ਪਾਕਿਸਤਾਨ ‘ਚ ਬੈਠੇ 23 ਹੋਰ ਵਿਅਕਤੀ ‘ਦਹਿਸ਼ਤਗਰਦ’ ਐਲਾਨੇ, ਸੂਚੀ ‘ਚ ਸ਼ਾਮਲ ਹੋਏ 80 ਨਾਂ
ਗ੍ਰਹਿ ਮੰਤਰਾਲੇ ਨੇ ਯੂ.ਏ.ਪੀ.ਏ. (UAPA) ਤਹਿਤ ਜਾਰੀ ਕੀਤੇ ਹੁਕਮ, ਲਸ਼ਕਰ ਅਤੇ ਜੈਸ਼-ਏ-ਮੁਹੰਮਦ ਦੇ ਕਈ ਖ਼ਤਰਨਾਕ ਅੱਤਵਾਦੀ ਸ਼ਾਮਲ
ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਕਿਹਾ- ਅੱਤਵਾਦ ਵਿਰੁੱਧ ਜ਼ੀਰੋ ਟਾਲਰੈਂਸ ਨੀਤੀ ਤਹਿਤ ਲਿਆ ਇਤਿਹਾਸਕ ਫ਼ੈਸਲਾ, 17 ਪਾਕਿਸਤਾਨੀ ਤੇ 6 ਭਾਰਤੀ ਨਾਗਰਿਕ
ਨਵੀਂ ਦਿੱਲੀ (05 ਜੁਲਾਈ, 2026):
ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਅੱਤਵਾਦ ਖ਼ਿਲਾਫ਼ ਇੱਕ ਹੋਰ ਵੱਡੀ ਕਾਰਵਾਈ ਕਰਦਿਆਂ ਸ਼ਨੀਵਾਰ ਨੂੰ ਗ਼ੈਰ-ਕਾਨੂੰਨੀ ਗਤੀਵਿਧੀਆਂ (ਰੋਕੂ) ਐਕਟ — ਯੂ.ਏ.ਪੀ.ਏ. (UAPA) ਤਹਿਤ ਪਾਕਿਸਤਾਨ ਅਤੇ ਮਕਬੂਜ਼ਾ ਕਸ਼ਮੀਰ (PoK) ਵਿੱਚ ਸਰਗਰਮ 23 ਹੋਰ ਵਿਅਕਤੀਆਂ ਨੂੰ ਅਧਿਕਾਰਤ ਤੌਰ ‘ਤੇ ‘ਦਹਿਸ਼ਤਗਰਦ’ ਐਲਾਨ ਦਿੱਤਾ ਹੈ। ਇਨ੍ਹਾਂ ਵਿੱਚ ਲਸ਼ਕਰ-ਏ-ਤਇਬਾ ਦੇ ਬਾਨੀ ਹਾਫ਼ਿਜ਼ ਮੁਹੰਮਦ ਸਈਦ ਦੇ ਕਈ ਨੇੜਲੇ ਸਾਥੀ ਅਤੇ ਜੈਸ਼-ਏ-ਮੁਹੰਮਦ ਨਾਲ ਜੁੜੇ ਕਈ ਖ਼ਤਰਨਾਕ ਅੱਤਵਾਦੀ ਸ਼ਾਮਲ ਹਨ। ਇਸ ਨਵੀਂ ਸੂਚੀ ਦੇ ਜਾਰੀ ਹੋਣ ਨਾਲ ਯੂ.ਏ.ਪੀ.ਏ. ਤਹਿਤ ਨਾਮਜ਼ਦ ਦਹਿਸ਼ਤਗਰਦਾਂ ਦੀ ਕੁੱਲ ਗਿਣਤੀ ਹੁਣ 80 ਹੋ ਗਈ ਹੈ।
ਅਮਿਤ ਸ਼ਾਹ ਨੇ ਕਿਹਾ- ਭਾਰਤ ਵਿਰੋਧੀ ਗਤੀਵਿਧੀਆਂ ਬਰਦਾਸ਼ਤ ਨਹੀਂ
ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ (X) ‘ਤੇ ਇਸ ਸਬੰਧੀ ਜਾਣਕਾਰੀ ਸਾਂਝੀ ਕਰਦਿਆਂ ਲਿਖਿਆ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ‘ਅੱਤਵਾਦ ਨੂੰ ਬਿਲਕੁਲ ਵੀ ਬਰਦਾਸ਼ਤ ਨਾ ਕਰਨ’ (Zero Tolerance against Terrorism) ਦੇ ਨਜ਼ਰੀਏ ਨੂੰ ਅੱਗੇ ਵਧਾਉਂਦਿਆਂ ਇਹ ਫ਼ੈਸਲਾ ਲਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਸਾਰੇ ਦਹਿਸ਼ਤਗਰਦ ਭਾਰਤ ਵਿਰੋਧੀ ਗਤੀਵਿਧੀਆਂ, ਜੰਮੂ-ਕਸ਼ਮੀਰ ਵਿੱਚ ਸੁਰੱਖਿਆ ਬਲਾਂ ‘ਤੇ ਹਮਲੇ, ਸਰਹੱਦ ਪਾਰ ਤੋਂ ਘੁਸਪੈਠ, ਡਰੋਨਾਂ ਰਾਹੀਂ ਹਥਿਆਰਾਂ ਦੀ ਤਸਕਰੀ, ਅੱਤਵਾਦੀ ਫੰਡਿੰਗ ਅਤੇ ਸੋਸ਼ਲ ਮੀਡੀਆ ਜ਼ਰੀਏ ਭਾਰਤੀ ਨੌਜਵਾਨਾਂ ਨੂੰ ਕੱਟੜਪੰਥੀ ਬਣਾ ਕੇ ਅੱਤਵਾਦੀ ਜਥੇਬੰਦੀਆਂ ‘ਚ ਭਰਤੀ ਕਰਨ ਵਰਗੇ ਗੰਭੀਰ ਅਪਰਾਧਾਂ ਵਿੱਚ ਸ਼ਾਮਲ ਰਹੇ ਹਨ।
17 ਪਾਕਿਸਤਾਨੀ ਅਤੇ 6 ਭਾਰਤੀ ਨਾਗਰਿਕ ਸ਼ਾਮਲ
ਸਰਕਾਰੀ ਹੁਕਮਾਂ ਮੁਤਾਬਕ ਨਾਮਜ਼ਦ ਕੀਤੇ ਗਏ ਇਨ੍ਹਾਂ 23 ਖ਼ਤਰਨਾਕ ਵਿਅਕਤੀਆਂ ਵਿੱਚੋਂ 17 ਪਾਕਿਸਤਾਨੀ ਨਾਗਰਿਕ ਹਨ ਜਦਕਿ 6 ਭਾਰਤੀ ਨਾਗਰਿਕ ਹਨ। ਹਾਲਾਂਕਿ, ਮੌਜੂਦਾ ਸਮੇਂ ਇਹ ਸਾਰੇ ਦੇ ਸਾਰੇ ਪਾਕਿਸਤਾਨ ਅਤੇ ਮਕਬੂਜ਼ਾ ਕਸ਼ਮੀਰ ਦੀ ਧਰਤੀ ਤੋਂ ਭਾਰਤ ਖ਼ਿਲਾਫ਼ ਦਹਿਸ਼ਤੀ ਗਤੀਵਿਧੀਆਂ ਦਾ ਸੰਚਾਲਨ ਕਰ ਰਹੇ ਹਨ।
ਯੂ.ਏ.ਪੀ.ਏ. (UAPA) ਤਹਿਤ ਅੱਤਵਾਦੀ ਐਲਾਨੇ ਗਏ 23 ਵਿਅਕਤੀਆਂ ਦੀ ਸੂਚੀ:
- ਮਸੂਦ ਇਲਿਆਸ ਕਸ਼ਮੀਰੀ (Masood Ilyas Kashmiri)
- ਮੁਹੰਮਦ ਮੁਸਾਦਿਕ (Mohammad Mussadiq)
- ਮੁਫ਼ਤੀ ਮੁਹੰਮਦ ਅਸਗਰ ਖਾਨ (Mufti Muhammad Asghar Khan)
- ਹਾਫ਼ਿਜ਼ ਅਬਦੁਲ ਸ਼ਕੂਰ (Hafiz Abdul Shakoor)
- ਅਬਦੁੱਲਾ ਜੇਹਾਦੀ (Abdullah Jehadi)
- ਫਿਰਦੌਸ ਅਹਿਮਦ ਭੱਟ (Firdous Ahmad Bhat)
- ਗੁਲਾਮ ਫਰੀਦ (Ghulam Fareed)
- ਬਿਲਾਲ ਅਹਿਮਦ ਮੀਰ (Bilal Ahmad Mir)
- ਆਬਿਦ ਕ਼ਯੂਮ ਲੋਨ (Abid Quyoom Lone)
- ਨਜ਼ੀਰ ਅਹਿਮਦ ਗੁੱਜਰ (Nazir Ahmed Gujjar)
- ਅਬਦੁਲ ਰਾਊਫ਼ (Abdul Rauf)
- ਅਸ਼ਫ਼ਾਕ ਅਹਿਮਦ (Ashfaq Ahmad)
- ਹਾਫ਼ਿਜ਼ ਖਾਲਿਦ ਵਲੀਦ (Hafiz Khalid Waleed)
- ਮੌਲਾਨਾ ਸੈਫੁੱਲਾ ਖਾਲਿਦ (Maulana Saifullah Khalid)
- ਮੁਹੰਮਦ ਯਾਕੂਬ (Mohammad Yaqoob)
- ਮੌਲਾਨਾ ਯੂਸਫ਼ ਤੈਬੀ (Molana Yousaf Taibi)
- ਉਵੈਸ ਫ਼ਾਰੂਕ (Owais Farooz)
- ਕਾਰੀ ਯਾਕੂਬ ਸ਼ੇਖ (Qari Yaqub Sheikh)
- ਰਾਣਾ ਇਫ਼ਤਿਖਾਰ (Rana Iftikhar)
- ਵਸੀਮ ਨੂਰ ਜੱਟ (Waseem Noor Jat)
- ਮੁਹੰਮਦ ਸ਼ਹੀਦ ਫ਼ੈਸਲ (Mohammed Shaheed Faisal)
- ਮੌਲਾਨਾ ਇਮਦਾਦ ਉੱਲਾ ਮੱਕੀ (Maulana Imdad Ullah Makki)
- ਹਾਰੂਨ ਰਸ਼ੀਦ ਗਨਈ (Haroon Rashid Ganai)
ਪ੍ਰਸ਼ਾਸਨ ਮੁਤਾਬਕ ਇਨ੍ਹਾਂ ਵਿਅਕਤੀਆਂ ਨੂੰ ਅੱਤਵਾਦੀ ਐਲਾਨੇ ਜਾਣ ਤੋਂ ਬਾਅਦ ਹੁਣ ਜਾਂਚ ਏਜੰਸੀਆਂ ਲਈ ਇਨ੍ਹਾਂ ਦੀਆਂ ਜਾਇਦਾਦਾਂ ਨੂੰ ਜ਼ਬਤ ਕਰਨ ਅਤੇ ਇਨ੍ਹਾਂ ਦੇ ਨੈੱਟਵਰਕ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰਨ ਦੀ ਕਾਰਵਾਈ ਹੋਰ ਸੌਖੀ ਹੋ ਜਾਵੇਗੀ।
