ਮੋਬਾਈਲ ਰੀਚਾਰਜ ਨਿਯਮਾਂ ’ਚ ਬਦਲਾਅ: ਰਾਘਵ ਚੱਢਾ ਨੇ ਕੀਤਾ ਸਵਾਗਤ
Changes in mobile recharge rules: ਨਵੀਂ ਦਿੱਲੀ: ਆਮ ਆਦਮੀ ਪਾਰਟੀ ਦੇ ਰਾਜ ਸਭਾ ਸੰਸਦ ਮੈਂਬਰ ਰਾਘਵ ਚੱਢਾ ਨੇ ਭਾਰਤ ਵਿੱਚ ਪ੍ਰੀਪੇਡ ਮੋਬਾਈਲ ਯੂਜ਼ਰਾਂ ਲਈ ਨਵੇਂ ਰੀਚਾਰਜ ਨਿਯਮਾਂ ਨੂੰ ਲੈ ਕੇ ਸਰਕਾਰ ਦੇ ਫੈਸਲੇ ਦਾ ਸਵਾਗਤ ਕੀਤਾ ਹੈ। ਚੱਢਾ ਨੇ ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਕਿਹਾ ਕਿ ਨਵੇਂ ਨਿਯਮਾਂ ਤਹਿਤ ਖਪਤਕਾਰਾਂ ਨੂੰ 30 ਦਿਨਾਂ ਵਾਲੇ ਰੀਚਾਰਜ ਪਲਾਨ, ਸਿਰਫ਼ ਵੌਇਸ ਅਤੇ SMS ਵਾਲੇ ਪਲਾਨ ਅਤੇ ਘੱਟ ਬਜਟ ਵਾਲੇ ਗਾਹਕਾਂ ਲਈ ਹੋਰ ਢੁੱਕਵੇਂ ਵਿਕਲਪ ਮਿਲਣਗੇ।
ਉਨ੍ਹਾਂ ਮੁਤਾਬਕ, 30 ਦਿਨਾਂ ਦੀ ਵੈਧਤਾ ਵਾਲੇ ਪਲਾਨ ਨਾਲ ਸਾਲ ਵਿੱਚ 13 ਦੀ ਬਜਾਏ 12 ਮਹੀਨਾਵਾਰ ਰੀਚਾਰਜ ਕਰਨ ਦੀ ਲੋੜ ਪਵੇਗੀ। ਇਸ ਤੋਂ ਇਲਾਵਾ, ਜਿਨ੍ਹਾਂ ਲੋਕਾਂ ਨੂੰ ਮੋਬਾਈਲ ਡਾਟਾ ਦੀ ਲੋੜ ਨਹੀਂ, ਉਹ ਸਿਰਫ਼ ਕਾਲ ਅਤੇ SMS ਵਾਲੇ ਪਲਾਨ ਚੁਣ ਸਕਣਗੇ।
ਰਾਘਵ ਚੱਢਾ ਨੇ ਕਿਹਾ ਕਿ ਕਈ ਲੋਕਾਂ ਨੇ ਉਨ੍ਹਾਂ ਨਾਲ ਰੀਚਾਰਜ ਪਲਾਨਾਂ ਵਿੱਚ ਸੀਮਤ ਅਤੇ ਘੱਟ ਲਚਕੀਲੇ ਵਿਕਲਪਾਂ ਬਾਰੇ ਆਪਣੀਆਂ ਚਿੰਤਾਵਾਂ ਸਾਂਝੀਆਂ ਕੀਤੀਆਂ ਸਨ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ 11 ਮਾਰਚ ਨੂੰ ਸੰਸਦ ਵਿੱਚ ਇਹ ਮੁੱਦਾ ਚੁੱਕਦਿਆਂ ਖਪਤਕਾਰਾਂ ਲਈ ਵਧੇਰੇ ਵਿਕਲਪ ਅਤੇ ਕਿਫਾਇਤੀ ਪਲਾਨਾਂ ਦੀ ਮੰਗ ਕੀਤੀ ਸੀ।
ਚੱਢਾ ਨੇ ਸਰਕਾਰ ਅਤੇ TRAI ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਨਵੇਂ ਨਿਯਮ ਖਪਤਕਾਰਾਂ ਦੀ ਸਹੂਲਤ ਅਤੇ ਚੋਣ ਦੇ ਵਿਕਲਪ ਵਧਾਉਣ ਨਾਲ ਸਬੰਧਤ ਚਿੰਤਾਵਾਂ ਨੂੰ ਹੱਲ ਕਰਨ ਵੱਲ ਕਦਮ ਹਨ।
