ਮੁਰੈਨਾ ‘ਚ ਦਰਦਨਾਕ ਰੇਲ ਹਾਦਸਾ, ਅਫ਼ਵਾਹ ਕਾਰਨ ਟ੍ਰੇਨ ਤੋਂ ਕੂਦੇ ਯਾਤਰੀ, 4 ਦੀ ਮੌਤ
Morena Train Accident; ਮੱਧ ਪ੍ਰਦੇਸ਼ ਦੇ ਮੁਰੈਨਾ ਤੋਂ ਇੱਕ ਬਹੁਤ ਹੀ ਦਰਦਨਾਕ ਖ਼ਬਰ ਸਾਹਮਣੇ ਆਈ ਹੈ। ਦਰਅਸਲ, ਇੱਥੇ ਐਤਵਾਰ ਸ਼ਾਮ 4 ਵਜੇ ਉੱਧਰ ਤੋਂ ਗੁਜ਼ਰ ਰਹੀ ਉਦੈਪੁਰ ਇੰਟਰਸਿਟੀ ਐਕਸਪ੍ਰੈਸ ਵਿੱਚ ਯਾਤਰਾ ਕਰ ਰਹੇ ਯਾਤਰੀਆਂ ਵਿਚਕਾਰ ਅੱਗ ਲੱਗਣ ਦੀ ਅਫ਼ਵਾਹ ਫੈਲ ਗਈ। ਇਸ ਤੋਂ ਬਾਅਦ ਘਬਰਾਏ ਹੋਏ ਯਾਤਰੀ ਟ੍ਰੇਨ ਤੋਂ ਕੂਦਣ ਲੱਗ ਪਏ। ਇਸ ਦੌਰਾਨ ਮੈਨ ਟ੍ਰੈਕ ‘ਤੇ ਆ ਰਹੀ ਪਾਤਾਲਕੋਟ ਐਕਸਪ੍ਰੈਸ ਦੀ ਚਪੇਟ ਵਿੱਚ ਕਈ ਯਾਤਰੀ ਆ ਗਏ। ਇਸ ਹਾਦਸੇ ਵਿੱਚ ਤਿੰਨ ਮਹਿਲਾਵਾਂ ਅਤੇ ਇੱਕ ਬੱਚੇ ਸਮੇਤ ਕੁੱਲ 4 ਲੋਕਾਂ ਦੀਆਂ ਲਾਸ਼ਾਂ ਹੁਣ ਤੱਕ ਬਰਾਮਦ ਕੀਤੀਆਂ ਗਈਆਂ ਹਨ। ਇਸ ਦਰਦਨਾਕ ਘਟਨਾ ਨਾਲ ਮੌਕੇ ‘ਤੇ ਕੋਹਰਾਮ ਮਚ ਗਿਆ।
ਜਾਣਕਾਰੀ ਮਿਲਦੇ ਹੀ ਪੁਲਿਸ ਅਤੇ ਰੇਲਵੇ ਪ੍ਰਸ਼ਾਸਨ ਦੇ ਅਧਿਕਾਰੀ ਮੌਕੇ ‘ਤੇ ਪਹੁੰਚ ਗਏ। ਰਾਹਤ ਅਤੇ ਬਚਾਅ ਕਾਰਜ ਵਿੱਚ ਜੁਟੇ ਸਰਾਏ ਛੋਲਾ ਥਾਣਾ ਇੰਚਾਰਜ ਕੇ.ਕੇ. ਸਿੰਘ ਨੇ ਦੱਸਿਆ ਕਿ ਘਟਨਾ ਦੀ ਸੂਚਨਾ ਮਿਲਦੇ ਹੀ ਤੁਰੰਤ ਰਾਹਤ ਕਾਰਜ ਸ਼ੁਰੂ ਕਰ ਦਿੱਤਾ ਗਿਆ। ਹੁਣ ਤੱਕ ਤਿੰਨ ਮਹਿਲਾਵਾਂ ਅਤੇ ਇੱਕ ਬੱਚੇ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਜਾ ਚੁੱਕੀਆਂ ਹਨ। ਉਨ੍ਹਾਂ ਦੱਸਿਆ ਕਿ ਸ਼ਾਮ 4:15 ਵਜੇ ਮੁਰੈਨਾ ਤੋਂ ਧੌਲਪੁਰ ਵੱਲ ਜਾ ਰਹੀ ਉਦੈਪੁਰ ਇੰਟਰਸਿਟੀ ਐਕਸਪ੍ਰੈਸ ਦੇ ਹੇਤਮਪੁਰ ਸਟੇਸ਼ਨ ‘ਤੇ ਟ੍ਰੇਨ ਵਿੱਚ ਅੱਗ ਲੱਗਣ ਦੀ ਅਫ਼ਵਾਹ ਫੈਲ ਗਈ ਸੀ, ਜਿਸ ਕਾਰਨ ਯਾਤਰੀ ਚੱਲਦੀ ਟ੍ਰੇਨ ਤੋਂ ਕੂਦ ਗਏ। ਇਸੇ ਦੌਰਾਨ ਦੂਜੇ ਟ੍ਰੈਕ ‘ਤੇ ਆ ਰਹੀ ਪਾਤਾਲਕੋਟ ਐਕਸਪ੍ਰੈਸ ਦੀ ਚਪੇਟ ਵਿੱਚ ਆ ਕੇ ਇਹ ਹਾਦਸਾ ਵਾਪਰ ਗਿਆ।
ਰੇਲਵੇ ਵੱਲੋਂ ਦਿੱਤੀ ਗਈ ਜਾਣਕਾਰੀ
ਇਸ ਪੂਰੀ ਘਟਨਾ ਬਾਰੇ ਉੱਤਰ ਮੱਧ ਰੇਲਵੇ ਨੇ ਦੱਸਿਆ ਕਿ 14 ਜੂਨ ਨੂੰ ਲਗਭਗ 16:15 ਵਜੇ ਝਾਂਸੀ ਮੰਡਲ ਦੇ ਹੇਤਮਪੁਰ–ਧੌਲਪੁਰ ਰੇਲ ਸੈਕਸ਼ਨ ਵਿੱਚ ਗੱਡੀ ਨੰਬਰ 19665 ਖਜੁਰਾਹੋ–ਉਦੈਪੁਰ ਇੰਟਰਸਿਟੀ ਐਕਸਪ੍ਰੈਸ ਦੇ ਜਨਰਲ ਕੋਚ ਵਿੱਚ ਕਿਸੇ ਯਾਤਰੀ ਵੱਲੋਂ ਐਮਰਜੈਂਸੀ ਚੇਨ ਪੁਲਿੰਗ ਕੀਤੇ ਜਾਣ ਕਾਰਨ ਟ੍ਰੇਨ ਰੁਕ ਗਈ ਸੀ। ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ ਟ੍ਰੇਨ ਰੁਕਣ ਦੇ ਦੌਰਾਨ ਕੁਝ ਯਾਤਰੀ ਟ੍ਰੇਨ ਤੋਂ ਉਤਰ ਕੇ ਨੇੜਲੇ ਰੇਲ ਟ੍ਰੈਕ ‘ਤੇ ਚਲੇ ਗਏ। ਇਸੇ ਦੌਰਾਨ ਦੂਜੇ ਪਾਸੇ ਤੋਂ ਆ ਰਹੀ ਗੱਡੀ ਨੰਬਰ 20424 ਫਿਰੋਜ਼ਪੁਰ–ਸਿਵਨੀ ਪਾਤਾਲਕੋਟ ਐਕਸਪ੍ਰੈਸ ਦੀ ਚਪੇਟ ਵਿੱਚ ਆ ਕੇ ਕੁਝ ਯਾਤਰੀਆਂ ਦੀ ਮੌਤ ਹੋਣ ਦੀ ਸੂਚਨਾ ਮਿਲੀ ਹੈ।
ਰੇਲਵੇ ਕਰ ਰਿਹਾ ਜਾਂਚ
ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ ਰੇਲਵੇ ਪ੍ਰਸ਼ਾਸਨ, ਰੇਲਵੇ ਸੁਰੱਖਿਆ ਬਲ (RPF), ਸਰਕਾਰੀ ਰੇਲਵੇ ਪੁਲਿਸ ਅਤੇ ਸਥਾਨਕ ਪ੍ਰਸ਼ਾਸਨ ਦੇ ਅਧਿਕਾਰੀ ਤੁਰੰਤ ਮੌਕੇ ‘ਤੇ ਪਹੁੰਚ ਗਏ। ਪ੍ਰਭਾਵਿਤ ਯਾਤਰੀਆਂ ਨੂੰ ਜ਼ਰੂਰੀ ਸਹਾਇਤਾ ਦਿੱਤੀ ਜਾ ਰਹੀ ਹੈ। ਘਟਨਾ ਦੇ ਕਾਰਨਾਂ ਅਤੇ ਹਾਲਾਤਾਂ ਦੀ ਵਿਸਥਾਰਪੂਰਵਕ ਜਾਂਚ ਜਾਰੀ ਹੈ।
