CIBIL Score: ਪਹਿਲੀ ਵਾਰੀ ਬੈਂਕ ਤੋਂ ਲੋਨ ਲੈਣ ਵਾਲਿਆਂ ਲਈ ਰਾਹਤ ਭਰੀ ਖਬਰ
Bank loan Relief; ਅੱਜ ਦੇ ਯੁੱਗ ਵਿੱਚ ਲੋਕ ਆਪਣੀਆਂ ਜ਼ਰੂਰਤਾਂ ਪੂਰੀਆਂ ਕਰਨ ਲਈ ਬੈਂਕ ਲੋਨ ਲੈਂਦੇ ਰਹਿੰਦੇ ਹਨ। ਕਈ ਵਾਰ ਲੋਕਾਂ ਦੀਆਂ ਲੋਨ ਅਰਜ਼ੀਆਂ ਰੱਦ ਕਰ ਦਿੱਤੀਆਂ ਜਾਂਦੀਆਂ ਹਨ। ਜੇ ਤੁਸੀਂ ਪਹਿਲੀ ਵਾਰੀ ਬੈਂਕ ਤੋਂ ਲੋਨ ਲੈਣ ਦੀ ਸੋਚ ਰਹੇ ਹੋ ਪਰ ਤੁਹਾਡਾ CIBIL ਸਕੋਰ ਨਹੀਂ ਹੈ, ਤਾਂ ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ। ਕੇਂਦਰ ਸਰਕਾਰ ਨੇ ਸਾਫ ਕਰ ਦਿੱਤਾ ਹੈ ਕਿ ਅਜਿਹੇ ਉਮੀਦਵਾਰਾਂ ਨੂੰ ਲੋਨ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।
ਵਿੱਤ ਰਾਜ ਮੰਤਰੀ ਪੰਕਜ ਚੌਧਰੀ ਨੇ ਹਾਲ ਹੀ ਵਿੱਚ ਸੰਸਦ ਵਿੱਚ ਦੱਸਿਆ ਕਿ ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਬੈਂਕਾਂ ਅਤੇ ਵਿੱਤ ਸੰਸਥਾਵਾਂ ਨੂੰ ਇਹ ਸਪਸ਼ਟ ਹੁਕਮ ਦਿੱਤੇ ਹਨ ਕਿ ਪਹਿਲੀ ਵਾਰੀ ਲੋਨ ਲੈਣ ਵਾਲੇ ਗ੍ਰਾਹਕਾਂ ਨੂੰ ਸਿਰਫ ਇਸ ਗੱਲ ਕਰਕੇ ਇਨਕਾਰ ਨਾ ਕੀਤਾ ਜਾਵੇ ਕਿ ਉਨ੍ਹਾਂ ਕੋਲ CIBIL ਸਕੋਰ ਨਹੀਂ ਹੈ ਜਾਂ ਕੋਈ ਕ੍ਰੈਡਿਟ ਹਿਸਟਰੀ ਨਹੀਂ ਹੈ।
CIBIL ਸਕੋਰ ਕੀ ਹੁੰਦਾ ਹੈ?
CIBIL ਸਕੋਰ ਤਿੰਨ ਅੰਕਾਂ ਦੀ ਗਿਣਤੀ ਹੁੰਦੀ ਹੈ ਜੋ ਤੁਹਾਡੀ ਵਿੱਤੀ ਭਰੋਸੇਯੋਗਤਾ ਦੱਸਦੀ ਹੈ। ਇਹ ਆਮ ਤੌਰ ‘ਤੇ 300 ਤੋਂ 900 ਦੇ ਦਰਮਿਆਨ ਹੁੰਦਾ ਹੈ। ਇਹ ਇਸ ਗੱਲ ਦਾ ਇਸ਼ਾਰਾ ਦਿੰਦਾ ਹੈ ਕਿ ਤੁਸੀਂ ਪਹਿਲਾਂ ਲਏ ਲੋਨ ਜਾਂ ਕਰੈਡਿਟ ਕਾਰਡ ਦਾ ਭੁਗਤਾਨ ਕਿੰਨੇ ਸਮੇਂ ਅਤੇ ਇਮਾਨਦਾਰੀ ਨਾਲ ਕੀਤਾ ਹੈ। ਹਾਲਾਂਕਿ ਇਹ ਸਕੋਰ ਕਈ ਥਾਵਾਂ ਤੇ ਜ਼ਰੂਰੀ ਮੰਨਿਆ ਜਾਂਦਾ ਹੈ, ਪਰ RBI ਦੇ ਹੁਕਮਾਂ ਅਨੁਸਾਰ, ਪਹਿਲੀ ਵਾਰੀ ਲੋਨ ਲੈਣ ਵਾਲਿਆਂ ਲਈ ਇਹ ਲਾਜ਼ਮੀ ਨਹੀਂ ਹੋ ਸਕਦਾ।
ਬੈਂਕਾਂ ਨੂੰ ਚੇਤਾਵਨੀ: ਸਿਰਫ ਸਕੋਰ ਦੇ ਆਧਾਰ ‘ਤੇ ਲੋਨ ਰੱਦ ਨਾ ਕਰੋ
ਮੰਤਰੀ ਪੰਕਜ ਚੌਧਰੀ ਨੇ 6 ਜਨਵਰੀ ਨੂੰ ਜਾਰੀ ਹੋਏ RBI ਦੇ ਮਾਸਟਰ ਡਾਇਰੈਕਸ਼ਨ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਕੋਈ ਵੀ ਬੈਂਕ ਜਾਂ ਵਿੱਤ ਸੰਸਥਾ ਇਹ ਨਹੀਂ ਕਹਿ ਸਕਦੀ ਕਿ ਬਿਨਾਂ ਕਰੈਡਿਟ ਸਕੋਰ ਵਾਲੇ ਵਿਅਕਤੀ ਨੂੰ ਲੋਨ ਨਹੀਂ ਮਿਲੇਗਾ। ਉਨ੍ਹਾਂ ਕਿਹਾ ਕਿ ਬੈਂਕਾਂ ਨੂੰ ਉਮੀਦਵਾਰਾਂ ਦੀ ਪਿਛੋਕੜ, ਆਮਦਨ, ਮੌਜੂਦਾ ਵਿੱਤੀ ਹਾਲਤ ਅਤੇ ਲੋਨ ਵਾਪਸ ਕਰਨ ਦੀ ਸਮਰੱਥਾ ਦੇ ਆਧਾਰ ‘ਤੇ ਅੰਕਲਨ ਕਰਨਾ ਚਾਹੀਦਾ ਹੈ।
ਸਕੋਰ ਚੈੱਕ ਕਰੋ, ਪਰ ਅਖੀਰਲਾ ਫੈਸਲਾ ਇਸ ‘ਤੇ ਨਿਰਭਰ ਨਾ ਹੋਵੇ
ਹਾਲਾਂਕਿ ਕਰੈਡਿਟ ਸਕੋਰ ਨੂੰ ਪੂਰੀ ਤਰ੍ਹਾਂ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ। ਮੰਤਰਾਲੇ ਨੇ ਇਹ ਵੀ ਕਿਹਾ ਕਿ ਬੈਂਕਾਂ ਨੂੰ ਉਮੀਦਵਾਰਾਂ ਦੇ ਲੈਣ-ਦੇਣ, ਬਕਾਇਆ ਭੁਗਤਾਨ, ਪਹਿਲਾਂ ਦੇ ਕਿਸੇ ਡਿਫਾਲਟ ਜਾਂ ਰਾਈਟ-ਆਫ ਹੋਏ ਲੋਨ ਬਾਰੇ ਪੂਰੀ ਜਾਂਚ ਕਰਨੀ ਚਾਹੀਦੀ ਹੈ। ਇਹ ਲੋਨ ਦੀ ਸੁਰੱਖਿਆ ਅਤੇ ਵਿੱਤੀ ਸਾਵਧਾਨੀ ਲਈ ਜ਼ਰੂਰੀ ਹੈ।
