ਦਿੱਲੀ ’ਚ ਸ਼ਰਾਬ ਦੀ ਆਨਲਾਈਨ ਬੁਕਿੰਗ ਸ਼ੁਰੂ, 208 ਸਰਕਾਰੀ ਠੇਕਿਆਂ ’ਤੇ ਮਿਲੇਗੀ ਸਹੂਲਤ
ਨਵੀਂ ਦਿੱਲੀ: ਦਿੱਲੀ ਵਿੱਚ ਸ਼ਰਾਬ ਖਰੀਦਣ ਵਾਲਿਆਂ ਲਈ ਨਵੀਂ ਡਿਜੀਟਲ ਸਹੂਲਤ ਸ਼ੁਰੂ ਕੀਤੀ ਗਈ ਹੈ। ਦਿੱਲੀ ਸਟੇਟ ਇੰਡਸਟਰੀਅਲ ਐਂਡ ਇਨਫਰਾਸਟ੍ਰਕਚਰ ਡਿਵੈਲਪਮੈਂਟ ਕਾਰਪੋਰੇਸ਼ਨ (DSIIDC) ਦੇ ‘ਦਿੱਲੀ ਲਿਕਰ ਬੁਕਿੰਗ’ ਮੋਬਾਈਲ ਐਪ ਰਾਹੀਂ ਗਾਹਕ ਹੁਣ ਸ਼ਰਾਬ ਦੀ ਆਨਲਾਈਨ ਬੁਕਿੰਗ ਅਤੇ ਭੁਗਤਾਨ ਕਰ ਸਕਣਗੇ। ਫਿਲਹਾਲ ਇਹ ਸਹੂਲਤ 208 ਸਰਕਾਰੀ ਸ਼ਰਾਬ ਦੀਆਂ ਦੁਕਾਨਾਂ ’ਤੇ ਉਪਲਬਧ ਹੋਵੇਗੀ।
ਇਸ ਐਪ ਰਾਹੀਂ ਗਾਹਕ ਉਪਲਬਧ ਬ੍ਰਾਂਡਾਂ ਦੀ ਸੂਚੀ ਦੇਖ ਕੇ ਆਪਣੀ ਪਸੰਦ ਦੀ ਸ਼ਰਾਬ, ਬੋਤਲ ਦਾ ਆਕਾਰ ਅਤੇ ਮਾਤਰਾ ਚੁਣ ਸਕਦੇ ਹਨ। ਇਸ ਤੋਂ ਬਾਅਦ ਆਪਣੀ ਸਹੂਲਤ ਅਨੁਸਾਰ ਸਬੰਧਤ ਦੁਕਾਨ ਦੀ ਚੋਣ ਕਰਕੇ ਆਨਲਾਈਨ ਭੁਗਤਾਨ ਕੀਤਾ ਜਾ ਸਕਦਾ ਹੈ।
ਭੁਗਤਾਨ ਤੋਂ ਬਾਅਦ ਮਿਲੇਗਾ QR ਕੋਡ
ਆਨਲਾਈਨ ਬੁਕਿੰਗ ਅਤੇ ਭੁਗਤਾਨ ਦੀ ਪ੍ਰਕਿਰਿਆ ਪੂਰੀ ਹੋਣ ’ਤੇ ਗਾਹਕ ਨੂੰ ਇੱਕ QR ਕੋਡ ਦਿੱਤਾ ਜਾਵੇਗਾ। ਦੁਕਾਨ ’ਤੇ ਇਸ ਕੋਡ ਨੂੰ ਸਕੈਨ ਕਰਵਾ ਕੇ ਬੁੱਕ ਕੀਤੀ ਸ਼ਰਾਬ ਪ੍ਰਾਪਤ ਕੀਤੀ ਜਾ ਸਕੇਗੀ। ਇਸ ਨਾਲ ਦੁਕਾਨ ’ਤੇ ਪਹੁੰਚਣ ਤੋਂ ਪਹਿਲਾਂ ਹੀ ਬ੍ਰਾਂਡ ਅਤੇ ਬੋਤਲ ਦਾ ਆਕਾਰ ਚੁਣਨ ਦੀ ਸਹੂਲਤ ਮਿਲੇਗੀ।
48 ਘੰਟਿਆਂ ਅੰਦਰ ਲੈਣੀ ਪਵੇਗੀ ਸ਼ਰਾਬ
ਐਪ ਰਾਹੀਂ ਬੁਕਿੰਗ ਕਰਨ ਵਾਲੇ ਗਾਹਕਾਂ ਨੂੰ 48 ਘੰਟਿਆਂ ਦੇ ਅੰਦਰ ਸਬੰਧਤ ਠੇਕੇ ਤੋਂ ਸ਼ਰਾਬ ਲੈਣੀ ਲਾਜ਼ਮੀ ਹੋਵੇਗੀ। ਇਸ ਤੋਂ ਇਲਾਵਾ, ਉਤਪਾਦ ਪ੍ਰਾਪਤ ਕਰਨ ਤੋਂ ਪਹਿਲਾਂ ਬੁਕਿੰਗ ਰੱਦ ਕਰਨ ਦਾ ਵਿਕਲਪ ਵੀ ਦਿੱਤਾ ਗਿਆ ਹੈ। ਹਾਲਾਂਕਿ, ਇੱਕ ਵਾਰ ਸ਼ਰਾਬ ਖਰੀਦਣ ਜਾਂ ਪ੍ਰਾਪਤ ਕਰਨ ਤੋਂ ਬਾਅਦ ਇਸ ਨੂੰ ਵਾਪਸ ਕਰਨ ਦੀ ਸਹੂਲਤ ਨਹੀਂ ਹੋਵੇਗੀ।
ਹੋਮ ਡਿਲਿਵਰੀ ਦੀ ਸਹੂਲਤ ਨਹੀਂ:
ਨਵੀਂ ਵਿਵਸਥਾ ਤਹਿਤ ਸ਼ਰਾਬ ਘਰ ਤੱਕ ਨਹੀਂ ਪਹੁੰਚਾਈ ਜਾਵੇਗੀ। ਗਾਹਕਾਂ ਨੂੰ ਖ਼ੁਦ ਦੁਕਾਨ ’ਤੇ ਜਾ ਕੇ ਆਪਣੀ ਬੁਕਿੰਗ ਲੈਣੀ ਪਵੇਗੀ।
ਫਿਲਹਾਲ 208 ਦੁਕਾਨਾਂ ਤੱਕ ਸੀਮਤ ਸੇਵਾ
ਦਿੱਲੀ ਵਿੱਚ ਚਾਰ ਸਰਕਾਰੀ ਨਿਗਮਾਂ ਰਾਹੀਂ 700 ਤੋਂ ਵੱਧ ਦੁਕਾਨਾਂ ’ਤੇ ਸ਼ਰਾਬ ਵੇਚੀ ਜਾਂਦੀ ਹੈ। ਪਰ ਆਨਲਾਈਨ ਬੁਕਿੰਗ ਦੀ ਸਹੂਲਤ ਇਸ ਸਮੇਂ DSIIDC ਦੇ 208 ਆਊਟਲੈੱਟਾਂ ਤੱਕ ਸੀਮਤ ਹੈ। ਇਸ ਲਈ ਇਹ ਸੇਵਾ ਹਾਲੇ ਦਿੱਲੀ ਦੇ ਸਾਰੇ ਸ਼ਰਾਬ ਦੇ ਠੇਕਿਆਂ ’ਤੇ ਉਪਲਬਧ ਨਹੀਂ ਹੋਵੇਗੀ। ਇਸ ਪ੍ਰਬੰਧ ਦਾ ਮੁੱਖ ਉਦੇਸ਼ ਸ਼ਰਾਬ ਦੀਆਂ ਦੁਕਾਨਾਂ ’ਤੇ ਲੱਗਣ ਵਾਲੀਆਂ ਲੰਬੀਆਂ ਕਤਾਰਾਂ ਘਟਾਉਣਾ, ਭੁਗਤਾਨ ਕਾਊਂਟਰਾਂ ’ਤੇ ਭੀੜ ਘਟਾਉਣਾ ਅਤੇ ਬਿਲਿੰਗ ਪ੍ਰਕਿਰਿਆ ਨੂੰ ਵਧੇਰੇ ਪਾਰਦਰਸ਼ੀ ਬਣਾਉਣਾ ਹੈ।
