ਪੰਜਾਬ ’ਚ ਬਿਜਲੀ ਸੰਕਟ ਦਾ ਖ਼ਤਰਾ ਵਧਿਆ, ਥਰਮਲ ਪਲਾਂਟਾਂ ਦੀਆਂ 5 ਯੂਨਿਟਾਂ ਬੰਦ
Power crisis in Punjab: ਪਟਿਆਲਾ: ਪੰਜਾਬ ਵਿੱਚ ਕਮਜ਼ੋਰ ਮਾਨਸੂਨ ਕਾਰਨ ਬਿਜਲੀ ਸੰਕਟ ਦੀ ਚਿੰਤਾ ਵਧ ਗਈ ਹੈ। ਘੱਟ ਮੀਂਹ ਪੈਣ ਕਾਰਨ ਸੂਬੇ ਦੇ ਮੁੱਖ ਡੈਮਾਂ ਵਿੱਚ ਪਾਣੀ ਦਾ ਪੱਧਰ ਅਤੇ ਆਮਦ ਲਗਾਤਾਰ ਘਟ ਰਹੀ ਹੈ, ਜਿਸ ਨਾਲ ਹਾਈਡਲ ਬਿਜਲੀ ਉਤਪਾਦਨ ’ਤੇ ਵੀ ਅਸਰ ਪੈ ਰਿਹਾ ਹੈ। ਦੂਜੇ ਪਾਸੇ ਲਹਿਰਾ ਮੁਹੱਬਤ ਥਰਮਲ ਪਲਾਂਟ ਦੇ ਕਰੀਬ 1800 ਆਊਟਸੋਰਸ ਮੁਲਾਜ਼ਮ ਕਈ ਦਿਨਾਂ ਤੋਂ ਹੜਤਾਲ ’ਤੇ ਹਨ। ਇਸ ਦੌਰਾਨ ਲਹਿਰਾ ਮੁਹੱਬਤ ਅਤੇ ਰੋਪੜ ਥਰਮਲ ਪਲਾਂਟ ਦੀਆਂ 5 ਯੂਨਿਟਾਂ ਤਕਨੀਕੀ ਕਾਰਨਾਂ ਕਰਕੇ ਬੰਦ ਹੋ ਗਈਆਂ ਹਨ। ਇਨ੍ਹਾਂ ਸਾਰੀਆਂ ਸਥਿਤੀਆਂ ਦੇ ਚੱਲਦਿਆਂ ਪੰਜਾਬ ਵਿੱਚ ਕਰੀਬ 1130 ਮੈਗਾਵਾਟ ਬਿਜਲੀ ਉਤਪਾਦਨ ਠੱਪ ਹੋ ਗਿਆ ਹੈ। ਬਿਜਲੀ ਦੀ ਵਧਦੀ ਮੰਗ ਨੂੰ ਪੂਰਾ ਕਰਨ ਲਈ ਪਾਵਰਕਾਮ ਨੂੰ ਬਾਹਰੋਂ ਮਹਿੰਗੀ ਬਿਜਲੀ ਖਰੀਦਣੀ ਪੈ ਰਹੀ ਹੈ। ਇਸ ਦੇ ਨਾਲ ਹੀ ਉਦਯੋਗਾਂ ਨੂੰ ਪੀਕ ਲੋਡ ਸਮੇਂ 5 ਘੰਟਿਆਂ ਤੱਕ ਦੇ ਬਿਜਲੀ ਕੱਟਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਬਿਜਲੀ ਦੀ ਮੰਗ 15,968 ਮੈਗਾਵਾਟ ਤੱਕ ਪਹੁੰਚੀ
ਸ਼ਨੀਵਾਰ ਨੂੰ ਪੰਜਾਬ ਵਿੱਚ ਬਿਜਲੀ ਦੀ ਮੰਗ 15,968 ਮੈਗਾਵਾਟ ਦਰਜ ਕੀਤੀ ਗਈ, ਜਦਕਿ ਪਾਵਰਕਾਮ ਕੋਲ ਆਪਣੇ ਸਾਰੇ ਸਰੋਤਾਂ ਤੋਂ ਕਰੀਬ 4,546 ਮੈਗਾਵਾਟ ਬਿਜਲੀ ਉਪਲਬਧ ਰਹੀ। ਇਸ ਵਿੱਚ ਹਾਈਡਲ ਪ੍ਰਾਜੈਕਟਾਂ ਤੋਂ 672 ਮੈਗਾਵਾਟ, ਨਿੱਜੀ ਥਰਮਲ ਪਲਾਂਟਾਂ ਤੋਂ 2,590 ਮੈਗਾਵਾਟ ਅਤੇ ਸਰਕਾਰੀ ਥਰਮਲ ਪਲਾਂਟਾਂ ਤੋਂ 926 ਮੈਗਾਵਾਟ ਬਿਜਲੀ ਮਿਲੀ। ਮੰਗ ਅਤੇ ਉਪਲਬਧਤਾ ਵਿਚਲੇ ਵੱਡੇ ਫ਼ਰਕ ਨੂੰ ਪੂਰਾ ਕਰਨ ਲਈ ਪਾਵਰਕਾਮ ਨੂੰ ਬਾਹਰੋਂ ਬਿਜਲੀ ਖਰੀਦਣੀ ਪੈ ਰਹੀ ਹੈ।
ਲਹਿਰਾ ਮੁਹੱਬਤ ਦੀਆਂ 3 ਅਤੇ ਰੋਪੜ ਦੀਆਂ 2 ਯੂਨਿਟਾਂ ਬੰਦ
ਜਾਣਕਾਰੀ ਮੁਤਾਬਕ ਲਹਿਰਾ ਮੁਹੱਬਤ ਥਰਮਲ ਪਲਾਂਟ ਦੀਆਂ ਯੂਨਿਟ ਨੰਬਰ 1, 3 ਅਤੇ 4 ਬੰਦ ਹਨ। ਉੱਥੇ ਹੀ ਰੋਪੜ ਥਰਮਲ ਪਲਾਂਟ ਦੀਆਂ ਯੂਨਿਟ ਨੰਬਰ 5 ਅਤੇ 6 ਵੀ ਬੰਦ ਹੋ ਗਈਆਂ ਹਨ। ਲਹਿਰਾ ਮੁਹੱਬਤ ਥਰਮਲ ਪਲਾਂਟ ਵਿੱਚ ਕਰੀਬ 1800 ਆਊਟਸੋਰਸ ਮੁਲਾਜ਼ਮਾਂ ਦੀ ਹੜਤਾਲ ਕਾਰਨ ਪਲਾਂਟ ਦੇ ਕੰਮਕਾਜ ’ਤੇ ਅਸਰ ਪਿਆ ਹੈ। ਇਸੇ ਦੌਰਾਨ ਬੈਲਟ ਨੰਬਰ 29 ਵਿੱਚ ਅੱਗ ਲੱਗਣ ਕਾਰਨ ਕੇਬਲਾਂ ਅਤੇ ਹੋਰ ਉਪਕਰਨ ਨੁਕਸਾਨੇ ਗਏ ਸਨ, ਜਿਸ ਤੋਂ ਬਾਅਦ ਤਿੰਨ ਯੂਨਿਟਾਂ ਨੂੰ ਬੰਦ ਕਰਨਾ ਪਿਆ। ਰੋਪੜ ਥਰਮਲ ਦੀ ਯੂਨਿਟ ਨੰਬਰ 5 ਪਹਿਲਾਂ ਹੀ ਬੰਦ ਸੀ, ਜਦਕਿ ਹੁਣ ਯੂਨਿਟ ਨੰਬਰ 6 ਵੀ ਤਕਨੀਕੀ ਖ਼ਰਾਬੀ ਕਾਰਨ ਬੰਦ ਹੋ ਗਈ ਹੈ।
10 ਸਤੰਬਰ ਤੱਕ ਯੂਨਿਟਾਂ ਚਾਲੂ ਹੋਣ ਦੀ ਉਮੀਦ
ਦੱਸਿਆ ਜਾ ਰਿਹਾ ਹੈ ਕਿ ਬੰਦ ਹੋਈਆਂ ਸਾਰੀਆਂ ਯੂਨਿਟਾਂ ਦੇ 10 ਸਤੰਬਰ ਤੱਕ ਮੁੜ ਚਾਲੂ ਹੋਣ ਦੀ ਸੰਭਾਵਨਾ ਹੈ। ਜੇਕਰ ਇਸ ਦੌਰਾਨ ਬਿਜਲੀ ਦੀ ਮੰਗ ਵਧੀ ਅਤੇ ਮੌਸਮ ਵਿੱਚ ਵੀ ਸੁਧਾਰ ਨਾ ਆਇਆ ਤਾਂ ਅਗਲੇ ਕਰੀਬ ਦੋ ਹਫ਼ਤਿਆਂ ਤੱਕ ਪੰਜਾਬ ਵਿੱਚ ਬਿਜਲੀ ਉਤਪਾਦਨ ’ਤੇ ਦਬਾਅ ਬਣਿਆ ਰਹਿ ਸਕਦਾ ਹੈ। ਇਸ ਕਾਰਨ ਆਉਣ ਵਾਲੇ ਦਿਨਾਂ ਵਿੱਚ ਉਦਯੋਗਿਕ ਖੇਤਰ ਸਮੇਤ ਹੋਰ ਖਪਤਕਾਰਾਂ ਨੂੰ ਵੀ ਬਿਜਲੀ ਕੱਟਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
