ਅਮਰੀਕਾ: ਮੇਨ ਦੇ ਬੈਂਗੋਰ ਏਅਰਪੋਰਟ ’ਤੇ ਟੇਕਆਫ ਦੌਰਾਨ ਜਹਾਜ਼ ਹਾਦਸਾਗ੍ਰਸਤ
Maine plane crash: ਅਮਰੀਕਾ ਦੇ ਮੇਨ ਸੂਬੇ ਵਿੱਚ ਐਤਵਾਰ ਰਾਤ ਨੂੰ ਇੱਕ ਵੱਡਾ ਹਵਾਈ ਹਾਦਸਾ ਵਾਪਰ ਗਿਆ। ਬੈਂਗੋਰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਉਡਾਣ ਭਰਨ ਸਮੇਂ ਬੰਬਾਰਡੀਅਰ ਚੈਲੇਂਜਰ 600 ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ। ਇਹ ਘਟਨਾ ਰਾਤ ਲਗਭਗ 7:45 ਵਜੇ ਵਾਪਰੀ।
ਇਸ ਵਿੱਚ ਕੁੱਲ ਅੱਠ ਲੋਕ ਸਵਾਰ ਸਨ। ਹਾਦਸੇ ਦਾ ਕਾਰਨ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ। FAA ਅਤੇ NTSB (ਨੈਸ਼ਨਲ ਟ੍ਰਾਂਸਪੋਰਟੇਸ਼ਨ ਸੇਫਟੀ ਬੋਰਡ) ਨੇ ਘਟਨਾ ਤੋਂ ਤੁਰੰਤ ਬਾਅਦ ਜਾਂਚ ਸ਼ੁਰੂ ਕਰ ਦਿੱਤੀ।
ਮੁੱਖ ਕਾਰਨ ਦਾ ਖੁਲਾਸਾ
ਖਰਾਬ ਮੌਸਮ ਨੂੰ ਵੀ ਹਾਦਸੇ ਦਾ ਇੱਕ ਸੰਭਾਵੀ ਕਾਰਕ ਮੰਨਿਆ ਜਾ ਰਿਹਾ ਹੈ। FAA ਨੇ ਘਟਨਾ ਦੀ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਬੰਬਾਰਡੀਅਰ ਚੈਲੇਂਜਰ 600 ਜਹਾਜ਼ ਮੇਨ ਦੇ ਬੈਂਗੋਰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਟੇਕਆਫ ਦੌਰਾਨ ਹਾਦਸਾਗ੍ਰਸਤ ਹੋ ਗਿਆ। FAA ਅਤੇ NTSB ਸਾਂਝੇ ਤੌਰ ‘ਤੇ ਘਟਨਾ ਦੀ ਜਾਂਚ ਕਰ ਰਹੇ ਹਨ।
ਬਿਆਨ ਜਾਰੀ
ਦ ਨਿਊਯਾਰਕ ਟਾਈਮਜ਼ ਦੀ ਰਿਪੋਰਟ ਹੈ ਕਿ ਬੈਂਗੋਰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੀ ਬੁਲਾਰਨ ਐਮੀ ਥੀਬੋਡੇਉ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਹਵਾਈ ਅੱਡਾ ਐਤਵਾਰ ਨੂੰ ਬੰਦ ਰਿਹਾ ਕਿਉਂਕਿ ਐਮਰਜੈਂਸੀ ਕਰੂ ਹਾਦਸੇ ਵਾਲੀ ਥਾਂ ‘ਤੇ ਪਹੁੰਚੇ। ਬਿਆਨ ਵਿੱਚ ਹਾਦਸੇ ਬਾਰੇ ਕੋਈ ਵੇਰਵਾ ਨਹੀਂ ਦਿੱਤਾ ਗਿਆ, ਪਰ ਨਿਵਾਸੀਆਂ ਨੂੰ ਇਲਾਕੇ ਤੋਂ ਦੂਰ ਰਹਿਣ ਦੀ ਸਲਾਹ ਦਿੱਤੀ ਗਈ।
ਥਿਬੋਡੇਉ ਨੇ ਬਿਆਨ ਵਿੱਚ ਕਿਹਾ, “ਅਸੀਂ ਇਸ ਸਮੇਂ ਕੋਈ ਵਾਧੂ ਜਾਣਕਾਰੀ ਦੇਣ ਵਿੱਚ ਅਸਮਰੱਥ ਹਾਂ।” ਐਤਵਾਰ ਨੂੰ ਪੂਰਬੀ ਸੰਯੁਕਤ ਰਾਜ ਵਿੱਚ ਇੱਕ ਗੰਭੀਰ ਸਰਦੀਆਂ ਦਾ ਤੂਫਾਨ ਤਬਾਹੀ ਮਚਾ ਰਿਹਾ ਸੀ, ਜਿਸ ਕਾਰਨ ਦੇਸ਼ ਭਰ ਵਿੱਚ ਹਜ਼ਾਰਾਂ ਉਡਾਣਾਂ ਰੱਦ ਕਰਨੀਆਂ ਪਈਆਂ।
