ਲੱਸੀ-ਛਾਛ ਦੇ ਸਾਹਮਣੇ ਕੋਲਡ ਡਰਿੰਕਸ ਹੋਏ ਫੇਲ੍ਹ, ਵਿਕਰੀ ਵਿੱਚ ਦਰਜ ਕੀਤੀ ਚੌਗੁਣੀ ਗ੍ਰੋਥ

ਦੇਸ਼ ਦੇ 1.1 ਲੱਖ ਕਰੋੜ ਦੇ ਸੌਫਟ ਡਰਿੰਕਸ ਬਾਜ਼ਾਰ ਦਾ ਬਦਲਿਆ ਗਣਿਤ; ਨੌਜਵਾਨਾਂ ਦੀ ਪਹਿਲੀ ਪਸੰਦ ਬਣੇ ਹੈਲਥੀ ਡੇਅਰੀ ਪ੍ਰੋਡਕਟਸ

ਨਵੀਂ ਦਿੱਲੀ:

ਇਸ਼ਤਿਹਾਰ

ਇਸ ਸਾਲ ਦੀ ਰਿਕਾਰਡ ਤੋੜ ਗਰਮੀ ਨੇ ਦੇਸ਼ ਦੇ 1.1 ਲੱਖ ਕਰੋੜ ਰੁਪਏ ਦੇ ਸੌਫਟ ਡਰਿੰਕਸ ਬਾਜ਼ਾਰ ਦਾ ਪੂਰਾ ਗਣਿਤ ਬਦਲ ਕੇ ਰੱਖ ਦਿੱਤਾ ਹੈ। ਕਿਰਾਨਾ ਦੁਕਾਨਾਂ ਦੇ ਫਰਿੱਜਾਂ ਅਤੇ ਕੁਇੱਕ-ਕਾਮਰਸ (Quick-Commerce) ਪਲੇਟਫਾਰਮਾਂ ‘ਤੇ ਹੁਣ ਕੋਲਡ ਡਰਿੰਕਸ ਦੇ ਨਾਲ-ਨਾਲ ਲੱਸੀ, ਛਾਛ ਅਤੇ ਪ੍ਰੋਬਾਇਓਟਿਕ ਡਰਿੰਕਸ ਤੇਜ਼ੀ ਨਾਲ ਆਪਣੀ ਜਗ੍ਹਾ ਬਣਾ ਰਹੇ ਹਨ। ਇਹ ਬਦਲਾਅ ਖਾਸ ਕਰਕੇ ਨੌਜਵਾਨ ਖਪਤਕਾਰਾਂ ਅਤੇ ਸ਼ਹਿਰੀ ਘਰਾਂ ਵਿੱਚ ਦੇਖਣ ਨੂੰ ਮਿਲ ਰਿਹਾ ਹੈ, ਜੋ ਹੁਣ ਕਾਰਬੋਨੇਟਡ (ਗੈਸ ਵਾਲੇ) ਡਰਿੰਕਸ ਦੇ ਮੁਕਾਬਲੇ ਸਿਹਤ ਅਤੇ ਪ੍ਰੋਟੀਨ ਨਾਲ ਭਰਪੂਰ ਡੇਅਰੀ ਪੇਅ ਪਦਾਰਥਾਂ ਨੂੰ ਜ਼ਿਆਦਾ ਤਰਜੀਹ ਦੇ ਰਹੇ ਹਨ।

ਵੱਡੀਆਂ ਡੇਅਰੀ ਕੰਪਨੀਆਂ ਦੀ ਵਿਕਰੀ ਵਿੱਚ ਭਾਰੀ ਉਛਾਲ

ਮਦਰ ਡੇਅਰੀ ਦੇ ਮੈਨੇਜਿੰਗ ਡਾਇਰੈਕਟਰ ਜੈਤੀਰਥ ਚਾਰੀ ਦੇ ਮੁਤਾਬਕ, ਇਸ ਸੀਜ਼ਨ ਵਿੱਚ ਲੱਸੀ ਅਤੇ ਛਾਛ ਵਰਗੇ ਡੇਅਰੀ ਪ੍ਰੋਡਕਟਸ ਨੇ 40% ਤੋਂ ਵੱਧ ਦੀ ਗ੍ਰੋਥ (ਵਾਧਾ) ਦਰਜ ਕੀਤੀ ਹੈ। ਸਿਰਫ਼ ਕੁਇੱਕ-ਕਾਮਰਸ ਪਲੇਟਫਾਰਮਾਂ ‘ਤੇ ਹੀ ਇਸ ਦੀ ਵਿਕਰੀ ਵਿੱਚ ਡਬਲ-ਡਿਜਿਟ ਦਾ ਵਾਧਾ ਦੇਖਿਆ ਜਾ ਰਿਹਾ ਹੈ।

ਦੂਜੇ ਪਾਸੇ, ‘ਹੈਰੀਟੇਜ ਫੂਡਜ਼’ ਦੇ ਸੀਈਓ ਸ਼੍ਰੀਦੀਪ ਕੇਸਵਨ ਦਾ ਕਹਿਣਾ ਹੈ ਕਿ ਕੰਪਨੀ ਦੀ ਕੁੱਲ ਕਮਾਈ (ਰੇਵੇਨਿਊ) ਵਿੱਚ ਡੇਅਰੀ ਬੇਵਰੇਜਿਜ਼ ਦਾ ਯੋਗਦਾਨ ਪਿਛਲੇ ਤਿੰਨ ਸਾਲਾਂ ਵਿੱਚ ਦੁੱਗਣਾ ਹੋ ਚੁੱਕਾ ਹੈ।

2031 ਤੱਕ 4.23 ਲੱਖ ਕਰੋੜ ਦਾ ਹੋ ਜਾਵੇਗਾ ਡੇਅਰੀ ਡਰਿੰਕਸ ਮਾਰਕੀਟ

‘ਪਰਾਗ ਮਿਲਕ ਫੂਡਜ਼’ ਦੀ ਐਗਜ਼ੀਕਿਊਟਿਵ ਡਾਇਰੈਕਟਰ ਅਕਸ਼ਾਲੀ ਸ਼ਾਹ ਨੇ ਉਦਯੋਗ ਦੇ ਭਵਿੱਖ ਬਾਰੇ ਅਹਿਮ ਅੰਕੜੇ ਸਾਂਝੇ ਕੀਤੇ ਹਨ। ਉਨ੍ਹਾਂ ਦੱਸਿਆ ਕਿ ਭਾਰਤ ਦੀ ਪੈਕਡ-ਫੂਡ ਅਤੇ Bੇਵਰੇਜ ਇੰਡਸਟਰੀ ਇਸ ਵੇਲੇ 9.51 ਲੱਖ ਕਰੋੜ ਰੁਪਏ ਦੀ ਹੈ, ਜੋ 2030 ਤੱਕ ਵਧ ਕੇ 14.27 ਲੱਖ ਕਰੋੜ ਰੁਪਏ ਤੱਕ ਪਹੁੰਚ ਜਾਵੇਗੀ। ਇਸ ਦੇ ਨਾਲ ਹੀ ਡੇਅਰੀ ਡਰਿੰਕਸ ਦਾ ਬਾਜ਼ਾਰ 2031 ਤੱਕ 4.23 ਲੱਖ ਕਰੋੜ ਰੁਪਏ ਹੋਣ ਦਾ ਅਨੁਮਾਨ ਹੈ।

ਇਸੇ ਕਾਰਨ ਹੁਣ ਕੰਪਨੀਆਂ ਪ੍ਰੋਟੀਨ, ਹੈਲਥ ਅਤੇ ਵੈਲਨੈਸ ਵਰਗੇ ਪ੍ਰੋਡਕਟਸ ‘ਤੇ ਜ਼ਿਆਦਾ ਫੋਕਸ ਕਰ ਰਹੀਆਂ ਹਨ। ਪਰਾਗ ਕੰਪਨੀ ਦੇ ਇਸ ਬਿਜ਼ਨਸ ਵਿੱਚ ਸਾਲਾਨਾ ਆਧਾਰ ‘ਤੇ 109% ਦੀ ਬੰਪਰ ਗ੍ਰੋਥ ਹੋਈ ਹੈ। ਖਪਤਕਾਰਾਂ ਦੇ ਇਸੇ ਬਦਲਦੇ ਰੁਝਾਨ ਨੂੰ ਦੇਖਦੇ ਹੋਏ ਕੰਪਨੀ ਨੇ ‘ਅਵਤਾਰ ਪ੍ਰੋਟੀਨ ਕੋਲਡ ਕਾਫੀ’ ਵੀ ਲਾਂਚ ਕੀਤੀ ਹੈ, ਜਿਸ ਦੇ ਇੱਕ ਪੈਕ ਵਿੱਚ ਸੁਵਿਧਾ ਦੇ ਨਾਲ-ਨਾਲ 15 ਗ੍ਰਾਮ ਪ੍ਰੋਟੀਨ ਮਿਲਦਾ ਹੈ।

ਲੱਸੀ-ਛਾਛ ਦੀ ਵਿਕਰੀ ਵਧਣ ਦੇ 3 ਮੁੱਖ ਕਾਰਨ:

• ਟੈਕਸ ਦਾ ਵੱਡਾ ਅੰਤਰ: ਦੇਸ਼ ਵਿੱਚ ਕਾਰਬੋਨੇਟਡ ਕੋਲਡ ਡਰਿੰਕਸ ‘ਤੇ 40% ਜੀਐਸਟੀ (GST) ਲੱਗਦਾ ਹੈ, ਜਦਕਿ ਡੇਅਰੀ ਬੇਵਰੇਜਿਜ਼ ‘ਤੇ ਸਿਰਫ਼ 5% ਜੀਐਸਟੀ ਹੈ। ਇਸ 35% ਦੇ ਵੱਡੇ ਫਰਕ ਕਾਰਨ ਡੇਅਰੀ ਕੰਪਨੀਆਂ ਆਪਣੇ ਬਿਹਤਰੀਨ ਪ੍ਰੋਡਕਟਸ ਮਹਿਜ਼ 10 ਰੁਪਏ ਦੀ ਕਿਫਾਇਤੀ ਕੀਮਤ ‘ਤੇ ਵੇਚਣ ਵਿੱਚ ਕਾਮਯਾਬ ਹੋ ਰਹੀਆਂ ਹਨ।
• ਸਿਹਤ ਅਤੇ ਨਿਊਟ੍ਰੀਸ਼ਨ ਪ੍ਰਤੀ ਜਾਗਰੂਕਤਾ: ਕੋਵਿਡ-19 ਮਹਾਮਾਰੀ ਤੋਂ ਬਾਅਦ ਲੋਕ ਸਵਾਦ ਦੇ ਨਾਲ-ਨਾਲ ਸਿਹਤ ਨੂੰ ਲੈ ਕੇ ਬੇਹੱਦ ਗੰਭੀਰ ਹੋ ਗਏ ਹਨ। ਲੱਸੀ ਅਤੇ ਛਾਛ ਪ੍ਰੋਬਾਇਓਟਿਕ (ਪਾਚਨ ਲਈ ਚੰਗੇ) ਅਤੇ ਘੱਟ ਖੰਡ (ਲੋ-ਸ਼ੂਗਰ) ਵਾਲੇ ਹੋਣ ਕਰਕੇ ਇੱਕ ਸਭ ਤੋਂ ‘ਹੈਲਦੀ ਆਲਟਰਨੇਟਿਵ’ (ਸਿਹਤਮੰਦ ਵਿਕਲਪ) ਬਣ ਗਏ ਹਨ।
• ਮਾਡਰਨ ਟ੍ਰੈਡੀਸ਼ਨਲ ਪੈਕੇਜਿੰਗ: ਅੱਜ-ਕੱਲ੍ਹ ਬਾਜ਼ਾਰ ਵਿੱਚ ਸਾਡੇ ਰਵਾਇਤੀ ਪੇਅ ਪਦਾਰਥ ਜਿਵੇਂ ਕਿ ਕੋਕਮ, ਜਲਜੀਰਾ, ਅੰਬ ਪਨਾ ਅਤੇ ਛਾਛ ਹਾਈਜੀਨਿਕ (ਸਾਫ਼-ਸੁਥਰੀ) ਪੈਕੇਜਿੰਗ ਦੇ ਨਾਲ ਨਵੇਂ ਅੰਦਾਜ਼ ਵਿੱਚ ਰੀ-ਐਂਟਰੀ ਕਰ ਚੁੱਕੇ ਹਨ, ਜੋ ਗਾਹਕਾਂ ਨੂੰ ਖਿੱਚ ਰਹੇ ਹਨ।