ਰਿਟਾਇਰਡ IG ਨਾਲ ਸਾਈਬਰ ਠੱਗੀ ਮਾਮਲੇ ’ਚ ਹਾਈਕੋਰਟ ਦਾ ਵੱਡਾ ਫੈਸਲਾ, 3 ਮੁਲਜ਼ਮਾਂ ਦੀ ਜ਼ਮਾਨਤ ਰੱਦ
- ਰਿਟਾਇਰਡ IG ਅਮਰ ਸਿੰਘ ਚਾਹਲ ਨਾਲ ਹੋਈ ਸੀ 8 ਕਰੋੜ ਰੁਪਏ ਦੀ ਠੱਗੀ
ਚੰਡੀਗੜ੍ਹ: ਪੰਜਾਬ ਦੇ ਸਾਬਕਾ ਆਈਜੀ ਅਮਰ ਸਿੰਘ ਚਾਹਲ ਨਾਲ ਕਰੀਬ 8 ਕਰੋੜ ਰੁਪਏ ਦੀ ਸਾਈਬਰ ਠੱਗੀ ਦੇ ਮਾਮਲੇ ’ਚ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ ਵੱਡਾ ਫੈਸਲਾ ਸੁਣਾਇਆ ਹੈ। ਅਦਾਲਤ ਨੇ ਤਿੰਨ ਮੁਲਜ਼ਮਾਂ ਦੀਆਂ ਰੈਗੂਲਰ ਜ਼ਮਾਨਤ ਪਟੀਸ਼ਨਾਂ ਖਾਰਜ ਕਰ ਦਿੱਤੀਆਂ ਹਨ।
ਸ਼ਿਕਾਇਤਕਰਤਾ ਜਸਵਿੰਦਰ ਕੌਰ ਮੁਤਾਬਕ, ਅਮਰ ਸਿੰਘ ਚਾਹਲ ਨੂੰ WhatsApp ਅਤੇ Telegram ’ਤੇ DBS Group ਨਾਂ ਦੇ ਗਰੁੱਪ ਨਾਲ ਜੋੜਿਆ ਗਿਆ ਸੀ। ਗਰੁੱਪ ਦੇ ਮੈਂਬਰਾਂ ਨੇ ਖੁਦ ਨੂੰ SEBI ਅਤੇ ਭਾਰਤ ਸਰਕਾਰ ਨਾਲ ਰਜਿਸਟਰਡ ਦੱਸਦਿਆਂ IPO, Block Trade ਅਤੇ Capital Market ’ਚ ਨਿਵੇਸ਼ ਕਰਵਾਉਣ ਦਾ ਲਾਲਚ ਦਿੱਤਾ।
ਵੱਡੇ ਮੁਨਾਫ਼ੇ ਦਾ ਭਰੋਸਾ ਦੇ ਕੇ 6 ਨਵੰਬਰ ਤੋਂ 12 ਦਸੰਬਰ 2025 ਦਰਮਿਆਨ ਕਰੀਬ 8 ਕਰੋੜ ਰੁਪਏ ਨਿਵੇਸ਼ ਕਰਵਾਏ ਗਏ। ਦੱਸਿਆ ਗਿਆ ਕਿ ਪੀੜਤ ਨੇ ਇਹ ਰਕਮ ਦੋਸਤਾਂ ਅਤੇ ਰਿਸ਼ਤੇਦਾਰਾਂ ਤੋਂ ਉਧਾਰ ਲੈ ਕੇ ਵੀ ਲਗਾਈ ਸੀ। ਪੈਸਾ ਡੁੱਬਣ ਕਾਰਨ ਅਮਰ ਸਿੰਘ ਚਾਹਲ ਮਾਨਸਿਕ ਤੌਰ ’ਤੇ ਬੇਹੱਦ ਪਰੇਸ਼ਾਨ ਹੋ ਗਏ ਅਤੇ ਉਨ੍ਹਾਂ ਨੇ ਖੁਦ ਨੂੰ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ, ਪਰ ਉਹ ਬਚ ਗਏ।
ਇਸ ਮਾਮਲੇ ’ਚ ਪਟਿਆਲਾ ਸਾਈਬਰ ਕ੍ਰਾਈਮ ਥਾਣੇ ’ਚ 23 ਦਸੰਬਰ 2025 ਨੂੰ FIR ਨੰਬਰ 55 ਦਰਜ ਕੀਤੀ ਗਈ ਸੀ। ਜਾਂਚ ਦੌਰਾਨ ਕਈ ਬੈਂਕ ਖਾਤਿਆਂ ਰਾਹੀਂ ਕਰੋੜਾਂ ਰੁਪਏ ਦੇ ਲੈਣ-ਦੇਣ ਦਾ ਖੁਲਾਸਾ ਹੋਇਆ। ਇੱਕ ਟਰੱਸਟ ਦੇ ਖਾਤੇ ’ਚ 6.48 ਕਰੋੜ ਰੁਪਏ ਆਉਣ ਦੀ ਗੱਲ ਵੀ ਸਾਹਮਣੇ ਆਈ। ਮਾਮਲੇ ’ਚ ਸੋਮਨਾਥ ਸਨਤ ਕੁਮਾਰ ਖਨਾਲ, ਗੁਰਤੇਜ ਸਿੰਘ ਅਤੇ ਕ੍ਰਿਸ਼ਨਕਾਂਤ ਗੁਪਤਾ ਨੇ ਜ਼ਮਾਨਤ ਲਈ ਹਾਈਕੋਰਟ ਦਾ ਰੁਖ਼ ਕੀਤਾ ਸੀ।
ਜਸਟਿਸ ਸੰਜੇ ਵਸ਼ਿਸ਼ਠ ਦੀ ਬੈਂਚ ਨੇ 12 ਨਵੰਬਰ 2026 ਨੂੰ ਤਿੰਨਾਂ ਦੀਆਂ ਜ਼ਮਾਨਤ ਪਟੀਸ਼ਨਾਂ ਖਾਰਜ ਕਰ ਦਿੱਤੀਆਂ। ਅਦਾਲਤ ਨੇ ਕਿਹਾ ਕਿ ਸਾਈਬਰ ਠੱਗੀ ਤੇਜ਼ੀ ਨਾਲ ਵਧ ਰਿਹਾ ਗੰਭੀਰ ਆਰਥਿਕ ਅਪਰਾਧ ਹੈ। ਪੀੜਤ ਵੱਲੋਂ ਮਜਬੂਰੀ ’ਚ ਕੀਤਾ ਗਿਆ ਸਮਝੌਤਾ ਮੁਲਜ਼ਮਾਂ ਨੂੰ ਜ਼ਮਾਨਤ ਦਾ ਹੱਕ ਨਹੀਂ ਦਿੰਦਾ। ਹਾਈਕੋਰਟ ਦੇ ਇਸ ਫੈਸਲੇ ਤੋਂ ਬਾਅਦ ਤਿੰਨਾਂ ਮੁਲਜ਼ਮਾਂ ਨੂੰ ਫਿਲਹਾਲ ਜੇਲ੍ਹ ’ਚ ਹੀ ਰਹਿਣਾ ਪਵੇਗਾ।