ਗੁਰਦਾਸਪੁਰ–ਦਿੱਲੀ ਜਾ ਰਹੀ ਗੱਡੀ ਦਾ ਫਟਿਆ ਟਾਇਰ, ਕਾਰ ਪੁਲ ਤੋਂ ਹੇਠਾਂ ਡਿੱਗੀ; ਬੀਐਸਐਫ ਜਵਾਨ ਜ਼ਖਮੀ
Punjab News: ਗੁਰਦਾਸਪੁਰ ਤੋਂ ਦਿੱਲੀ ਵੱਲ ਜਾ ਰਹੀ ਇੱਕ ਸਵਿਫ਼ਟ ਡਿਜ਼ਾਇਰ ਕਾਰ ਦਾ ਟਾਇਰ ਅਚਾਨਕ ਫੱਟਣ ਕਾਰਨ ਵੱਡਾ ਹਾਦਸਾ ਵਾਪਰ ਗਿਆ। ਕਾਰ ਬੇਕਾਬੂ ਹੋ ਕੇ ਹਾਈਵੇ ’ਤੇ ਲੱਗੀ ਲੋਹੇ ਦੀ ਰੇਲਿੰਗ ਤੋੜਦੀ ਹੋਈ ਗੁਰਾਇਆ ਪੁਲ ਤੋਂ ਹੇਠਾਂ ਆ ਡਿੱਗੀ। ਹਾਦਸੇ ਵਿੱਚ ਕਾਰ ਸਵਾਰ ਬੀਐਸਐਫ ਜਵਾਨ ਬਜਰੰਗ ਸਹਾਏ ਨੂੰ ਸੱਟਾਂ ਆਈਆਂ ਹਨ, ਜਦਕਿ ਉਸਦੀ ਪਤਨੀ ਸੁਰੱਖਿਅਤ ਹੈ।
ਹਾਦਸਾ ਕਿਵੇਂ ਵਾਪਰਿਆ?
ਸੜਕ ਸੁਰੱਖਿਆ ਫੋਰਸ ਦੇ ਏਐਸਆਈ ਸਰਬਜੀਤ ਸਿੰਘ ਨੇ ਦੱਸਿਆ ਕਿ ਬਜਰੰਗ ਸਹਾਏ, ਜੋ ਗੁਰਦਾਸਪੁਰ ਬੀਐਸਐਫ ਬਟਾਲੀਅਨ ਵਿੱਚ ਤੈਨਾਤ ਹਨ, ਆਪਣੀ ਪਤਨੀ ਨਾਲ ਦਿੱਲੀ ਜਾ ਰਹੇ ਸਨ। ਜਦੋਂ ਉਹ ਗੁਰਾਇਆ ਪੁਲ ’ਤੇ ਚੜ੍ਹ ਰਹੇ ਸਨ, ਉਸ ਵੇਲੇ ਕਾਰ ਦਾ ਟਾਇਰ ਅਚਾਨਕ ਫਟ ਗਿਆ।
ਟਾਇਰ ਫਟਦਿਆਂ ਹੀ ਕਾਰ ਬੇਕਾਬੂ ਹੋਈ ਅਤੇ ਰੇਲਿੰਗ ਨੂੰ ਤੋੜਦੇ ਹੋਏ ਪੁਲ ਤੋਂ ਹੇਠਾਂ ਡਿੱਗ ਪਈ। ਕਾਰ ਨੂੰ ਕਾਫ਼ੀ ਨੁਕਸਾਨ ਪੁੱਜਿਆ।
ਇਨਸਾਨੀਅਤ ਦੀ ਮਿਸਾਲ: ਨਰਸਿੰਗ ਕਾਲਜ ਦੇ ਪ੍ਰਿੰਸੀਪਲ ਨੇ ਬਚਾਇਆ ਜੀਵਨ
ਹਾਦਸੇ ਤੋਂ ਕੁਝ ਪਲ ਬਾਅਦ ਗੁਰਾਇਆ ਦੇ ਭਾਈ ਮਤੀ ਦਾਸ ਸਕੂਲ ਆਫ ਨਰਸਿੰਗ ਦੇ ਪ੍ਰਿੰਸੀਪਲ ਆਪਣੇ ਡਰਾਈਵਰ ਨਾਲ ਹੀ ਕਾਰ ਦੇ ਪਿੱਛੇ ਆ ਰਹੇ ਸਨ।
ਉਹਨਾਂ ਨੇ ਤੁਰੰਤ ਜ਼ਖਮੀ ਬੀਐਸਐਫ ਜਵਾਨ ਨੂੰ ਆਪਣੀ ਗੱਡੀ ਵਿੱਚ ਪਾਇਆ, ਫਸਟ ਏਡ ਦਿੱਤੀ ਅਤੇ ਫੌਰੀ ਤੌਰ ’ਤੇ ਗੁਰਾਇਆ ਦੇ ਨਿੱਜੀ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ। ਉਨ੍ਹਾਂ ਦੀ ਚੁਸਤ ਕਾਰਵਾਈ ਨਾਲ ਜਵਾਨ ਨੂੰ ਸਮੇਂ ’ਤੇ ਇਲਾਜ ਮਿਲ ਗਿਆ।
ਪੁਲਿਸ ਮੌਕੇ ’ਤੇ, ਜਾਂਚ ਜਾਰੀ
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਗੁਰਾਇਆ ਪੁਲਿਸ ਵੀ ਮੌਕੇ ’ਤੇ ਪਹੁੰਚ ਗਈ ਅਤੇ ਅਗਲੀ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਕਾਰ ਦੇ ਮਕੈਨਿਕਲ ਫਾਲਟ ਅਤੇ ਹੋਰ ਸੰਭਾਵਨਾਵਾਂ ਦੀ ਪੁਲਿਸ ਜਾਂਚ ਜਾਰੀ ਹੈ।
