ਜੈਸਮੀਨ ਸੈਂਡਲਾਸ ਨੇ ਰੇਨਬੋ ਦੁਪੱਟਾ ਪਹਿਨ ਕੇ LGBTQ+ ਭਾਈਚਾਰੇ ਦੇ ਹੱਕ ’ਚ ਦਿੱਤਾ ਸੁਨੇਹਾ
- ਚੰਡੀਗੜ੍ਹ-ਮੁਹਾਲੀ ਕੰਸਰਟ ਦੌਰਾਨ ਬੋਲੀ ਗਾਇਕਾ—“ਪਿਆਰ ਬੜੀ ਪਵਿੱਤਰ ਚੀਜ਼ ਐ, ਜਿਹਨੂੰ ਮਿਲਦਾ ਉਹਨੂੰ ਪਿਆਰ ਕਰ ਲੈਣ ਦਿਓ”
Jasmine Sandlas message in support of LGBTQ+ community: ਮੁਹਾਲੀ: ਪੰਜਾਬੀ ਗਾਇਕਾ ਜੈਸਮੀਨ ਸੈਂਡਲਾਸ ਨੇ ਮੁਹਾਲੀ ਵਿੱਚ ਹੋਏ ਆਪਣੇ ਲਾਈਵ ਕੰਸਰਟ ਦੌਰਾਨ LGBTQ+ ਭਾਈਚਾਰੇ ਦੇ ਹੱਕਾਂ ਅਤੇ ਸਨਮਾਨ ਦੀ ਹਮਾਇਤ ਕਰਦਿਆਂ ਪਿਆਰ, ਬਰਾਬਰੀ ਅਤੇ ਆਪਣੀ ਪਛਾਣ ਨਾਲ ਜਿਊਣ ਦੀ ਆਜ਼ਾਦੀ ਦਾ ਸੁਨੇਹਾ ਦਿੱਤਾ। ‘ਦਿ ਡਰੀਮ ਗਰਲ ਇੰਡੀਆ ਟੂਰ’ ਤਹਿਤ ਹੋਏ ਇਸ ਸ਼ੋਅ ਵਿੱਚ ਗਾਇਕਾ ਰੇਨਬੋ ਰੰਗਾਂ ਵਾਲਾ ਦੁਪੱਟਾ ਪਹਿਨ ਕੇ ਸਟੇਜ ’ਤੇ ਪਹੁੰਚੀ।
ਆਪਣੇ ਚਰਚਿਤ ਗੀਤਾਂ ਨਾਲ ਦਰਸ਼ਕਾਂ ਨੂੰ ਝੂਮਣ ਲਾਉਣ ਦੇ ਨਾਲ-ਨਾਲ ਜੈਸਮੀਨ ਨੇ ਸਮਾਜ ਵਿੱਚ ਪਿਆਰ ਅਤੇ ਸਵੀਕਾਰਤਾ ਦੀ ਮਹੱਤਤਾ ’ਤੇ ਵੀ ਗੱਲ ਕੀਤੀ। ਉਨ੍ਹਾਂ ਕਿਹਾ ਕਿ ਹਰ ਵਿਅਕਤੀ ਨੂੰ ਆਪਣੀ ਪਸੰਦ ਅਤੇ ਪਛਾਣ ਅਨੁਸਾਰ ਜਿਊਣ ਦਾ ਹੱਕ ਹੈ ਅਤੇ ਕਿਸੇ ਨੂੰ ਇਹ ਦੱਸਣ ਦਾ ਅਧਿਕਾਰ ਨਹੀਂ ਕਿ ਉਹ ਕਿਸ ਨੂੰ ਪਿਆਰ ਕਰੇ।
ਗਾਇਕਾ ਨੇ ਕਿਹਾ, “ਅਸੀਂ ਪੰਜਾਬੀ ਬਹੁਤ ਵੰਡੇ ਹੋਏ ਆਂ… ਪਿਆਰ ਤੇ ਕਰ ਲੈਣ ਦਿਓ। ਅਸੀਂ ਹੁੰਦੇ ਕੌਣ ਆਂ ਕਿਸੇ ਨੂੰ ਕਹਿਣ ਵਾਲੇ ਕਿ ਤੂੰ ਇਹਨੂੰ ਪਿਆਰ ਕਰ ਸਕਦੈਂ, ਤੂੰ ਇਹਨੂੰ ਪਿਆਰ ਨਹੀਂ ਕਰ ਸਕਦੈਂ। ਪਿਆਰ ਬੜੀ ਪਵਿੱਤਰ ਚੀਜ਼ ਐ… ਤੇ ਬਥੇਰਿਆਂ ਨੂੰ ਪਿਆਰ ਨਹੀਂ ਮਿਲਦਾ, ਜਿਹਨੂੰ ਮਿਲਦਾ ਉਹਨੂੰ ਪਿਆਰ ਕਰ ਲੈਣ ਦਿਓ।”
ਉਨ੍ਹਾਂ ਅੱਗੇ ਕਿਹਾ, “ਇਸ ਦੁਨੀਆ ’ਚ ਬਹੁਤ ਲੋਕੀ ਨੇ… ਸਾਰਿਆਂ ਨੂੰ ਜਿਊਣਾ ਵੀ ਨਹੀਂ ਆਉਂਦਾ… ਜਿਹੜਾ ਜਿਊਂਦਾ, ਉਹਨੂੰ ਜੀ ਲੈਣ ਦਿਓ।”
ਜੈਸਮੀਨ ਦੇ ਇਸ ਬਿਆਨ ਨੂੰ ਸਮਾਜਿਕ ਸ਼ਮੂਲੀਅਤ, ਆਪਸੀ ਸਤਿਕਾਰ ਅਤੇ ਭੇਦਭਾਵ ਤੋਂ ਮੁਕਤ ਸਮਾਜ ਦੀ ਸੋਚ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ। ਉਨ੍ਹਾਂ ਦੇ ਇਸ ਅੰਦਾਜ਼ ਦੀ ਪ੍ਰਸ਼ੰਸਕਾਂ ਵੱਲੋਂ ਵੀ ਚਰਚਾ ਕੀਤੀ ਜਾ ਰਹੀ ਹੈ।
