ਚੰਡੀਗੜ੍ਹ ਹੈੱਡ ਕਾਂਸਟੇਬਲ ਕਤਲ ਮਾਮਲਾ: ਤੀਜਾ ਮੁਲਜ਼ਮ ਵੀ ਗ੍ਰਿਫ਼ਤਾਰ
- ਦੋਸਤ ਨੇ ਦਿਵਾਇਆ ਸੀ ਦੇਸੀ ਕੱਟਾ
Chandigarh Head Constable murder case: ਚੰਡੀਗੜ੍ਹ: ਸੈਕਟਰ-22 ਵਿੱਚ ਹੈੱਡ ਕਾਂਸਟੇਬਲ ਨਿਤਿਨ ਦੀ ਹੱਤਿਆ ਦੇ ਮਾਮਲੇ ਵਿੱਚ ਪੁਲਿਸ ਨੇ ਤੀਜੇ ਮੁਲਜ਼ਮ ਲਕਸ਼ੈ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਿਸ ਮੁਤਾਬਕ ਲਕਸ਼ੈ ਮੁੱਖ ਮੁਲਜ਼ਮ ਅਰਮਾਨ ਦਾ ਦੋਸਤ ਹੈ ਅਤੇ ਉਸ ਨੇ ਹੀ ਉਸ ਨੂੰ ਦੇਸੀ ਕੱਟਾ ਦਿਵਾਉਣ ਵਿੱਚ ਮਦਦ ਕੀਤੀ ਸੀ। ਲਕਸ਼ੈ ਕੋਲੋਂ ਵੀ ਇੱਕ ਦੇਸੀ ਕੱਟਾ ਅਤੇ ਕਾਰਤੂਸ ਬਰਾਮਦ ਹੋਏ ਹਨ। ਇਸ ਮਾਮਲੇ ਵਿੱਚ ਪੁਲਿਸ ਪਹਿਲਾਂ ਅਰਮਾਨ ਅਤੇ ਉਸ ਨੂੰ ਦੇਸੀ ਕੱਟਾ ਵੇਚਣ ਦੇ ਦੋਸ਼ ਹੇਠ ਮੁਹੰਮਦ ਸ਼ਾਹਿਦ ਨੂੰ ਗ੍ਰਿਫ਼ਤਾਰ ਕਰ ਚੁੱਕੀ ਹੈ। ਸ਼ੁੱਕਰਵਾਰ ਨੂੰ ਤਿੰਨਾਂ ਮੁਲਜ਼ਮਾਂ ਨੂੰ ਡਿਊਟੀ ਮੈਜਿਸਟ੍ਰੇਟ ਦੀ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੋਂ ਉਨ੍ਹਾਂ ਨੂੰ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ।
ਪੁਲਿਸ ਅਨੁਸਾਰ ਪੁੱਛਗਿੱਛ ਪੂਰੀ ਹੋਣ ਤੋਂ ਬਾਅਦ ਹੁਣ ਚਾਰਜਸ਼ੀਟ ਤਿਆਰ ਕਰਨ ਲਈ ਅਗਲੀ ਜਾਂਚ ਕੀਤੀ ਜਾ ਰਹੀ ਹੈ। ਤਿੰਨਾਂ ਦੇ ਮੋਬਾਈਲ ਫੋਨ ਜ਼ਬਤ ਕਰਕੇ ਕਾਲ ਡਿਟੇਲ ਰਿਕਾਰਡ ਦੀ ਜਾਂਚ ਕੀਤੀ ਜਾ ਰਹੀ ਹੈ, ਤਾਂ ਜੋ ਉਨ੍ਹਾਂ ਦੇ ਆਪਸੀ ਸੰਪਰਕਾਂ ਬਾਰੇ ਸਬੂਤ ਇਕੱਠੇ ਕੀਤੇ ਜਾ ਸਕਣ।
ਕਤਲ ਤੋਂ ਬਾਅਦ ਟਿਕਾਣੇ ਬਦਲ ਰਿਹਾ ਸੀ ਲਕਸ਼ੈ
ਪੁਲਿਸ ਅਧਿਕਾਰੀਆਂ ਮੁਤਾਬਕ ਲਕਸ਼ੈ ਰਾਮਦਰਬਾਰ ਦਾ ਰਹਿਣ ਵਾਲਾ ਹੈ ਅਤੇ ਅਰਮਾਨ ਨਾਲ ਨੌਵੀਂ ਜਮਾਤ ਤੱਕ ਪੜ੍ਹਿਆ ਹੈ। ਦੋਵੇਂ ਲੰਬੇ ਸਮੇਂ ਤੋਂ ਦੋਸਤ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਵਾਰਦਾਤ ਤੋਂ ਬਾਅਦ ਲਕਸ਼ੈ ਲਗਾਤਾਰ ਆਪਣੇ ਟਿਕਾਣੇ ਬਦਲ ਰਿਹਾ ਸੀ। ਵੀਰਵਾਰ ਨੂੰ ਗੁਪਤ ਸੂਚਨਾ ਦੇ ਆਧਾਰ ’ਤੇ ਉਸ ਨੂੰ ਕਾਬੂ ਕੀਤਾ ਗਿਆ। ਪੁਲਿਸ ਅਨੁਸਾਰ ਲਕਸ਼ੈ ਕੋਲੋਂ ਮਿਲਿਆ ਦੇਸੀ ਕੱਟਾ ਵੀ ਹਰਿਦੁਆਰ ਵਿੱਚ ਮੁਹੰਮਦ ਸ਼ਾਹਿਦ ਤੋਂ ਖਰੀਦਿਆ ਗਿਆ ਸੀ।
ਤਿੰਨਾਂ ਨੇ ਪੁੱਛਗਿੱਛ ਦੌਰਾਨ ਕੀ ਦੱਸਿਆ ?
ਅਰਮਾਨ ਦਾ ਦਾਅਵਾ: ਪੁਲਿਸ ਮੁਤਾਬਕ ਅਰਮਾਨ ਨੇ ਦੱਸਿਆ ਕਿ ਉਹ ਆਪਣੇ ਮਾਪਿਆਂ ਦੀ ਹੱਤਿਆ ਦੀ ਯੋਜਨਾ ਬਣਾਉਣ ਤੋਂ ਬਾਅਦ ਕਰੀਬ ਇੱਕ ਹਫ਼ਤਾ ਪਹਿਲਾਂ ਇਕੱਲਾ ਹਰਿਦੁਆਰ ਗਿਆ ਸੀ। ਉੱਥੇ ਉਸ ਨੇ ਮੁਹੰਮਦ ਸ਼ਾਹਿਦ ਤੋਂ 11 ਹਜ਼ਾਰ ਰੁਪਏ ਵਿੱਚ ਦੇਸੀ ਕੱਟਾ ਖਰੀਦਿਆ ਸੀ। ਉਸ ਨੇ ਸ਼ਾਹਿਦ ਬਾਰੇ ਆਪਣੇ ਜਮਾਤੀ ਲਕਸ਼ੈ ਤੋਂ ਜਾਣਕਾਰੀ ਮਿਲਣ ਦੀ ਗੱਲ ਕਹੀ।
ਮੁਹੰਮਦ ਸ਼ਾਹਿਦ ਦਾ ਦਾਅਵਾ: ਸ਼ਾਹਿਦ ਨੇ ਪੁੱਛਗਿੱਛ ਦੌਰਾਨ ਦੱਸਿਆ ਕਿ ਕੁਝ ਮਹੀਨੇ ਪਹਿਲਾਂ ਲਕਸ਼ੈ ਅਰਮਾਨ ਨੂੰ ਆਪਣੇ ਨਾਲ ਹਰਿਦੁਆਰ ਲੈ ਕੇ ਆਇਆ ਸੀ। ਉਸ ਸਮੇਂ ਲਕਸ਼ੈ ਨੇ ਉਸ ਤੋਂ 12 ਹਜ਼ਾਰ ਰੁਪਏ ਵਿੱਚ ਦੇਸੀ ਕੱਟਾ ਅਤੇ ਕਾਰਤੂਸ ਖਰੀਦੇ ਸਨ।
ਲਕਸ਼ੈ ਦਾ ਦਾਅਵਾ: ਲਕਸ਼ੈ ਨੇ ਕਿਹਾ ਕਿ ਉਸ ਨੂੰ ਅਰਮਾਨ ਵੱਲੋਂ ਆਪਣੇ ਪਿਤਾ ਦੀ ਹੱਤਿਆ ਦੀ ਯੋਜਨਾ ਬਣਾਉਣ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ ਅਤੇ ਉਸ ਨੂੰ ਇਸ ਬਾਰੇ ਵਾਰਦਾਤ ਤੋਂ ਬਾਅਦ ਪਤਾ ਲੱਗਾ।
ਪੁਲਿਸ ਅਨੁਸਾਰ ਮੁੱਖ ਮੁਲਜ਼ਮ ਅਰਮਾਨ ਖ਼ਿਲਾਫ਼ ਹੱਤਿਆ ਨਾਲ ਸਬੰਧਤ ਸਬੂਤ ਇਕੱਠੇ ਕੀਤੇ ਗਏ ਹਨ। ਮਾਮਲੇ ਵਿੱਚ ਉਸ ਦੀ ਮਾਂ ਨੂੰ ਚਸ਼ਮਦੀਦ ਗਵਾਹ ਦੱਸਿਆ ਜਾ ਰਿਹਾ ਹੈ।
