ੍ਹੀ ਵਾਲਿਆਂ ਲਈ ਇਹ ਜੁਰਮਾਨਾ 1,000 ਰੁਪਏ ਤੈਅ ਕੀਤਾ ਗਿਆ ਹੈ।
ਘਰ ਦੇ ਆਕਾਰ ਮੁਤਾਬਕ ਮਹੀਨਾਵਾਰ ਫੀਸ
ਮਕਾਨ ਦਾ ਆਕਾਰ ਮਹੀਨਾਵਾਰ ਫੀਸ
2 ਮਰਲੇ (50 ਵਰਗ ਗਜ਼) ਤੱਕ ₹100
2 ਤੋਂ 10 ਮਰਲੇ (250 ਵਰਗ ਗਜ਼) ਤੱਕ ₹200
10 ਮਰਲੇ ਤੋਂ 1 ਕਨਾਲ (500 ਵਰਗ ਗਜ਼) ਤੱਕ ₹400
1 ਤੋਂ 2 ਕਨਾਲ (1000 ਵਰਗ ਗਜ਼) ਤੱਕ ₹500
2 ਕਨਾਲ ਤੋਂ ਵੱਧ ₹700
