IPL ਤੋਂ ਸੰਨਿਆਸ ਮਗਰੋਂ CSK ਨੇ ਧੋਨੀ ਨੂੰ ਦਿੱਤੀ ਖ਼ਾਸ ਵਿਦਾਇਗੀ
- ‘ਥਾਲਾ ਫਾਰਐਵਰ’ ਦੇ ਸੰਦੇਸ਼ ਨਾਲ ਚੇਨਈ ਦਾ ਅਸਮਾਨ ਹੋਇਆ ਰੌਸ਼ਨ;
- IPL 2027 ਤੋਂ ਪਹਿਲਾਂ ਟੀਮ ਮੈਂਟਰ ਦੀ ਨਵੀਂ ਭੂਮਿਕਾ ਸੰਭਾਲਣਗੇ ਧੋਨੀ
ਚੇਨਈ: ਚੇਨਈ ਸੁਪਰ ਕਿੰਗਜ਼ (CSK) ਨੇ ਆਪਣੇ ਸਾਬਕਾ ਕਪਤਾਨ ਅਤੇ ਦਿੱਗਜ ਕ੍ਰਿਕਟਰ ਮਹਿੰਦਰ ਸਿੰਘ ਧੋਨੀ ਨੂੰ IPL ਤੋਂ ਸੰਨਿਆਸ ਲੈਣ ਮਗਰੋਂ ਸ਼ਾਨਦਾਰ ਡਰੋਨ ਸ਼ੋਅ ਰਾਹੀਂ ਸਨਮਾਨ ਦਿੱਤਾ। ਟੀਮ ਦੇ ਚਹੇਤੇ ਖਿਡਾਰੀ ਧੋਨੀ, ਜਿਨ੍ਹਾਂ ਨੂੰ ਪ੍ਰਸ਼ੰਸਕ ਪਿਆਰ ਨਾਲ ‘ਥਾਲਾ’ ਕਹਿੰਦੇ ਹਨ, ਹੁਣ IPL 2027 ਤੋਂ ਪਹਿਲਾਂ ਟੀਮ ਮੈਂਟਰ ਦੀ ਨਵੀਂ ਭੂਮਿਕਾ ਵਿੱਚ ਨਜ਼ਰ ਆਉਣਗੇ।
ਸਾਲ 2008 ਵਿੱਚ IPL ਦੇ ਪਹਿਲੇ ਸੀਜ਼ਨ ਨਾਲ ਸ਼ੁਰੂ ਹੋਇਆ ਧੋਨੀ ਦਾ ਖੇਡ ਸਫ਼ਰ ਹੁਣ ਸਮਾਪਤ ਹੋ ਗਿਆ ਹੈ। ਕਰੀਬ 17 ਸੀਜ਼ਨਾਂ ਤੱਕ ਆਪਣੀ ਕਪਤਾਨੀ, ਸ਼ਾਨਦਾਰ ਵਿਕਟਕੀਪਿੰਗ ਅਤੇ ਮੈਚ ਜਿਤਾਉਣ ਵਾਲੀ ਬੱਲੇਬਾਜ਼ੀ ਨਾਲ ਉਨ੍ਹਾਂ ਨੇ ਕ੍ਰਿਕਟ ਜਗਤ ਵਿੱਚ ਵੱਖਰੀ ਪਛਾਣ ਬਣਾਈ।
CSK ਵੱਲੋਂ ਕਰਵਾਏ ਗਏ ਇਸ ਡਰੋਨ ਸ਼ੋਅ ਦਾ ਸਿੱਧਾ ਪ੍ਰਸਾਰਣ ਟੀਮ ਦੇ ਇੰਸਟਾਗ੍ਰਾਮ ਪੇਜ ’ਤੇ ਵੀ ਕੀਤਾ ਗਿਆ। ਇਸ ਦੌਰਾਨ ਚੇਨਈ ਦੇ ਅਸਮਾਨ ਵਿੱਚ ਧੋਨੀ ਦੇ ਚਿਹਰੇ, ਉਨ੍ਹਾਂ ਦੇ ਮਸ਼ਹੂਰ ਹੈਲੀਕਾਪਟਰ ਸ਼ਾਟ ਅਤੇ ਤੇਜ਼ ਸਟੰਪਿੰਗ ਦੀਆਂ ਤਸਵੀਰਾਂ ਬਣਾਈਆਂ ਗਈਆਂ।
ਇਸ ਤੋਂ ਇਲਾਵਾ ਧੋਨੀ ਦੀ ਜਰਸੀ ਦੇ ਨੰਬਰ 7 ਅਤੇ ‘ਥਾਲਾ ਫਾਰਐਵਰ’ ਦਾ ਸੰਦੇਸ਼ ਵੀ ਡਰੋਨ ਰਾਹੀਂ ਦਿਖਾਇਆ ਗਿਆ। ਇਸ ਖ਼ਾਸ ਅੰਦਾਜ਼ ਵਿੱਚ CSK ਨੇ ਆਪਣੇ ਦਿੱਗਜ ਖਿਡਾਰੀ ਦੇ ਯੋਗਦਾਨ ਨੂੰ ਯਾਦ ਕੀਤਾ।