ਫ਼ਿਲਮ ‘ਰਾਮਾਇਣ’ ਬਾਰੇ ਪੁੱਛੇ ਸਵਾਲ ’ਤੇ ਸਲਮਾਨ ਖ਼ਾਨ ਨੇ ਮਜ਼ਾਕੀਆ ਅੰਦਾਜ਼ ’ਚ ਦਿੱਤਾ ਜਵਾਬ
ਮੁੰਬਈ: ਅਦਾਕਾਰ ਸਲਮਾਨ ਖ਼ਾਨ ਨੇ ਰਣਬੀਰ ਕਪੂਰ ਦੀ ਆਉਣ ਵਾਲੀ ਫ਼ਿਲਮ ‘ਰਾਮਾਇਣ’ ਨੂੰ ਲੈ ਕੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਫ਼ਿਲਮ ਦੇ ਲਗਭਗ 4000 ਕਰੋੜ ਰੁਪਏ ਦੇ ਬਜਟ ਅਤੇ ਵਿਜ਼ੂਅਲ ਇਫੈਕਟਸ (VFX) ਨੂੰ ਲੈ ਕੇ ਚੱਲ ਰਹੀ ਚਰਚਾ ’ਤੇ ਸਲਮਾਨ ਨੇ ਕਿਹਾ ਕਿ ਫ਼ਿਲਮ ਬਾਰੇ ਗੱਲ ਕਰਦੇ ਸਮੇਂ ਇਸ ਦੀ ਕਹਾਣੀ ਅਤੇ ਪਾਤਰਾਂ ਨੂੰ ਤਰਜੀਹ ਦਿੱਤੀ ਜਾਣੀ ਚਾਹੀਦੀ ਹੈ।
ਇੰਡੀਆ ਟੁਡੇ ਨਾਲ ਗੱਲਬਾਤ ਦੌਰਾਨ ਜਦੋਂ ਸਲਮਾਨ ਤੋਂ ਪੁੱਛਿਆ ਗਿਆ ਕਿ ਕੀ ਉਨ੍ਹਾਂ ਨੇ ਰਣਬੀਰ ਕਪੂਰ ਦੀ ‘ਰਾਮਾਇਣ’ ਦੇਖੀ ਹੈ ਤਾਂ ਉਨ੍ਹਾਂ ਨੇ ਮਜ਼ਾਕੀਆ ਅੰਦਾਜ਼ ਵਿੱਚ ਜਵਾਬ ਦਿੱਤਾ, ‘‘ਮੈਂ ਤਾਂ ਰਾਮਾਨੰਦ ਸਾਗਰ ਦੀ ਰਾਮਾਇਣ ਦੇਖੀ ਹੈ।’’
ਸਲਮਾਨ ਖ਼ਾਨ ਹਾਲ ਹੀ ਵਿੱਚ ਆਪਣੀ ਆਉਣ ਵਾਲੀ ਫ਼ਿਲਮ ‘ਮਾਤ੍ਰਭੂਮੀ’ ਦੇ ਇੱਕ ਸਮਾਗਮ ਵਿੱਚ ਸ਼ਾਮਲ ਹੋਏ ਸਨ। ਇਸ ਦੌਰਾਨ ਉਨ੍ਹਾਂ ਨੇ ‘ਰਾਮਾਇਣ’ ਦੇ ਬਜਟ ਅਤੇ VFX ਬਾਰੇ ਹੋ ਰਹੀ ਚਰਚਾ ’ਤੇ ਵੀ ਆਪਣੀ ਰਾਏ ਰੱਖੀ। ਉਨ੍ਹਾਂ ਕਿਹਾ ਕਿ 4000 ਕਰੋੜ ਰੁਪਏ ਦੇ ਬਜਟ ਅਤੇ VFX ਨੂੰ ਲੈ ਕੇ ਵਾਰ-ਵਾਰ ਗੱਲ ਕਰਨਾ ਸਹੀ ਨਹੀਂ ਹੈ।
ਅਦਾਕਾਰ ਮੁਤਾਬਕ, ਫ਼ਿਲਮ ਦੀ ਚਰਚਾ ਇਸ ਦੇ ਅਸਲ ਵਿਸ਼ੇ ’ਤੇ ਕੇਂਦਰਿਤ ਹੋਣੀ ਚਾਹੀਦੀ ਹੈ। ਲੋਕਾਂ ਨੂੰ ਰਾਮ, ਰਾਵਣ, ਸੀਤਾ ਅਤੇ ਹੋਰ ਪਾਤਰਾਂ ਦੇ ਕਿਰਦਾਰਾਂ, ਕਹਾਣੀ ਅਤੇ ਫ਼ਿਲਮ ਦੀ ਗੁਣਵੱਤਾ ਬਾਰੇ ਗੱਲ ਕਰਨੀ ਚਾਹੀਦੀ ਹੈ, ਨਾ ਕਿ ਸਿਰਫ਼ ਇਸ ’ਤੇ ਹੋਏ ਖ਼ਰਚੇ ਅਤੇ ਤਕਨੀਕੀ ਪੱਖਾਂ ’ਤੇ।
ਇਸੇ ਸਮਾਗਮ ਦੌਰਾਨ ਸਲਮਾਨ ਨੇ ਆਪਣੀ ਫ਼ਿਲਮ ‘ਮਾਤ੍ਰਭੂਮੀ’ ਵਿੱਚ ਨਿਭਾਏ ਕਿਰਦਾਰ ਬਾਰੇ ਵੀ ਦੱਸਿਆ। ਉਨ੍ਹਾਂ ਕਿਹਾ ਕਿ ਇਸ ਫ਼ਿਲਮ ਵਿੱਚ ਉਨ੍ਹਾਂ ਦਾ ਕਿਰਦਾਰ ਭਗਵਾਨ ਰਾਮ ਵਰਗਾ ਹੈ, ਜੋ ਇੱਕ ਆਦਰਸ਼ ਪੁੱਤਰ, ਪਤੀ ਅਤੇ ਪਿਤਾ ਹੈ।
