SBI ਗਾਹਕਾਂ ਲਈ ਜ਼ਰੂਰੀ ਖ਼ਬਰ: ਕੱਲ੍ਹ ਤੋਂ ਲਗਾਤਾਰ 6 ਦਿਨ ਬੰਦ ਰਹਿ ਸਕਦੀਆਂ ਹਨ ਬੈਂਕ ਸ਼ਾਖਾਵਾਂ; ਜਾਣੋ ਹੜਤਾਲ ਅਤੇ ਛੁੱਟੀਆਂ ਦਾ ਪੂਰਾ ਸ਼ਡਿਊਲ
SBI Bank Strike: ਜੇਕਰ ਤੁਹਾਡਾ ਖਾਤਾ ਦੇਸ਼ ਦੇ ਸਭ ਤੋਂ ਵੱਡੇ ਜਨਤਕ ਖੇਤਰ ਦੇ ਬੈਂਕ, ਸਟੇਟ ਬੈਂਕ ਆਫ਼ ਇੰਡੀਆ (SBI) ਵਿੱਚ ਹੈ, ਤਾਂ ਅੱਜ ਹੀ ਆਪਣੇ ਬੈਂਕ ਨਾਲ ਜੁੜੇ ਜ਼ਰੂਰੀ ਕੰਮ ਨਿਪਟਾ ਲਓ। 23 ਮਈ ਤੋਂ 28 ਮਈ, 2026 ਵਿਚਕਾਰ ਦੇਸ਼ ਭਰ ਵਿੱਚ ਐਸਬੀਆਈ ਦੀਆਂ ਸ਼ਾਖਾਵਾਂ ਲਗਾਤਾਰ ਛੇ ਦਿਨਾਂ ਲਈ ਬੰਦ ਰਹਿਣ ਦੀ ਸੰਭਾਵਨਾ ਹੈ। ਬੈਂਕਿੰਗ ਸੇਵਾਵਾਂ ਵਿੱਚ ਆਉਣ ਵਾਲੇ ਇਸ ਵਿਘਨ ਦਾ ਮੁੱਖ ਕਾਰਨ ਵੀਕਐਂਡ ਦੀਆਂ ਛੁੱਟੀਆਂ, ਬੈਂਕ ਕਰਮਚਾਰੀਆਂ ਦੀ ਦੋ ਦਿਨਾਂ ਦੀ ਦੇਸ਼ ਵਿਆਪੀ ਹੜਤਾਲ ਅਤੇ ਬਕਰੀਦ (ਈਦ-ਉਲ-ਅਧਾ) ਦੇ ਤਿਉਹਾਰ ਦੀਆਂ ਛੁੱਟੀਆਂ ਹਨ।
ਜਾਣੋ 23 ਤੋਂ 28 ਮਈ ਤੱਕ ਬੈਂਕ ਬੰਦ ਰਹਿਣ ਦਾ ਪੂਰਾ ਸ਼ਡਿਊਲ:
- 23 ਮਈ (ਚੌਥਾ ਸ਼ਨੀਵਾਰ): ਆਰਬੀਆਈ (RBI) ਦੇ ਨਿਯਮਾਂ ਮੁਤਾਬਕ ਮਹੀਨੇ ਦੇ ਚੌਥੇ ਸ਼ਨੀਵਾਰ ਕਾਰਨ ਬੈਂਕ ਬੰਦ ਰਹਿਣਗੇ।
- 24 ਮਈ (ਐਤਵਾਰ): ਹਫ਼ਤਾਵਾਰੀ ਛੁੱਟੀ ਕਾਰਨ ਬੈਂਕਾਂ ਵਿੱਚ ਕੰਮ ਨਹੀਂ ਹੋਵੇਗਾ।
- 25 ਅਤੇ 26 ਮਈ (ਸੋਮਵਾਰ ਤੇ ਮੰਗਲਵਾਰ): ਆਲ ਇੰਡੀਆ ਸਟੇਟ ਬੈਂਕ ਆਫ਼ ਇੰਡੀਆ ਸਟਾਫ ਫੈਡਰੇਸ਼ਨ (AISBISF) ਵੱਲੋਂ ਆਪਣੀਆਂ ਮੰਗਾਂ ਨੂੰ ਲੈ ਕੇ ਦੋ ਦਿਨਾਂ ਦੀ ਦੇਸ਼ ਵਿਆਪੀ ਹੜਤਾਲ ਦਾ ਐਲਾਨ ਕੀਤਾ ਗਿਆ ਹੈ।
- 27 ਅਤੇ 28 ਮਈ (ਬੁੱਧਵਾਰ ਤੇ ਵੀਰਵਾਰ): ਬਕਰੀਦ ਦੇ ਤਿਉਹਾਰ ਕਾਰਨ ਵੱਖ-ਵੱਖ ਸੂਬਿਆਂ ਵਿੱਚ ਛੁੱਟੀ ਰਹੇਗੀ। ਜ਼ਿਆਦਾਤਰ ਹਿੱਸਿਆਂ ਵਿੱਚ 27 ਮਈ ਨੂੰ ਬੈਂਕ ਬੰਦ ਰਹਿਣਗੇ, ਜਦਕਿ ਕੁਝ ਥਾਵਾਂ ‘ਤੇ 28 ਮਈ ਨੂੰ ਛੁੱਟੀ ਹੋਵੇਗੀ। ਜੰਮੂ-ਕਸ਼ਮੀਰ ਵਿੱਚ 27 ਅਤੇ 28 ਮਈ ਦੋਵੇਂ ਦਿਨ ਬੈਂਕ ਬੰਦ ਰਹਿਣਗੇ।
ਡਿਜੀਟਲ ਸੇਵਾਵਾਂ ‘ਤੇ ਨਹੀਂ ਪਵੇਗਾ ਅਸਰ
ਬੈਂਕ ਸ਼ਾਖਾਵਾਂ ਭਾਵੇਂ ਛੇ ਦਿਨ ਬੰਦ ਰਹਿਣਗੀਆਂ, ਪਰ ਗਾਹਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ ਹੈ। ਬੈਂਕ ਦੀਆਂ ਆਨਲਾਈਨ ਬੈਂਕਿੰਗ ਸੇਵਾਵਾਂ, ਯੂਪੀਆਈ (UPI) ਟ੍ਰਾਂਜੈਕਸ਼ਨ, ਮੋਬਾਈਲ ਐਪ ਅਤੇ ਏਟੀਐਮ (ATM) ਸੇਵਾਵਾਂ ਪਹਿਲਾਂ ਵਾਂਗ ਹੀ 24 ਘੰਟੇ ਚਾਲੂ ਰਹਿਣਗੀਆਂ। ਗਾਹਕ ਘਰ ਬੈਠੇ ਹੀ ਡਿਜੀਟਲ ਤਰੀਕੇ ਨਾਲ ਪੈਸਿਆਂ ਦਾ ਲੈਣ-ਦੇਣ ਕਰ ਸਕਣਗੇ। ਹਾਲਾਂਕਿ, ਕਲਰਕ ਅਤੇ ਲੋਅਰ ਸਟਾਫ ਦੇ ਹੜਤਾਲ ‘ਤੇ ਹੋਣ ਕਾਰਨ ਚੈੱਕ ਕਲੀਅਰਿੰਗ, ਕੈਸ਼ ਕਾਊਂਟਰ ਅਤੇ ਪਾਸਬੁੱਕ ਅੱਪਡੇਟ ਵਰਗੇ ਕੰਮ ਪ੍ਰਭਾਵਿਤ ਹੋਣਗੇ।
ਕਿਉਂ ਹੜਤਾਲ ‘ਤੇ ਜਾ ਰਹੇ ਹਨ SBI ਕਰਮਚਾਰੀ? ਜਾਣੋ 16 ਮੁੱਖ ਮੰਗਾਂ
ਐਸਬੀਆਈ ਸਟਾਫ ਫੈਡਰੇਸ਼ਨ ਨੇ ਕਰਮਚਾਰੀਆਂ ਦੇ ਹਿੱਤਾਂ ਅਤੇ ਕੰਮ ਦੇ ਬੋਝ ਨੂੰ ਘਟਾਉਣ ਲਈ 16 ਮੁੱਖ ਮੰਗਾਂ ਦੀ ਸੂਚੀ ਤਿਆਰ ਕੀਤੀ ਹੈ, ਜਿਨ੍ਹਾਂ ਵਿੱਚੋਂ ਪ੍ਰਮੁੱਖ ਹੇਠ ਲਿਖੇ ਅਨੁਸਾਰ ਹਨ:
- ਪ੍ਰਤੀਨਿਧਤਾ ਦੀ ਬਹਾਲੀ: ਬੈਂਕ ਦੇ ਬੋਰਡ ਵਿੱਚ ‘ਵਰਕਰ ਸ਼੍ਰੇਣੀ’ ਵਿੱਚੋਂ ਡਾਇਰੈਕਟਰ ਅਤੇ ਪੀਐਫ (PF) ਟਰੱਸਟ ਵਿੱਚ ਕਰਮਚਾਰੀ ਪ੍ਰਤੀਨਿਧ ਨਿਯੁਕਤ ਕਰਨ ਦੀ ਪਰੰਪਰਾ ਮੁੜ ਸ਼ੁਰੂ ਕੀਤੀ ਜਾਵੇ।
- ਨਵੀਂ ਭਰਤੀ: ਬੈਂਕ ਵਿੱਚ ਖਾਲੀ ਪਏ ਚੌਥੇ ਦਰਜੇ (ਮੈਸੇਂਜਰ) ਦੇ ਅਹੁਦਿਆਂ ਨੂੰ ਤੁਰੰਤ ਪੱਕੀ ਭਰਤੀ ਰਾਹੀਂ ਭਰਿਆ ਜਾਵੇ।
- ਸੁਰੱਖਿਆ ਪ੍ਰਬੰਧ: ਸ਼ਾਖਾਵਾਂ ਦੀ ਸੁਰੱਖਿਆ ਲਈ ਲੋੜੀਂਦੇ ਹਥਿਆਰਬੰਦ ਗਾਰਡ ਨਿਯੁਕਤ ਕੀਤੇ ਜਾਣ।
- ਆਊਟਸੋਰਸਿੰਗ ‘ਤੇ ਰੋਕ: ਪੱਕੇ ਕੰਮਾਂ ਨੂੰ ਬਾਹਰੀ ਏਜੰਸੀਆਂ (Outsourcing) ਨੂੰ ਦੇਣ ਦੀ ਪ੍ਰਥਾ ਬੰਦ ਹੋਵੇ।
- NPS ਵਿੱਚ ਖੁੱਲ੍ਹ: ਨੈਸ਼ਨਲ ਪੈਨਸ਼ਨ ਸਿਸਟਮ ਦੇ ਮੁਲਾਜ਼ਮਾਂ ਨੂੰ ਆਪਣਾ ਪੈਨਸ਼ਨ ਫੰਡ ਮੈਨੇਜਰ ਚੁਣਨ ਦੀ ਆਜ਼ਾਦੀ ਮਿਲੇ।
- ਕਰਮਚਾਰੀਆਂ ਦੀ ਬਦਲੀ (ICT): 2019 ਤੋਂ ਬਾਅਦ ਭਰਤੀ ਹੋਏ ਮੁਲਾਜ਼ਮਾਂ ਨੂੰ ਦੂਜੇ ਸਰਕਲ ਵਿੱਚ ਤਬਾਦਲੇ ਦਾ ਮੌਕਾ ਦਿੱਤਾ ਜਾਵੇ।
- ਕਰਾਸ-ਸੇਲਿੰਗ ‘ਤੇ ਲਗਾਮ: ਬੀਮਾ ਅਤੇ ਮਿਊਚੁਅਲ ਫੰਡ ਵੇਚਣ (Cross-Selling) ਲਈ ਕਰਮਚਾਰੀਆਂ ‘ਤੇ ਬਣਾਇਆ ਜਾਂਦਾ ਨਾਜਾਇਜ਼ ਦਬਾਅ ਖ਼ਤਮ ਕੀਤਾ ਜਾਵੇ।
- ਮੈਡੀਕਲ ਅਤੇ ਪੈਨਸ਼ਨ ਲਾਭ: ਮੈਡੀਕਲ ਰਿਇੰਬਰਸਮੈਂਟ ਸਕੀਮ ਨੂੰ ਸਰਲ ਬਣਾਇਆ ਜਾਵੇ ਅਤੇ ਸੇਵਾਮੁਕਤ ਕਰਮਚਾਰੀਆਂ ਦੀ ਪੈਨਸ਼ਨ ਗਣਨਾ ਵਿੱਚ ਸਾਰੇ ਭੱਤੇ ਸ਼ਾਮਲ ਕੀਤੇ ਜਾਣ।
