15 ਦਿਨਾਂ ਤੋਂ ਮਲੇਸ਼ੀਆ ‘ਚ ਫਸਿਆ ਆਕਾਸ਼ ਪਰਤਿਆ ਘਰ, ਸੰਤ ਸੀਚੇਵਾਲ ਦੇ ਯਤਨ ਲਿਆਏ ਰੰਗ
ਜਲੰਧਰ ਦਾ ਨੌਜਵਾਨ ਆਕਾਸ਼ ਜੋ ਲਗਭਗ 15 ਦਿਨਾਂ ਤੋਂ ਮਲੇਸ਼ੀਆ ‘ਚ ਫਸਿਆ ਹੋਇਆ ਸੀ, ਆਖਰਕਾਰ ਸੁਰੱਖਿਅਤ ਭਾਰਤ ਵਾਪਸ ਆ ਗਿਆ ਹੈ। ਰਾਜ ਸਭਾ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ ਦੇ ਯਤਨਾਂ ਨਾਲ ਉਸ ਦੀ ਵਾਪਸੀ ਸੰਭਵ ਹੋਈ। ਭਾਰਤ ਪਹੁੰਚਣ ‘ਤੇ ਆਕਾਸ਼ ਦੇ ਪਰਿਵਾਰ ਨੇ ਸਾਂਸਦ ਸੀਚੇਵਾਲ ਨਾਲ ਮੁਲਾਕਾਤ ਕਰਕੇ ਉਨ੍ਹਾਂ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਉਹ ਉਨ੍ਹਾਂ ਦੇ ਮੁਸ਼ਕਲ ਸਮੇਂ ‘ਚ ਪਰਿਵਾਰ ਦੇ ਨਾਲ ਖੜ੍ਹਾ ਹੋਏ।
ਆਕਾਸ਼ ਦੇ ਪਰਿਵਾਰ ਨੇ ਦੱਸਿਆ ਕਿ ਘਰ ਦਾ ਮਾਹੌਲ ਬਹੁਤ ਤਣਾਅਪੂਰਨ ਹੋ ਗਿਆ ਸੀ, ਕਿਉਂਕਿ ਉਨ੍ਹਾਂ ਦਾ ਪੁੱਤਰ ਕਈ ਦਿਨਾਂ ਤੱਕ ਵਿਦੇਸ਼ ‘ਚ ਫਸਿਆ ਰਿਹਾ। ਉਨ੍ਹਾਂ ਦੀਆਂ ਉਮੀਦਾਂ ਘੱਟ ਰਹੀਆਂ ਸਨ, ਪਰ ਸਾਂਸਦ ਸੀਚੇਵਾਲ ਦੀ ਪਹਿਲਕਦਮੀ ਤੇ ਨਿਰੰਤਰ ਯਤਨਾਂ ਸਦਕਾ, ਉਨ੍ਹਾਂ ਦਾ ਪੁੱਤਰ ਸੁਰੱਖਿਅਤ ਤੇ ਤੰਦਰੁਸਤ ਘਰ ਵਾਪਸ ਆ ਗਿਆ।
ਆਕਾਸ਼ ਨਿਊਜ਼ੀਲੈਂਡ ਤੋਂ ਭਾਰਤ ਵਾਪਸ ਆ ਰਿਹਾ ਸੀ। ਹਾਲਾਂਕਿ, ਯਾਤਰਾ ਦੌਰਾਨ ਦਸਤਾਵੇਜ਼ੀ ਪ੍ਰਕਿਰਿਆ ਦੌਰਾਨ ਆਈਆਂ ਪੇਚੀਦਗੀਆਂ ਕਾਰਨ, ਉਹ ਮਲੇਸ਼ੀਆ ਪਹੁੰਚ ਗਿਆ, ਜਿੱਥੇ ਉਸ ਨੂੰ ਕਈ ਦਿਨਾਂ ਲਈ ਹਵਾਈ ਅੱਡੇ ‘ਤੇ ਰਹਿਣ ਲਈ ਮਜਬੂਰ ਹੋਣਾ ਪਿਆ। ਇਸ ਤੋਂ ਬਾਅਦ, ਉਸ ਨੂੰ ਇੱਕ ਨਜ਼ਰਬੰਦੀ ਕੇਂਦਰ ‘ਚ ਵੀ ਰੱਖਿਆ ਗਿਆ।
ਭਾਰਤ ਵਾਪਸ ਆਉਣ ਤੋਂ ਬਾਅਦ, ਆਕਾਸ਼ ਨੇ ਉਨ੍ਹਾਂ ਬਹੁਤ ਮੁਸ਼ਕਲ ਹਾਲਾਤਾਂ ਨੂੰ ਯਾਦ ਕੀਤਾ ਜੋ ਉਸ ਨੂੰ ਸਹਿਣ ਕਰਨੇ ਪਏ ਸਨ। ਉਸ ਨੇ ਹਵਾਈ ਅੱਡੇ ‘ਤੇ ਕਈ ਦਿਨ ਬਿਤਾਏ ਤੇ ਕਾਫ਼ੀ ਮਾਨਸਿਕ ਪ੍ਰੇਸ਼ਾਨੀ ਦਾ ਸਾਹਮਣਾ ਕੀਤਾ। ਨੌਜਵਾਨ ਨੇ ਕਿਹਾ ਕਿ ਅਜਿਹੀਆਂ ਸਥਿਤੀਆਂ ‘ਚ ਵਿਦੇਸ਼ਾਂ ‘ਚ ਫਸੇ ਭਾਰਤੀਆਂ ਲਈ ਸਹਾਇਤਾ ਪ੍ਰਣਾਲੀ ਨੂੰ ਹੋਰ ਮਜ਼ਬੂਤ ਕਰਨ ਦੀ ਜ਼ਰੂਰਤ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਕਿਸੇ ਹੋਰ ਨੂੰ ਅਜਿਹੀਆਂ ਮੁਸ਼ਕਲਾਂ ‘ਚੋਂ ਨਾ ਗੁਜ਼ਰਨਾ ਪਵੇ।
ਪਰਿਵਾਰ ਨੇ ਕੇਂਦਰ ਸਰਕਾਰ ਤੇ ਸੰਬੰਧਿਤ ਏਜੰਸੀਆਂ ਨੂੰ ਇਹ ਵੀ ਅਪੀਲ ਕੀਤੀ ਕਿ ਉਹ ਵਿਦੇਸ਼ਾਂ ‘ਚ ਆਪਣੇ ਆਪ ਨੂੰ ਮੁਸੀਬਤ ‘ਚ ਪਾਉਣ ਵਾਲੇ ਭਾਰਤੀਆਂ ਦੀ ਸਹਾਇਤਾ ਲਈ ਤੇਜ਼ੀ ਨਾਲ ਕਾਰਵਾਈ ਕਰਨ।
