ਅੱਜ 1 ਅਕਤੂਬਰ ਤੋਂ ਦੇਸ਼ ਵਿੱਚ ਵੱਡੇ ਬਦਲਾਅ, LPG ਤੋਂ ATM ਅਤੇ ਇਲੈਕਟ੍ਰੋਨਿਕਸ ਤੱਕ ਪਵੇਗਾ ਅਸਰ

Rule Change From 1st October: ਅੱਜ ਸਤੰਬਰ ਮਹੀਨੇ ਦਾ ਆਖਰੀ ਦਿਨ ਹੈ ਅਤੇ ਕੱਲ੍ਹ ਤੋਂ ਅਕਤੂਬਰ ਮਹੀਨਾ ਸ਼ੁਰੂ ਹੋ ਰਿਹਾ ਹੈ। 1 ਅਕਤੂਬਰ ਤੋਂ ਦੇਸ਼ ਵਿੱਚ ਕਈ ਵੱਡੇ ਨਿਯਮ ਅਤੇ ਦਰਾਂ ਵਿੱਚ ਬਦਲਾਅ ਹੋਣ ਜਾ ਰਹੇ ਹਨ। ਇਨ੍ਹਾਂ ਦਾ ਸਿੱਧਾ ਅਸਰ ਆਮ ਲੋਕਾਂ ਦੀ ਰਸੋਈ, ਬੈਂਕਿੰਗ, ਹਵਾਈ ਯਾਤਰਾ ਅਤੇ ਖਰੀਦਦਾਰੀ ਦੇ ਖਰਚਿਆਂ ‘ਤੇ ਪੈ ਸਕਦਾ ਹੈ। ਜਾਣੋ 5 ਵੱਡੇ ਬਦਲਾਅ…

ਇਸ਼ਤਿਹਾਰ

1. LPG ਸਿਲੰਡਰ ਨਾਲ ਜੁੜੇ ਬਦਲਾਅ
   ਹਰ ਮਹੀਨੇ ਦੀ ਪਹਿਲੀ ਤਾਰੀਖ ਨੂੰ ਤੇਲ ਮਾਰਕੀਟਿੰਗ ਕੰਪਨੀਆਂ LPG ਸਿਲੰਡਰਾਂ ਦੀਆਂ ਕੀਮਤਾਂ ਵਿੱਚ ਸੋਧ ਕਰਦੀਆਂ ਹਨ। ਇਸ ਲਈ 1 ਅਕਤੂਬਰ 2026 ਨੂੰ ਵੀ LPG ਦੀਆਂ ਕੀਮਤਾਂ ਵਿੱਚ ਬਦਲਾਅ ਹੋ ਸਕਦਾ ਹੈ। ਪਿਛਲੇ ਸਮੇਂ ਦੌਰਾਨ 19 ਕਿਲੋ ਵਾਲੇ ਕਮਰਸ਼ੀਅਲ ਸਿਲੰਡਰ ਦੀਆਂ ਕੀਮਤਾਂ ਵਿੱਚ ਕਈ ਵਾਰ ਤਬਦੀਲੀ ਹੋਈ ਹੈ, ਜਦਕਿ 14.2 ਕਿਲੋ ਵਾਲੇ ਘਰੇਲੂ ਸਿਲੰਡਰ ਦੀ ਕੀਮਤ ਵਿੱਚ ਲੰਬੇ ਸਮੇਂ ਤੋਂ ਵੱਡਾ ਬਦਲਾਅ ਨਹੀਂ ਹੋਇਆ। ਇਸ ਤੋਂ ਇਲਾਵਾ LPG ਕਨੈਕਸ਼ਨ ਦੀ ਬਾਇਓਮੈਟ੍ਰਿਕ ਆਥੈਂਟੀਕੇਸ਼ਨ ਜਾਂ e-KYC ਪੂਰੀ ਨਾ ਕਰਨ ਵਾਲੇ ਗਾਹਕਾਂ ਨੂੰ ਸਬਸਿਡੀ ਨਾਲ ਜੁੜੀਆਂ ਮੁਸ਼ਕਲਾਂ ਆ ਸਕਦੀਆਂ ਹਨ। ਕੁਝ ਥਾਵਾਂ ‘ਤੇ LPG ਡਿਲੀਵਰੀ ਲਈ OTP ਆਧਾਰਿਤ ਵੈਰੀਫਿਕੇਸ਼ਨ ਦੀ ਪ੍ਰਕਿਰਿਆ ਵੀ ਲਾਗੂ ਕੀਤੀ ਜਾ ਸਕਦੀ ਹੈ।
2. ATF ਦੀਆਂ ਕੀਮਤਾਂ ਵਿੱਚ ਹੋਵੇਗੀ ਤਬਦੀਲੀ
   ਹਰ ਮਹੀਨੇ ਦੀ ਪਹਿਲੀ ਤਾਰੀਖ ਨੂੰ ਤੇਲ ਕੰਪਨੀਆਂ ਏਅਰ ਟਰਬਾਈਨ ਫਿਊਲ (ATF) ਦੀਆਂ ਕੀਮਤਾਂ ਦੀ ਵੀ ਸਮੀਖਿਆ ਕਰਦੀਆਂ ਹਨ। ATF ਦੀ ਕੀਮਤ ਵਿੱਚ ਵਾਧੇ ਜਾਂ ਕਮੀ ਦਾ ਅਸਰ ਏਅਰਲਾਈਨਜ਼ ਦੀ ਲਾਗਤ ਅਤੇ ਅੱਗੇ ਚੱਲ ਕੇ ਹਵਾਈ ਟਿਕਟਾਂ ਦੇ ਕਿਰਾਏ ‘ਤੇ ਪੈ ਸਕਦਾ ਹੈ।
3. SBI ATM ਤੋਂ ਪੈਸੇ ਕਢਵਾਉਣ ਦੇ ਚਾਰਜ ਵਿੱਚ ਬਦਲਾਅ
   ਸਟੇਟ ਬੈਂਕ ਆਫ ਇੰਡੀਆ (SBI) ਦੇ ਕੁਝ ਗਾਹਕਾਂ ਲਈ ATM ਤੋਂ ਨਕਦੀ ਕਢਵਾਉਣ ਨਾਲ ਜੁੜੇ ਚਾਰਜ ਬਦਲਣ ਦੀ ਗੱਲ ਸਾਹਮਣੇ ਆਈ ਹੈ। BSBD ਖਾਤਿਆਂ ਵਿੱਚ ਮੁਫ਼ਤ ਨਿਕਾਸੀ ਦੀ ਨਿਰਧਾਰਤ ਹੱਦ ਪਾਰ ਕਰਨ ਤੋਂ ਬਾਅਦ ਹਰ ATM ਨਿਕਾਸੀ ‘ਤੇ 15 ਰੁਪਏ + GST ਚਾਰਜ ਲੱਗ ਸਕਦਾ ਹੈ। ਸੈਲਰੀ ਖਾਤਿਆਂ ਲਈ ਮੁਫ਼ਤ ATM ਟ੍ਰਾਂਜ਼ੈਕਸ਼ਨਾਂ ਦੀ ਮਹੀਨਾਵਾਰ ਹੱਦ 10 ਤੋਂ ਘਟਾ ਕੇ 5 ਕੀਤੇ ਜਾਣ ਦੀ ਜਾਣਕਾਰੀ ਦਿੱਤੀ ਗਈ ਹੈ। ਮੁਫ਼ਤ ਹੱਦ ਤੋਂ ਬਾਅਦ ਨਕਦ ਨਿਕਾਸੀ ‘ਤੇ 23 ਰੁਪਏ + GST ਅਤੇ ਨਾਨ-ਫਾਈਨੈਂਸ਼ੀਅਲ ਟ੍ਰਾਂਜ਼ੈਕਸ਼ਨ ‘ਤੇ 11 ਰੁਪਏ + GST ਚਾਰਜ ਲਾਗੂ ਹੋ ਸਕਦਾ ਹੈ।
4. TV, ਫ੍ਰਿਜ ਅਤੇ AC ਮਹਿੰਗੇ ਹੋ ਸਕਦੇ ਹਨ
   ਤਿਉਹਾਰੀ ਸੀਜ਼ਨ ਵਿੱਚ ਟੀਵੀ, ਫ੍ਰਿਜ, AC ਅਤੇ ਹੋਰ ਘਰੇਲੂ ਇਲੈਕਟ੍ਰਾਨਿਕ ਸਮਾਨ ਖਰੀਦਣ ਵਾਲਿਆਂ ਲਈ ਖਰਚ ਵਧ ਸਕਦਾ ਹੈ। PTI ਦੀ ਰਿਪੋਰਟ ਮੁਤਾਬਕ ਤਾਂਬਾ, ਸਟੀਲ, ਐਲੂਮੀਨੀਅਮ ਅਤੇ ਕੱਚੇ ਤੇਲ ਵਰਗੇ ਕੱਚੇ ਮਾਲ ਦੀਆਂ ਵਧੀਆਂ ਕੀਮਤਾਂ ਅਤੇ ਮਾਲ ਢੁਆਈ ਦੇ ਖਰਚ ਵਿੱਚ ਵਾਧੇ ਕਾਰਨ ਕੰਪਨੀਆਂ ਕੀਮਤਾਂ ਵਧਾ ਸਕਦੀਆਂ ਹਨ। ਰਿਪੋਰਟ ਮੁਤਾਬਕ ਕੁਝ ਇਲੈਕਟ੍ਰਾਨਿਕ ਉਤਪਾਦਾਂ ਦੀਆਂ ਕੀਮਤਾਂ ਵਿੱਚ 8 ਫੀਸਦੀ ਤੱਕ ਵਾਧਾ ਦੇਖਣ ਨੂੰ ਮਿਲ ਸਕਦਾ ਹੈ।
5. FD ਦੇ ਨਿਯਮਾਂ ਵਿੱਚ ਬਦਲਾਅ
   ਰਿਜ਼ਰਵ ਬੈਂਕ ਆਫ ਇੰਡੀਆ (RBI) ਵੱਲੋਂ ਫਿਕਸਡ ਡਿਪਾਜ਼ਿਟ (FD) ਨਾਲ ਜੁੜੇ ਨਿਯਮਾਂ ਵਿੱਚ ਬਦਲਾਅ 1 ਅਕਤੂਬਰ ਤੋਂ ਲਾਗੂ ਹੋਣ ਦੀ ਜਾਣਕਾਰੀ ਹੈ। ਨਵੇਂ ਨਿਯਮਾਂ ਤਹਿਤ ਬੈਂਕਾਂ ਨੂੰ FD ਦੀਆਂ ਵਿਆਜ ਦਰਾਂ ਨਾਲ ਸਬੰਧਤ ਜਾਣਕਾਰੀ ਆਪਣੀ ਵੈੱਬਸਾਈਟ ‘ਤੇ ਅਪਡੇਟ ਰੱਖਣੀ ਹੋਵੇਗੀ। ਇੱਕੋ ਤਾਰੀਖ ਨੂੰ ਸਵੀਕਾਰ ਕੀਤੀਆਂ ਗਈਆਂ FD ‘ਤੇ ਇੱਕੋ ਜਿਹੀਆਂ ਸ਼ਰਤਾਂ ਅਤੇ ਲਾਗੂ ਵਿਆਜ ਦਰਾਂ ਦੇਣ ਨਾਲ ਸਬੰਧਤ ਪਾਰਦਰਸ਼ਤਾ ‘ਤੇ ਵੀ ਜ਼ੋਰ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ ਬਲਕ ਡਿਪਾਜ਼ਿਟ ਅਤੇ ਵੱਖ-ਵੱਖ ਵਿਆਜ ਦਰਾਂ ਨਾਲ ਜੁੜੇ ਨਿਯਮਾਂ ਵਿੱਚ ਵੀ ਬਦਲਾਅ ਹੋਣਗੇ।