ਸ੍ਰੀ ਦਰਬਾਰ ਸਾਹਿਬ ਦੇ ਸਰੋਵਰ ‘ਚ ਕੁਰਲੀ ਕਰਨ ਵਾਲਾ ਸ਼ਖ਼ਸ ਜੇਲ੍ਹ ਤੋਂ ਹੋਇਆ ਰਿਹਾਅ,ਸੋਸ਼ਲ ਮੀਡੀਆ ‘ਤੇ ਪਹਿਲੀ ਵੀਡੀਓ; ਕਿਹਾ- ਰੱਬ ਦਾ ਸ਼ੁਕਰ ਹੈ, ਮੈਂ ਸੁਰੱਖਿਅਤ ਹਾਂ
ਅੰਮ੍ਰਿਤਸਰ ਦੇ ਸ੍ਰੀ ਦਰਬਾਰ ਸਾਹਿਬ ਦੇ ਪਵਿੱਤਰ ਸਰੋਵਰ ਵਿੱਚ ਕੁਰਲੀ ਕਰਨ ਵਾਲਾ ਮੁਸਲਿਮ ਨੌਜਵਾਨ ਸੁਭਾਨ ਰੰਗਰੇਜ਼ ਜ਼ਮਾਨਤ ’ਤੇ ਰਿਹਾ ਹੋਣ ਤੋਂ ਬਾਅਦ ਪਹਿਲੀ ਵਾਰ ਸੋਸ਼ਲ ਮੀਡੀਆ ’ਤੇ ਸਾਹਮਣੇ ਆਇਆ। ਹਾਲਾਂਕਿ ਇਸ ਵਾਰ ਉਸਨੇ ਨਾ ਤਾਂ ਸ੍ਰੀ ਦਰਬਾਰ ਸਾਹਿਬ ਬਾਰੇ ਕੁਝ ਕਿਹਾ ਅਤੇ ਨਾ ਹੀ ਆਪਣੇ ਖ਼ਿਲਾਫ਼ ਹੋਈ ਕਾਨੂੰਨੀ ਕਾਰਵਾਈ ’ਤੇ ਕੋਈ ਟਿੱਪਣੀ ਕੀਤੀ।
ਉਸ ਦਾ ਇੱਕ ਵੀਡੀਓ ਇੱਕ ਹੋਰ ਮੁਸਲਿਮ ਵਿਅਕਤੀ ਵੱਲੋਂ ਇੰਸਟਾਗ੍ਰਾਮ ’ਤੇ ਸਾਂਝਾ ਕੀਤਾ ਗਿਆ, ਜਿਸ ਵਿੱਚ ਕਿਹਾ ਗਿਆ ਕਿ “ਸਾਡਾ ਛੋਟਾ ਭਰਾ ਸੁਭਾਨ ਰੰਗਰੇਜ਼ ਵਾਪਸ ਆ ਗਿਆ ਹੈ। ਤੁਸੀਂ ਸਾਰਿਆਂ ਦੀਆਂ ਦੁਆਵਾਂ ਨਾਲ ਉਹ ਸਾਡੇ ਕੋਲ ਹੈ।”
ਵੀਡੀਓ ਵਿੱਚ ਸੁਭਾਨ ਕਹਿੰਦਾ ਹੈ, “ਅੱਲਾਹ ਦਾ ਸ਼ੁਕਰ ਹੈ, ਮੈਂ ਠੀਕ ਹਾਂ। ਤੁਹਾਡੀਆਂ ਦੁਆਵਾਂ ਨਾਲ ਸਹੀ ਸਲਾਮਤ ਹਾਂ। ਮੈਂ ਸਿਰਫ਼ ਇਹੀ ਕਹਿਣਾ ਚਾਹੁੰਦਾ ਹਾਂ ਕਿ ਨਮਾਜ਼ ਪੜ੍ਹੋ, ਰੋਜ਼ੇ ਰੱਖੋ ਅਤੇ ਅੱਲਾਹ ਤੋਂ ਦੁਆ ਕਰੋ।” ਇਸ ਵਾਰ ਉਸਦਾ ਰਵੱਈਆ ਪਹਿਲਾਂ ਵਾਂਗ ਅਹੰਕਾਰ ਵਾਲਾ ਨਹੀਂ ਸੀ।
ਘਟਨਾ ਕੀ ਸੀ?
ਦਿੱਲੀ ਦਾ ਰਹਿਣ ਵਾਲਾ ਸੁਭਾਨ 13 ਜਨਵਰੀ ਨੂੰ ਦਰਬਾਰ ਸਾਹਿਬ ਆਇਆ ਸੀ। ਉੱਥੇ ਉਸਨੇ ਪਵਿੱਤਰ ਸਰੋਵਰ ਵਿੱਚ ਬੈਠ ਕੇ ਮੂੰਹ ਵਿੱਚ ਪਾਣੀ ਭਰਿਆ ਤੇ ਓਥੇ ਹੀ ਥੁੱਕ ਦਿੱਤਾ। ਉਸਨੇ ਆਪਣੇ ਸਾਥੀ ਨਾਲ ਵੀਡੀਓ ਵੀ ਬਣਵਾਈ ਅਤੇ ਬਾਅਦ ਵਿੱਚ ਇੰਸਟਾਗ੍ਰਾਮ ’ਤੇ ਪੋਸਟ ਕਰ ਦਿੱਤੀ।
ਵੀਡੀਓ ਵਿੱਚ ਉਸਨੇ ਆਪਣੇ ਆਪ ਨੂੰ “ਮੁਸਲਿਮ ਸ਼ੇਰ” ਵੀ ਕਿਹਾ, ਜਿਸ ਕਾਰਨ ਸਿੱਖ ਸੰਗਤ ਵਿੱਚ ਭਾਰੀ ਰੋਸ ਪੈਦਾ ਹੋਇਆ।
SGPC ਦੀ ਕਾਰਵਾਈ
ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ (SGPC) ਨੇ CCTV ਫੁਟੇਜ ਦੀ ਜਾਂਚ ਕਰਕੇ ਦੱਸਿਆ ਕਿ ਉਹ ਇਰਾਦੇ ਨਾਲ ਹੀ ਬੇਅਦਬੀ ਕਰਨ ਆਇਆ ਸੀ। ਫੁਟੇਜ ਵਿੱਚ ਉਹ ਵੀਡੀਓ ਬਣਾਉਂਦਾ ਤੇ ਘੁੰਮਦਾ ਨਜ਼ਰ ਆਇਆ, ਪਰ ਉਸਨੇ ਮੱਥਾ ਨਹੀਂ ਟੇਕਿਆ।
ਨਿਹੰਗਾਂ ਵੱਲੋਂ ਕਾਰਵਾਈ
24 ਜਨਵਰੀ ਨੂੰ ਗਾਜ਼ਿਆਬਾਦ ਵਿੱਚ ਨਿਹੰਗਾਂ ਨੇ ਉਸਨੂੰ ਫੜ ਕੇ ਕੁੱਟਮਾਰ ਕੀਤੀ ਅਤੇ ਪੁਲਿਸ ਦੇ ਹਵਾਲੇ ਕਰ ਦਿੱਤਾ। ਇਸ ਤੋਂ ਬਾਅਦ ਉਸ ’ਤੇ ਬੇਅਦਬੀ ਦਾ ਕੇਸ ਦਰਜ ਹੋਇਆ ਅਤੇ ਉਹ ਜੇਲ੍ਹ ਚਲਾ ਗਿਆ। ਹੁਣ ਉਹ ਜ਼ਮਾਨਤ ’ਤੇ ਬਾਹਰ ਆਇਆ ਹੈ।
