ਬ੍ਰਾਜ਼ੀਲ ‘ਚ ਹੋਟਲ ਦੀ 7ਵੀਂ ਮੰਜ਼ਿਲ ਤੋਂ ਡਿੱਗ ਕੇ 26 ਸਾਲਾ ਮਹਿਲਾ ਦੀ ਮੌਤ
ਨਵੀਂ ਦਿੱਲੀ: ਬ੍ਰਾਜ਼ੀਲ ਵਿੱਚ ਇੱਕ ਹੋਟਲ ਦੀ ਸੱਤਵੀਂ ਮੰਜ਼ਿਲ ਤੋਂ ਡਿੱਗਣ ਕਾਰਨ 26 ਸਾਲਾ ਮਹਿਲਾ ਦੀ ਮੌਤ ਹੋ ਗਈ। ਦੱਸਿਆ ਜਾ ਰਿਹਾ ਹੈ ਕਿ ਮਹਿਲਾ ਹੋਟਲ ਦੀ ਖਿੜਕੀ ਦੇ ਫਰੇਮ ਦੇ ਸਹਾਰੇ ਝੁਕੀ ਹੋਈ ਸੀ, ਜਦੋਂ ਅਚਾਨਕ ਫਰੇਮ ਟੁੱਟ ਗਿਆ ਅਤੇ ਉਹ ਹੇਠਾਂ ਜਾ ਡਿੱਗੀ। ਇਹ ਹਾਦਸਾ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਿਆ। ਬ੍ਰਾਜ਼ੀਲੀ ਨਿਊਜ਼ ਪੋਰਟਲ ‘G1’ ਦੀ ਰਿਪੋਰਟ ਮੁਤਾਬਕ, ਮ੍ਰਿਤਕਾ ਦੀ ਪਛਾਣ ਰੇਨਾਟਾ ਰੇਬੇਕਾ ਨੇਗਰਾਓ ਸਾਲਦਾਨ੍ਹਾ ਡੌਸ ਸੈਂਟੋਸ ਵਜੋਂ ਹੋਈ ਹੈ। ਉਹ ਆਪਣੇ ਬੁਆਏਫ੍ਰੈਂਡ ਲਿਓਨਾਰਡੋ ਆਗੁਸਤੋ ਪਿੰਟੋ ਫਰਾਂਕਾ ਨਾਲ ਪੋਕਰ ਚੈਂਪੀਅਨਸ਼ਿਪ ਵਿੱਚ ਹਿੱਸਾ ਲੈਣ ਲਈ ਬ੍ਰਾਜ਼ੀਲ ਦੇ ਉੱਤਰ-ਪੂਰਬੀ ਸ਼ਹਿਰ ਸਾਓ ਲੁਈਸ ਪਹੁੰਚੀ ਸੀ। ਇਹ ਘਟਨਾ 3 ਨਵੰਬਰ ਨੂੰ ਸਥਾਨਕ ਸਮੇਂ ਅਨੁਸਾਰ ਰਾਤ ਕਰੀਬ 1:30 ਵਜੇ ਰਿਓ ਪੋਟੀ ਹੋਟਲ ਵਿੱਚ ਵਾਪਰੀ।
CCTV ਵਿੱਚ ਕੈਦ ਹੋਇਆ ਹਾਦਸਾ
ਰਿਪੋਰਟ ਅਨੁਸਾਰ, ਸੀਸੀਟੀਵੀ ਫੁਟੇਜ ਵਿੱਚ ਦੋਵੇਂ ਹੋਟਲ ਦੇ ਗਲਿਆਰੇ ਵਿੱਚ ਲੜਖੜਾਉਂਦੇ ਹੋਏ ਦਿਖਾਈ ਦੇ ਰਹੇ ਹਨ। ਬ੍ਰਾਜ਼ੀਲੀ ਅਧਿਕਾਰੀਆਂ ਮੁਤਾਬਕ, ਘਟਨਾ ਸਮੇਂ ਦੋਵੇਂ ਨਸ਼ੇ ਦੀ ਹਾਲਤ ਵਿੱਚ ਸਨ। ਫੁਟੇਜ ਵਿੱਚ ਦਿਖਾਈ ਦਿੰਦਾ ਹੈ ਕਿ ਪਿੰਟੋ ਫਰਾਂਕਾ ਉੱਪਰਲੀ ਖਿੜਕੀ ਨਾਲ ਟਕਰਾਉਂਦਾ ਹੈ ਅਤੇ ਗਲਤੀ ਨਾਲ ਉਸ ਨੂੰ ਖੋਲ੍ਹ ਦਿੰਦਾ ਹੈ। ਇਸ ਤੋਂ ਬਾਅਦ ਉਹ ਖਿੜਕੀ ਮੁੜ ਬੰਦ ਕਰ ਦਿੰਦਾ ਹੈ। ਕੁਝ ਸਮੇਂ ਬਾਅਦ ਰੇਨਾਟਾ ਹੇਠਲੀ ਖਿੜਕੀ ਦੇ ਫਰੇਮ ’ਤੇ ਝੁਕ ਜਾਂਦੀ ਹੈ ਅਤੇ ਇਸ ਤਰ੍ਹਾਂ ਲੱਗਦਾ ਹੈ ਜਿਵੇਂ ਉਹ ਉਸ ’ਤੇ ਬੈਠੀ ਹੋਵੇ। ਇਸੇ ਦੌਰਾਨ ਖਿੜਕੀ ਦਾ ਫਰੇਮ ਟੁੱਟ ਜਾਂਦਾ ਹੈ ਅਤੇ ਉਹ ਪਿੱਛੇ ਵੱਲ ਹੇਠਾਂ ਡਿੱਗ ਜਾਂਦੀ ਹੈ।
ਹਾਦਸੇ ਤੋਂ ਬਾਅਦ ਉਸ ਦਾ ਬੁਆਏਫ੍ਰੈਂਡ ਕਰੀਬ 10 ਸਕਿੰਟ ਤੱਕ ਸਦਮੇ ਵਿੱਚ ਉੱਥੇ ਹੀ ਖੜ੍ਹਾ ਰਹਿੰਦਾ ਹੈ। ਫਿਰ ਉਹ ਹੇਠਾਂ ਝੁਕ ਕੇ ਖਿੜਕੀ ਵਿੱਚੋਂ ਬਾਹਰ ਦੇਖਦਾ ਹੈ। ਕੁਝ ਸਮੇਂ ਬਾਅਦ ਹੋਟਲ ਦਾ ਇੱਕ ਕਰਮਚਾਰੀ ਉੱਥੇ ਪਹੁੰਚਦਾ ਹੈ, ਜਿਸ ਨੂੰ ਉਹ ਸਾਰੀ ਘਟਨਾ ਬਾਰੇ ਦੱਸਦਾ ਹੈ।
ਬੁਆਏਫ੍ਰੈਂਡ ਨੂੰ ਫਿਲਹਾਲ ਸ਼ੱਕੀ ਨਹੀਂ ਮੰਨਿਆ
ਬ੍ਰਾਜ਼ੀਲੀ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਘਟਨਾ ਦੇ ਹਾਲਾਤਾਂ ਦੀ ਜਾਂਚ ਜਾਰੀ ਹੈ। ਇਸ ਤਹਿਤ ਉਸ ਖਿੜਕੀ ਦੀ ਵੀ ਜਾਂਚ ਕੀਤੀ ਜਾਵੇਗੀ, ਜਿਸ ਦਾ ਫਰੇਮ ਟੁੱਟਣ ਕਾਰਨ ਮਹਿਲਾ ਹੇਠਾਂ ਡਿੱਗੀ ਸੀ। ‘G1’ ਦੀ ਪਿਛਲੀ ਰਿਪੋਰਟ ਮੁਤਾਬਕ, ਪਿੰਟੋ ਫਰਾਂਕਾ ਨੂੰ ਪੁੱਛਗਿੱਛ ਲਈ ਪੁਲਿਸ ਸਟੇਸ਼ਨ ਲਿਜਾਇਆ ਗਿਆ ਸੀ, ਪਰ ਫਿਲਹਾਲ ਉਸ ਨੂੰ ਸ਼ੱਕੀ ਨਹੀਂ ਮੰਨਿਆ ਗਿਆ। ਉਸ ਨੇ ਪੁਲਿਸ ਨੂੰ ਦੱਸਿਆ ਕਿ ਦੋਵੇਂ ਜੁਲਾਈ 2026 ਤੋਂ ਇੱਕ-ਦੂਜੇ ਨੂੰ ਡੇਟ ਕਰ ਰਹੇ ਸਨ। ਉਸ ਦਾ ਕਹਿਣਾ ਸੀ ਕਿ ਉਸ ਨੂੰ ਹਾਦਸੇ ਬਾਰੇ ਕੁਝ ਯਾਦ ਨਹੀਂ, ਕਿਉਂਕਿ ਉਸ ਨੇ ਪੂਰੀ ਰਾਤ ਸ਼ਰਾਬ ਪੀਤੀ ਹੋਈ ਸੀ।
ਉਧਰ, ਮ੍ਰਿਤਕਾ ਦੀ ਮਾਂ ਨੇ ਧੀ ਦੀ ਮੌਤ ’ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਹਾਦਸੇ ਲਈ ਇਨਸਾਫ਼ ਦੀ ਮੰਗ ਕੀਤੀ ਹੈ। ਹੋਟਲ ਪ੍ਰਬੰਧਕਾਂ ਨੇ ਵੀ ਦੁੱਖ ਪ੍ਰਗਟ ਕਰਦਿਆਂ ਕਿਹਾ ਹੈ ਕਿ ਉਹ ਜਾਂਚ ਵਿੱਚ ਅਧਿਕਾਰੀਆਂ ਨੂੰ ਪੂਰਾ ਸਹਿਯੋਗ ਦੇਣਗੇ।
