ਗੁਟਖਾ ਤਸਕਰਾਂ ਨੂੰ ਫੜਨ ਲਈ 40 ਕਿਲੋਮੀਟਰ ਕਾਰ ਦੀ ਛੱਤ ’ਤੇ ਰਿਹਾ ਪੁਲਿਸ ਮੁਲਾਜ਼ਮ, CM ਨੇ ਕੀਤਾ ਸਨਮਾਨਿਤ
Police officer clung to car roof for 40 km: ਕੋਇੰਬਟੂਰ: ਤਾਮਿਲਨਾਡੂ ਦੇ ਕੋਇੰਬਟੂਰ ਵਿੱਚ ਗੁਟਖਾ ਤਸਕਰੀ ਖ਼ਿਲਾਫ਼ ਕਾਰਵਾਈ ਦੌਰਾਨ ਇੱਕ ਪੁਲਿਸ ਮੁਲਾਜ਼ਮ ਨੇ ਹੌਸਲੇ ਦੀ ਮਿਸਾਲ ਪੇਸ਼ ਕੀਤੀ। 27 ਸਤੰਬਰ ਨੂੰ ਕੋਵਿਲਪਾਲਾਯਮ ਥਾਣੇ ਵਿੱਚ ਤਾਇਨਾਤ ਹੈੱਡ ਕਾਂਸਟੇਬਲ ਵੇਲਮੁਰੁਗਨ ਨੇ ਗੁਟਖਾ ਲੈ ਕੇ ਜਾ ਰਹੀ ਕਾਰ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ। ਪੁਲਿਸ ਨੂੰ ਦੇਖ ਕੇ ਕਾਰ ਸਵਾਰਾਂ ਨੇ ਗੱਡੀ ਭਜਾ ਲਈ, ਜਿਸ ਦੌਰਾਨ ਵੇਲਮੁਰੁਗਨ ਕਾਰ ਦੀ ਛੱਤ ’ਤੇ ਚੜ੍ਹ ਗਏ।
ਪੁਲਿਸ ਟੀਮ ਨੇ ਕਾਰ ਦਾ ਕਰੀਬ 40 ਕਿਲੋਮੀਟਰ ਤੱਕ ਪਿੱਛਾ ਕੀਤਾ। ਇਸ ਦੌਰਾਨ ਹੈੱਡ ਕਾਂਸਟੇਬਲ ਕਾਰ ਦੀ ਛੱਤ ’ਤੇ ਹੀ ਰਹੇ ਅਤੇ ਪੁਲਿਸ ਟੀਮ ਨਾਲ ਸੰਪਰਕ ਬਣਾਈ ਰੱਖਿਆ। ਆਖ਼ਰਕਾਰ ਪੁਲਿਸ ਨੇ ਅਵਿਨਾਸ਼ੀ ਨੇੜੇ ਕਾਰ ਨੂੰ ਰੋਕ ਲਿਆ ਅਤੇ ਇਸ ਵਿੱਚ ਸਵਾਰ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ।
ਕਾਰ ਵਿੱਚੋਂ 231 ਕਿਲੋ ਗੁਟਖਾ ਬਰਾਮਦ
ਤਲਾਸ਼ੀ ਦੌਰਾਨ ਕਾਰ ਵਿੱਚੋਂ 231 ਕਿਲੋਗ੍ਰਾਮ ਗੁਟਖਾ ਬਰਾਮਦ ਹੋਇਆ। ਪੁਲਿਸ ਨੇ ਤਸਕਰੀ ਲਈ ਵਰਤੀ ਜਾ ਰਹੀ ਕਾਰ ਨੂੰ ਵੀ ਕਬਜ਼ੇ ਵਿੱਚ ਲੈ ਲਿਆ ਹੈ।
ਮੁੱਖ ਮੰਤਰੀ ਤੇ DGP ਨੇ ਕੀਤੀ ਸ਼ਲਾਘਾ
ਕਾਰਵਾਈ ਵਿੱਚ ਹੈੱਡ ਕਾਂਸਟੇਬਲ ਵੇਲਮੁਰੁਗਨ ਦੀ ਭੂਮਿਕਾ ਦੀ ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਨੇ ਨਿੱਜੀ ਤੌਰ ’ਤੇ ਸ਼ਲਾਘਾ ਕੀਤੀ। ਮੁੱਖ ਮੰਤਰੀ ਨੇ ਉਨ੍ਹਾਂ ਨਾਲ ਮੁਲਾਕਾਤ ਕਰਕੇ ਬਹਾਦਰੀ ਲਈ ਵਧਾਈ ਦਿੱਤੀ। ਤਾਮਿਲਨਾਡੂ ਦੇ ਪੁਲਿਸ ਮਹਾਨਿਰਦੇਸ਼ਕ (DGP) ਨੇ ਵੀ ਵੇਲਮੁਰੁਗਨ ਦੀ ਕਾਰਵਾਈ ਦੀ ਪ੍ਰਸ਼ੰਸਾ ਕੀਤੀ।
