ਨਾਭਾ ‘ਚ ਬਾਰਿਸ਼ ਨੇ ਮਚਾਇਆ ਕਹਿਰ, ਕਈ ਲੋਕਾਂ ਦੇ ਘਰ ਹੋਏ ਢਹਿ ਢੇਰੀ, ਪ੍ਰਸ਼ਾਸਨ ਤੋਂ ਮਦਦ ਦੀ ਲਗਾ ਰਹੇ ਗੁਹਾਰ
Punjab Rain: ਬਾਰਿਸ਼ ਨਾਲ ਗਰੀਬ ਪਰਿਵਾਰਾਂ ਦੇ ਘਰ ਵੀ ਢਹਿ ਢੇਰੀ ਹੋ ਰਹੇ ਹਨ। ਅਜਿਹੀ ਹੀ ਮੰਦਭਾਗੀ ਖ਼ਬਰ ਹੁਣ ਨਾਭਾ ਬਲਾਕ ਦੇ ਪਿੰਡ ਮਡੌੜ ਤੋਂ ਸਾਹਮਣੇ ਆਈ ਹੈ।
Nabha House Collapsed: ਪੰਜਾਬ ‘ਚ ਲਗਾਤਾਰ ਪੈ ਰਹੀ ਬਾਰਿਸ਼ ਕਾਰਨ ਜਿੱਥੇ ਕਈ ਇਲਾਕਿਆਂ ‘ਚ ਹੜ੍ਹਾਂ ਨਾਲ ਲੱਖਾਂ-ਕਰੋੜਾਂ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਉੱਥੇ ਹੀ ਹੁਣ ਬਾਰਿਸ਼ ਨਾਲ ਗਰੀਬ ਪਰਿਵਾਰਾਂ ਦੇ ਘਰ ਵੀ ਢੇਹ ਢੇਰੀ ਹੋ ਰਹੇ ਹਨ। ਅਜਿਹੀ ਹੀ ਮੰਦਭਾਗੀ ਖ਼ਬਰ ਹੁਣ ਨਾਭਾ ਬਲਾਕ ਦੇ ਪਿੰਡ ਮਡੌੜ ਤੋਂ ਸਾਹਮਣੇ ਆਈ ਹੈ। ਜਿੱਥੇ ਅੱਧੀ ਦਰਜਨ ਦੇ ਕਰੀਬ ਘਰਾਂ ਦਾ ਨੁਕਸਾਨ ਹੋ ਚੁੱਕਿਆ ਹੈ। ਜਿਸ ਵਿੱਚ ਦੋ ਘਰ ਢੇਹ ਢੇਰੀ ਹੋ ਗਏ ਹਨ ਅਤੇ ਕਈਆਂ ਦੀਆਂ ਛੱਤਾਂ ਵੀ ਢਹਿ ਢੇਰੀ ਹੋ ਗਈਆਂ ਹਨ। ਪੀੜਤ ਪਰਿਵਾਰਾਂ ਨੇ ਸਰਕਾਰ ਅਤੇ ਪ੍ਰਸ਼ਾਸਨ ਸਾਡੀ ਮਾਲੀ ਮਦਦ ਕਰੇ।
ਇਹ ਹੈ ਨਾਭਾ ਬਲਾਕ ਦਾ ਪਿੰਡ ਮਡੌੜ ਤਸਵੀਰਾਂ ਵੇਖ ਕੇ ਤੁਸੀਂ ਵੀ ਹੈਰਾਨ ਪਰੇਸ਼ਾਨ ਹੋ ਜਾਵੋਗੇ, ਕਿਉਂਕਿ ਲਗਾਤਾਰ ਪੈ ਰਹੀ ਬਾਰਿਸ਼ ਕਾਰਨ ਇੱਕ ਵਿਧਵਾ ਔਰਤ ਜੋ ਆਪਣੀਆਂ ਦੋ ਬੇਟੀਆਂ ਨਾਲ ਰਹਿੰਦੀ ਸੀ ਦਾ ਘਰ ਬਾਰਿਸ਼ ਕਰਕੇ ਢੇਹਿ ਗਿਆ। ਹੁਣ ਔਰਤ ਆਸ ਲਗਾਈ ਬੈਠੀ ਹੈ ਕਿ ਉਨ੍ਹਾਂ ਦੀ ਕੋਈ ਮਾਲੀ ਮਦਦ ਕਰੇਗਾ ਕਿਉਂਕਿ ਮਹਿਲਾ ਦੇ ਦੋ ਲੜਕੀਆਂ ਹੀ ਹਨ, ਜੋ ਪੜ੍ਹਣ ‘ਚ ਹੁਸ਼ਿਆਰ ਹਨ ਅਤੇ ਵਧੀਆ ਨੰਬਰ ਲੈ ਕੇ ਪੜ੍ਹ ਰਹੀਆਂ ਹਨ। ਪਰ ਘਰ ਢਹਿਣ ਕਾਰਨ ਹੁਣ ਉਨ੍ਹਾਂ ਨੂੰ ਪੜ੍ਹਨ ਦੀ ਚਿੰਤਾ ਹੈ, ਕਿ ਉਹ ਕਿੱਥੇ ਪੜ੍ਹਨ।
ਦੂਜੇ ਪਾਸੇ ਇੱਕ ਹੋਰ ਬਜ਼ੁਰਗ ਮਾਤਾ ਬਾਥਰੂਮ ‘ਚ ਬੈਠ ਕੇ ਮੀਂਹ ਰੁਕਣ ਦੀ ਉਡੀਕ ਵਿੱਚ ਹੈ, ਕਿਉਂਕਿ ਜਦੋਂ ਮੀਂਹ ਰੁਕੇਗਾ ਤਾਂ ਹੀ ਉਹ ਸਵੇਰ ਦੀ ਰੋਟੀ ਪਕਾਵੇਗੀ। ਪਰ ਉਸ ਨੂੰ ਸਵੇਰ ਦਾ ਖਾਣਾ ਨਸੀਬ ਨਹੀਂ ਹੋਇਆ। ਇਸ ਤੋਂ ਇਲਾਵਾ ਹੋਰ ਪਿੰਡ ਵਾਸੀਆ ਦੇ ਵੀ ਘਰ ਢੇਹ ਢੇਰੀ ਹੋ ਚੁੱਕੇ ਹਨ ਅਤੇ ਕਈਆਂ ਘਰਾਂ ਦੀਆਂ ਛੱਤਾ ਬਾਰਿਸ਼ ਦੇ ਕਾਰਨ ਚੋਅ ਆ ਰਹੀਆਂ ਹਨ ਅਤੇ ਉਹ ਛੱਤਾਂ ਵੀ ਕਿਸੇ ਵੀ ਟਾਈਮ ਵੀ ਨੁਕਸਾਨੀਆਂ ਜਾ ਸਕਦੀਆਂ ਹਨ। ਸਾਰੇ ਹੀ ਪੀੜਤ ਪਰਿਵਾਰਾਂ ਵੱਲੋਂ ਪੰਜਾਬ ਸਰਕਾਰ ਅਤੇ ਪ੍ਰਸ਼ਾਸਨ ਤੋਂ ਮਦਦ ਦੀ ਗੁਹਾਰ ਮੰਗੀ ਹੈ।
ਇਸ ਮੌਕੇ ਵਿਧਵਾ ਔਰਤ ਰੀਟਾ ਰਾਣੀ ਅਤੇ ਉਸਦੀ ਲੜਕੀ ਨਵਦੀਪ ਸ਼ਰਮਾ ਨੇ ਕਿਹਾ ਕਿ ਸਾਡੇ ਪਿਤਾ ਦੀ ਮੌਤ ਹੋ ਚੁੱਕੀ ਹੈ ਅਤੇ ਮਾਤਾ ਹੀ ਸਾਡੀ ਪਰਵਰਿਸ਼ ਕਰਦੀ ਹੈ। ਇਹ ਮਿਡ ਡੇ ਮੀਲ ਵਿੱਚ ਕੰਮ ਕਰਦੀ ਹੈ ਅਤੇ ਹੁਣ ਘਰ ਡਿੱਗ ਗਿਆ। ਉਨ੍ਹਾਂ ਕਿਹਾ ਕਿ ਅਸੀਂ ਘਰ ਨਹੀਂ ਬਣਾ ਸਕਦੇ ਅਤੇ ਮੇਰਾ ਸੁਪਨਾ ਹੈ ਕਿ ਮੈਂ ਪੜ੍ਹ ਲਿਖ ਕੇ ਆਈਏਐਸ ਅਫਸਰ ਬਣਾ। ਕਿਉਂਕਿ ਮੈਂ ਪੜ੍ਹਣ ‘ਚ ਬਹੁਤ ਹੁਸ਼ਿਆਰ ਹਾਂ। ਅਤੇ ਪ੍ਰਸ਼ਾਸਨ ਸਾਡੀ ਮਦਦ ਕਰੇ।
ਇਸ ਮੌਕੇ ਹੈਂਡੀਕੈਪਟ ਵਿਅਕਤੀ ਮੁਖਤਿਆਰ ਸਿੰਘ, ਬਜ਼ੁਰਗ ਮਾਤਾ ਅਤੇ ਪੀੜਤ ਸੋਨੀ ਨੇ ਕਿਹਾ ਕਿ ਸਾਡਾ ਘਰ ਬਹੁਤ ਕੱਚਾ ਹੈ ਅਤੇ ਜਦੋਂ ਬਾਰਿਸ਼ ਪਈ ਤਾਂ ਸਾਡਾ ਘਰ ਬਿਲਕੁਲ ਢਹਿ ਢੇਰੀ ਹੋ ਗਿਆ। ਹੁਣ ਅਸੀਂ ਸਮਾਨ ਨੂੰ ਬਚਾਉਣ ਲਈ ਤਰਪਾਲ ਪਾਈ ਹੋਈ ਹੈ ਅਤੇ ਬਾਥਰੂਮ ਵਿੱਚ ਬੈਠ ਕੇ ਹੀ ਗੁਜ਼ਾਰਾ ਕਰ ਰਹੇ ਹਾਂ ਅਤੇ ਸਵੇਰ ਦੀ ਅਸੀਂ ਰੋਟੀ ਵੀ ਨਹੀਂ ਖਾਦੀ ਕਿਉਂਕਿ ਜੇਕਰ ਬਾਰਿਸ਼ ਹਟੇਗੀ ਤਾਂ ਹੀ ਮੈਂ ਕੁਝ ਬਣਾਵਾਂਗੀ। ਅਸੀਂ ਸਰਕਾਰ ਤੋਂ ਮਾਲੀ ਮਦਦ ਦੀ ਮੰਗ ਕਰਦੇ ਹਾਂ।
ਇਸ ਮੌਕੇ ਪਿੰਡ ਵਾਸੀ ਪੰਚਾਇਤ ਮੈਂਬਰ ਮਨਜੀਤ ਸਿੰਘ ਅਤੇ ਪਿੰਡ ਵਾਸੀ ਰਣਜੀਤ ਸਿੰਘ ਨੇ ਕਿਹਾ ਕਿ ਜੋ ਪਿੰਡ ਵਿੱਚ ਕਾਫੀ ਘਰ ਨੁਕਸਾਨੇ ਗਏ ਹਨ। ਉਨ੍ਹਾਂ ਦਾ ਗੁਜ਼ਾਰਾ ਬਹੁਤ ਹੀ ਮੁਸ਼ਕਿਲ ਨਾਲ ਪਹਿਲਾਂ ਹੀ ਚੱਲ ਰਿਹਾ ਸੀ ਅਤੇ ਪਿੰਡ ਵੱਲੋਂ ਅਸੀਂ ਮਦਦ ਕਰਾਂਗੇ ਪਰ ਸਰਕਾਰ ਵੀ ਉਹਨਾਂ ਦੀ ਬਾਂਹ ਫੜੇ।
