7 ਕਰੋੜ ਤੋਂ ਵੱਧ ਲੋਕਾਂ ਲਈ ਖੁਸ਼ਖਬਰੀ, ਸਰਕਾਰ ਨੇ PF ਵਿਆਜ ਦਾ ਕੀਤਾ ਐਲਾਨ
EPFO: ਸਰਕਾਰ ਨੇ ਵਿੱਤੀ ਸਾਲ 2024-25 ਲਈ ਕਰਮਚਾਰੀ ਭਵਿੱਖ ਨਿਧੀ ‘ਤੇ 8.25% ਵਿਆਜ ਦਰ ਨੂੰ ਮਨਜ਼ੂਰੀ ਦੇ ਦਿੱਤੀ। ਵਿੱਤ ਮੰਤਰਾਲੇ ਦੀ ਪ੍ਰਵਾਨਗੀ ਤੋਂ ਬਾਅਦ, ਇਹ ਵਿਆਜ ਰਕਮ ਹੁਣ ਖਾਤਿਆਂ ‘ਚ ਜਮ੍ਹਾ ਕੀਤੀ ਜਾਵੇਗੀ।
EPF Interest Rate 2024-25: ਸਰਕਾਰ ਨੇ ਵਿੱਤੀ ਸਾਲ 2024-25 ਲਈ ਕਰਮਚਾਰੀ ਭਵਿੱਖ ਨਿਧੀ (EPF) ‘ਤੇ 8.25% ਵਿਆਜ ਦਰ ਨੂੰ ਮਨਜ਼ੂਰੀ ਦੇ ਦਿੱਤੀ। ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਨੇ 28 ਫਰਵਰੀ ਨੂੰ ਵਿੱਤੀ ਸਾਲ 2024-25 ਲਈ EPF ਜਮ੍ਹਾਂ ‘ਤੇ 8.25% ਦੀ ਵਿਆਜ ਦਰ ਨੂੰ ਬਰਕਰਾਰ ਰੱਖਣ ਦਾ ਫੈਸਲਾ ਕੀਤਾ। ਇਹ ਪਿਛਲੇ ਵਿੱਤੀ ਸਾਲ ਵਿੱਚ ਦਿੱਤੀ ਗਈ ਵਿਆਜ ਦਰ ਦੇ ਬਰਾਬਰ ਹੈ।
ਵਿੱਤ ਮੰਤਰਾਲੇ ਨੇ ਦਿੱਤੀ ਜਾਣਕਾਰੀ
ਮਨਜ਼ੂਰਸ਼ੁਦਾ ਵਿਆਜ ਦਰ ਵਿੱਤ ਮੰਤਰਾਲੇ ਦੀ ਪ੍ਰਵਾਨਗੀ ਲਈ ਭੇਜੀ ਗਈ ਸੀ। ਕਿਰਤ ਮੰਤਰਾਲੇ ਦੇ ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਵਿੱਤ ਮੰਤਰਾਲੇ ਨੇ ਵਿੱਤੀ ਸਾਲ 2024-25 ਲਈ ਈਪੀਐਫ ‘ਤੇ 8.25 ਪ੍ਰਤੀਸ਼ਤ ਵਿਆਜ ਦਰ ਦੇਣ ‘ਤੇ ਸਹਿਮਤੀ ਜਤਾਈ ਹੈ ਤੇ ਕਿਰਤ ਮੰਤਰਾਲੇ ਨੇ ਵੀਰਵਾਰ ਨੂੰ ਇਸ ਸਬੰਧ ਵਿੱਚ ਈਪੀਐਫਓ ਨੂੰ ਸੂਚਿਤ ਕਰ ਦਿੱਤਾ। ਹੁਣ ਵਿੱਤੀ ਸਾਲ 2024-25 ਲਈ ਪ੍ਰਵਾਨਿਤ ਦਰ ਮੁਤਾਬਕ, ਵਿਆਜ ਸੱਤ ਕਰੋੜ ਤੋਂ ਵੱਧ ਈਪੀਐਫਓ ਸ਼ੇਅਰਧਾਰਕਾਂ ਦੇ ਖਾਤਿਆਂ ਵਿੱਚ ਜਮ੍ਹਾਂ ਕੀਤਾ ਜਾਵੇਗਾ।
7 ਕਰੋੜ ਤੋਂ ਵੱਧ ਲੋਕਾਂ ਨੂੰ ਮਿਲੇਗਾ ਸਿੱਧਾ ਲਾਭ
ਈਪੀਐਫਓ ਦੇ ਦੇਸ਼ ਭਰ ਵਿੱਚ 7 ਕਰੋੜ ਤੋਂ ਵੱਧ ਸਰਗਰਮ ਮੈਂਬਰ ਹਨ, ਜਿਨ੍ਹਾਂ ਦੇ ਖਾਤਿਆਂ ਵਿੱਚ ਹਰ ਮਹੀਨੇ ਪੀਐਫ ਦੇ ਪੈਸੇ ਜਮ੍ਹਾ ਕੀਤੇ ਜਾਂਦੇ ਹਨ। ਹੁਣ ਜਦੋਂ ਸਰਕਾਰ ਨੇ ਵੀ ਵਿਆਜ ਦਰ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ, ਤਾਂ ਇਹ ਸਾਰੇ ਖਾਤਾ ਧਾਰਕ ਜਲਦੀ ਹੀ ਆਪਣੇ ਸਾਲਾਨਾ ਵਿਆਜ ਦੇ ਪੈਸੇ ਉਨ੍ਹਾਂ ਦੇ ਪੀਐਫ ਖਾਤੇ ਵਿੱਚ ਜਮ੍ਹਾਂ ਕਰਵਾਇਆ ਜਾਵੇਗਾ।
ਪਿਛਲੇ ਕੁਝ ਸਾਲਾਂ ਦੀਆਂ ਵਿਆਜ ਦਰਾਂ
ਜੇਕਰ ਅਸੀਂ ਥੋੜ੍ਹਾ ਪਿੱਛੇ ਮੁੜ ਕੇ ਵੇਖੀਏ, ਤਾਂ ਇਹ ਸਮਝਣਾ ਆਸਾਨ ਹੋ ਜਾਂਦਾ ਹੈ ਕਿ ਅੱਜ 8.25% ਦੀ ਵਿਆਜ ਦਰ ਕਿਉਂ ਮਹੱਤਵਪੂਰਨ ਹੈ। 2020-21 ਵਿੱਚ, ਈਪੀਐਫ ‘ਤੇ ਵਿਆਜ ਦਰ 8.5% ਸੀ, ਜਿਸਨੂੰ ਕਾਫ਼ੀ ਚੰਗਾ ਮੰਨਿਆ ਜਾਂਦਾ ਸੀ। ਪਰ ਇਸ ਤੋਂ ਬਾਅਦ ਇਹ ਘਟ ਗਿਆ। 2021-22 ਵਿੱਚ, ਇਸਨੂੰ ਘਟਾ ਕੇ 8.1% ਕਰ ਦਿੱਤਾ ਗਿਆ, ਜੋ ਕਿ ਪਿਛਲੇ ਚਾਰ ਦਹਾਕਿਆਂ ਵਿੱਚ ਯਾਨੀ 1977-78 ਤੋਂ ਬਾਅਦ ਸਭ ਤੋਂ ਘੱਟ ਵਿਆਜ ਦਰ ਸੀ। ਇਸ ਤੋਂ ਬਾਅਦ, 2022-23 ਵਿੱਚ ਵਿਆਜ ਵਧਾ ਕੇ 8.15% ਕਰਨ ‘ਤੇ ਕੁਝ ਰਾਹਤ ਮਿਲੀ। ਫਿਰ 2023-24 ਵਿੱਚ ਇਸਨੂੰ ਥੋੜ੍ਹਾ ਹੋਰ ਵਧਾ ਕੇ 8.25% ਕਰ ਦਿੱਤਾ ਗਿਆ। ਅਤੇ ਹੁਣ 2024-25 ਵਿੱਚ ਵੀ 8.25% ਦੀ ਇਹ ਦਰ ਬਰਕਰਾਰ ਰੱਖੀ ਗਈ ਹੈ।
EPFO ਕੀ ਹੈ ਅਤੇ ਕਿੱਥੇ ਜਾਂਦਾ ਹੁੰਦਾ PF ਦਾ ਪੈਸਾ ?
EPFO ਇੱਕ ਸਰਕਾਰੀ ਸੰਸਥਾ ਹੈ ਜੋ ਨੌਕਰੀ ਕਰਨ ਵਾਲੇ ਲੋਕਾਂ ਦੇ ਰਿਟਾਇਰਮੈਂਟ ਫੰਡ ਯਾਨੀ ਕਿ ਪ੍ਰਾਵੀਡੈਂਟ ਫੰਡ ਨੂੰ ਸੰਭਾਲਦੀ ਹੈ। ਹਰ ਮਹੀਨੇ ਤੁਹਾਡੀ ਤਨਖਾਹ ਦਾ ਇੱਕ ਹਿੱਸਾ ਅਤੇ ਕੰਪਨੀ ਤੋਂ ਉਹੀ ਹਿੱਸਾ ਤੁਹਾਡੇ PF ਖਾਤੇ ‘ਚ ਜਮ੍ਹਾ ਕੀਤਾ ਜਾਂਦਾ ਹੈ। ਇਹ ਪੈਸਾ ਨੌਕਰੀ ਛੱਡਣ ਜਾਂ ਸੇਵਾਮੁਕਤੀ ‘ਤੇ ਪ੍ਰਾਪਤ ਹੁੰਦਾ ਹੈ ਅਤੇ ਹਰ ਸਾਲ ਇਸ ਵਿੱਚ ਵਿਆਜ ਵੀ ਜੋੜਿਆ ਜਾਂਦਾ ਹੈ।
