ਇਜ਼ਰਾਈਲ ਜਾ ਰਹੀ ਫਲਾਈਟ ਉਡਾ ਰਹੇ ਭਾਰਤੀ ਕੈਪਟਨ ’ਤੇ ਚਾਕੂ ਨਾਲ ਹਮਲਾ, ਬਹਾਦਰੀ ਨਾਲ ਬਚਾਈ 174 ਯਾਤਰੀ ਦੀ ਜਾਨ
Indian captain flying flight to Israel attacked with knife: ਨਵੀਂ ਦਿੱਲੀ: ਦੁਬਈ ਤੋਂ ਤੇਲ ਅਵੀਵ ਜਾ ਰਹੀ ਫਲਾਈਦੁਬਈ ਦੀ ਫਲਾਈਟ ਵਿੱਚ ਬੁੱਧਵਾਰ ਨੂੰ ਕਾਕਪਿਟ ਅੰਦਰ ਪਾਇਲਟਾਂ ਵਿਚਾਲੇ ਹਿੰਸਕ ਝੜਪ ਹੋ ਗਈ। ਰਿਪੋਰਟਾਂ ਮੁਤਾਬਕ ਭਾਰਤੀ ਕੈਪਟਨ ਸਮਿਤ ਮਛਾਰ ਅਤੇ ਓਮਾਨੀ ਸਹਿ-ਪਾਇਲਟ ਵਿਚਾਲੇ ਹੋਈ ਝੜਪ ਦੌਰਾਨ ਚਾਕੂ ਨਾਲ ਹਮਲਾ ਕੀਤਾ ਗਿਆ। ਘਟਨਾ ਤੋਂ ਬਾਅਦ ਜਹਾਜ਼ ਦੀ ਉਚਾਈ ਤੇਜ਼ੀ ਨਾਲ ਘਟੀ ਅਤੇ ਹਾਈਜੈਕ ਦਾ ਐਮਰਜੈਂਸੀ ਅਲਰਟ ਵੀ ਜਾਰੀ ਹੋਇਆ।
ਫਲਾਈਟ ਵਿੱਚ 174 ਯਾਤਰੀ ਸਵਾਰ ਸਨ, ਜਿਨ੍ਹਾਂ ਵਿੱਚ 27 ਬੱਚੇ ਵੀ ਸ਼ਾਮਲ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਜਹਾਜ਼ ਕਰੀਬ 34 ਹਜ਼ਾਰ ਫੁੱਟ ਦੀ ਉਚਾਈ ’ਤੇ ਸੀ, ਜੋ ਕੁਝ ਸਮੇਂ ਵਿੱਚ ਘਟ ਕੇ ਲਗਭਗ 14 ਹਜ਼ਾਰ ਫੁੱਟ ਰਹਿ ਗਈ। ਐਮਰਜੈਂਸੀ ਕੋਡ 7700 ਤੋਂ ਬਾਅਦ 7500 ਪ੍ਰਸਾਰਿਤ ਹੋਣ ਕਾਰਨ ਇਜ਼ਰਾਈਲੀ ਅਧਿਕਾਰੀਆਂ ਨੂੰ ਹਾਈਜੈਕ ਦੀ ਆਸ਼ੰਕਾ ਹੋਈ ਅਤੇ ਲੜਾਕੂ ਜਹਾਜ਼ ਵੀ ਰਵਾਨਾ ਕੀਤੇ ਗਏ।
ਰਿਪੋਰਟਾਂ ਅਨੁਸਾਰ, ਕੈਪਟਨ ਨੇ ਜਹਾਜ਼ ਵਿੱਚ ਮੌਜੂਦ ਯਾਤਰੀਆਂ ਦੀ ਮਦਦ ਨਾਲ ਸਹਿ-ਪਾਇਲਟ ਨੂੰ ਕਾਬੂ ਕੀਤਾ। ਇਸ ਤੋਂ ਬਾਅਦ ਫਲਾਈਟ ਨੂੰ ਸਾਊਦੀ ਅਰਬ ਦੇ ਤਬੂਕ ਏਅਰਪੋਰਟ ਵੱਲ ਮੋੜ ਕੇ ਸੁਰੱਖਿਅਤ ਲੈਂਡ ਕਰਵਾਇਆ ਗਿਆ। ਕਾਕਪਿਟ ਵਿੱਚ ਹੋਏ ਸੰਘਰਸ਼ ਦੌਰਾਨ ਦੋਵੇਂ ਪਾਇਲਟਾਂ ਦੇ ਜ਼ਖ਼ਮੀ ਹੋਣ ਦੀ ਜਾਣਕਾਰੀ ਹੈ। ਜਹਾਜ਼ ਵਿੱਚ ਮੌਜੂਦ ਡਾਕਟਰ ਅਤੇ ਨਰਸ ਨੇ ਜ਼ਖ਼ਮੀ ਵਿਅਕਤੀ ਨੂੰ ਮੁੱਢਲੀ ਸਹਾਇਤਾ ਦਿੱਤੀ।
ਫਲਾਈਦੁਬਈ ਨੇ ਸਾਰੇ ਯਾਤਰੀਆਂ ਦੇ ਸੁਰੱਖਿਅਤ ਹੋਣ ਦੀ ਪੁਸ਼ਟੀ ਕਰਦਿਆਂ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਜ਼ਰਾਈਲੀ ਸੁਰੱਖਿਆ ਏਜੰਸੀਆਂ ਵੱਲੋਂ ਵੀ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਸਹਿ-ਪਾਇਲਟ ਵੱਲੋਂ ਕਥਿਤ ਤੌਰ ’ਤੇ ਜਹਾਜ਼ ਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ ਜਾਂ ਨਹੀਂ, ਇਸ ਸਬੰਧੀ ਜਾਂਚ ਜਾਰੀ ਹੈ।
