ਚੰਡੀਗੜ੍ਹ ’ਚ ਮੁਫ਼ਤ ਪੈਟਰੋਲ ਲੰਗਰ ‘ਤੇ ਪ੍ਰਸ਼ਾਸਨ ਦੀ ਰੋਕ, ਜਾਣੋ ਕਦੋਂ ਤੈਅ ਹੋਵੇਗੀ ਨਵੀਂ ਤਾਰੀਖ…

Chandigarh Free Petrol Langar News Upadte; ਚੰਡੀਗੜ੍ਹ ਦੇ ਸੈਕਟਰ-10 ਅਤੇ ਸੈਕਟਰ-7 ਵਿੱਚ ਅੱਜ ਮੁਫ਼ਤ ਪੈਟਰੋਲ ਦਾ ਲੰਗਰ ਨਹੀਂ ਲਗਾਇਆ ਜਾਵੇਗਾ। ਕਾਰੋਬਾਰੀ ਰਾਕੇਸ਼ ਤ੍ਰੇਹਨ ਉਰਫ਼ ‘ਰਾਜਾ ਦੀ ਕਿੰਗ’ ਨੇ ਐਲਾਨ ਕੀਤਾ ਹੈ ਕਿ ਜਦੋਂ ਤੱਕ ਪੁਲਿਸ ਅਤੇ ਪ੍ਰਸ਼ਾਸਨ ਵੱਲੋਂ ਇਸ ਪ੍ਰੋਗਰਾਮ ਨੂੰ ਮਨਜ਼ੂਰੀ ਨਹੀਂ ਮਿਲਦੀ, ਉਦੋਂ ਤੱਕ ਪੈਟਰੋਲ ਵੰਡਣ ਦਾ ਕੰਮ ਸ਼ੁਰੂ ਨਹੀਂ ਕੀਤਾ ਜਾਵੇਗਾ।

ਇਸ਼ਤਿਹਾਰ

ਰਾਕੇਸ਼ ਤ੍ਰੇਹਨ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਫਿਲਹਾਲ ਪੈਟਰੋਲ ਲੈਣ ਲਈ ਕਿਸੇ ਵੀ ਥਾਂ ’ਤੇ ਭੀੜ ਇਕੱਠੀ ਨਾ ਕਰਨ। ਉਨ੍ਹਾਂ ਕਿਹਾ ਕਿ ਲੋਕਾਂ ਦੀ ਸੁਰੱਖਿਆ ਸਭ ਤੋਂ ਪਹਿਲਾਂ ਹੈ ਅਤੇ ਬਿਨਾਂ ਪ੍ਰਬੰਧਾਂ ਦੇ ਵੱਡੀ ਗਿਣਤੀ ਵਿੱਚ ਲੋਕਾਂ ਦਾ ਇਕੱਠ ਹੋਣਾ ਮੁਸ਼ਕਲ ਪੈਦਾ ਕਰ ਸਕਦਾ ਹੈ।

18 ਅਪ੍ਰੈਲ ਨੂੰ ਭਾਰੀ ਭੀੜ ਕਾਰਨ ਵਿਗੜੀ ਸੀ ਸਥਿਤੀ

ਇਸ ਤੋਂ ਪਹਿਲਾਂ 18 ਅਪ੍ਰੈਲ ਨੂੰ ਸੈਕਟਰ-10 ਪੈਟਰੋਲ ਪੰਪ ’ਤੇ ਮੁਫ਼ਤ ਪੈਟਰੋਲ ਦੇ ਲੰਗਰ ਦਾ ਐਲਾਨ ਕੀਤਾ ਗਿਆ ਸੀ। ਜਾਣਕਾਰੀ ਮਿਲਣ ਤੋਂ ਬਾਅਦ ਵੱਡੀ ਗਿਣਤੀ ਵਿੱਚ ਲੋਕ ਆਪਣੇ ਵਾਹਨਾਂ ਸਮੇਤ ਮੌਕੇ ’ਤੇ ਪਹੁੰਚ ਗਏ ਸਨ।

ਆਯੋਜਕਾਂ ਵੱਲੋਂ ਕੂਪਨ ਵੀ ਵੰਡੇ ਗਏ ਸਨ ਅਤੇ ਪੈਟਰੋਲ ਦਾ ਟੈਂਕਰ ਵੀ ਪਹੁੰਚ ਗਿਆ ਸੀ, ਪਰ ਭਾਰੀ ਮੀਂਹ ਅਤੇ ਵਧਦੀ ਭੀੜ ਕਾਰਨ ਪ੍ਰੋਗਰਾਮ ਸ਼ੁਰੂ ਨਹੀਂ ਹੋ ਸਕਿਆ।

ਮੀਂਹ ਦੌਰਾਨ ਕਈ ਲੋਕ ਘੰਟਿਆਂ ਤੱਕ ਕਤਾਰਾਂ ਵਿੱਚ ਖੜ੍ਹੇ ਰਹੇ। ਕਈ ਵਾਹਨ ਪਾਣੀ ਕਾਰਨ ਰਸਤੇ ਵਿੱਚ ਹੀ ਬੰਦ ਹੋ ਗਏ, ਜਿਸ ਕਾਰਨ ਟ੍ਰੈਫਿਕ ਵਿਵਸਥਾ ਪ੍ਰਭਾਵਿਤ ਹੋਈ।

ਸੈਕਟਰ-10 ’ਚ ਲੱਗਿਆ ਸੀ ਭਾਰੀ ਜਾਮ

ਮੁਫ਼ਤ ਪੈਟਰੋਲ ਲੈਣ ਲਈ ਵੱਡੀ ਗਿਣਤੀ ਵਿੱਚ ਪਹੁੰਚੇ ਵਾਹਨਾਂ ਕਾਰਨ ਸੈਕਟਰ-10 ਇਲਾਕੇ ਵਿੱਚ ਲੰਮਾ ਜਾਮ ਲੱਗ ਗਿਆ ਸੀ। ਸਥਿਤੀ ਨੂੰ ਕਾਬੂ ਕਰਨ ਲਈ ਸੈਕਟਰ-3 ਥਾਣਾ ਪੁਲਿਸ ਮੌਕੇ ’ਤੇ ਪਹੁੰਚੀ ਸੀ।

ਪੁਲਿਸ ਨੇ ਆਯੋਜਕ ਰਾਕੇਸ਼ ਤ੍ਰੇਹਨ ਨੂੰ ਥਾਣੇ ਲਿਜਾ ਕੇ ਸਮਝਾਇਆ ਸੀ ਕਿ ਬਿਨਾਂ ਪ੍ਰਸ਼ਾਸਨਿਕ ਮਨਜ਼ੂਰੀ ਅਤੇ ਢੁੱਕਵੇਂ ਪ੍ਰਬੰਧਾਂ ਦੇ ਇੰਨੀ ਵੱਡੀ ਭੀੜ ਇਕੱਠੀ ਕਰਨਾ ਖ਼ਤਰਨਾਕ ਹੋ ਸਕਦਾ ਹੈ।

ਹੁਣ ਰਾਕੇਸ਼ ਤ੍ਰੇਹਨ ਨੇ ਸਪੱਸ਼ਟ ਕੀਤਾ ਹੈ ਕਿ ਪ੍ਰਸ਼ਾਸਨ ਦੀ ਮਨਜ਼ੂਰੀ ਮਿਲਣ ਤੋਂ ਬਾਅਦ ਹੀ ਮੁਫ਼ਤ ਪੈਟਰੋਲ ਲੰਗਰ ਦੀ ਨਵੀਂ ਤਾਰੀਖ ਦਾ ਐਲਾਨ ਕੀਤਾ ਜਾਵੇਗਾ।