ਬਿਸਤਰੇ ‘ਤੇ ਪਈ ਲੋਡਡ ਪਿਸਤੌਲ ਨਾਲ ਖੇਡਦਿਆਂ ਚੱਲੀ ਗੋਲੀ; 3 ਸਾਲਾ ਮਾਸੂਮ ਦੀ ਮੌਤ, ਦਾਦੀ ਗੰਭੀਰ ਜ਼ਖਮੀ
Amritsar Accident: ਗੁਰੂ ਨਗਰੀ ਅੰਮ੍ਰਿਤਸਰ ਦੇ ਛੇਹਰਟਾ ਇਲਾਕੇ ਅਧੀਨ ਪੈਂਦੇ ਸ਼ਿੰਗਾਰ ਐਵੇਨਿਊ ਤੋਂ ਇੱਕ ਬੇਹੱਦ ਦਰਦਨਾਕ ਖ਼ਬਰ ਸਾਹਮਣੇ ਆਈ ਹੈ। ਬੀਤੀ ਦਿਨੀ ਸ਼ਨੀਵਾਰ ਦੇਰ ਰਾਤ ਘਰ ਵਿੱਚ ਖੇਡਦੇ ਸਮੇਂ ਇੱਕ 3 ਸਾਲ ਦੇ ਮਾਸੂਮ ਬੱਚੇ ਕੋਲੋਂ ਆਪਣੇ ਪਿਤਾ ਦੀ ਲਾਇਸੈਂਸੀ ਪਿਸਤੌਲ ਦਾ ਟ੍ਰਿਗਰ ਅਚਾਨਕ ਦੱਬ ਗਿਆ। ਪਿਸਤੌਲ ਵਿੱਚੋਂ ਨਿਕਲੀ ਗੋਲੀ ਬੱਚੇ ਦੇ ਸਰੀਰ ਨੂੰ ਚੀਰਦੀ ਹੋਈ ਕੋਲ ਹੀ ਖੜ੍ਹੀ ਉਸਦੀ ਦਾਦੀ ਨੂੰ ਜਾ ਲੱਗੀ। ਇਸ ਖ਼ੌਫ਼ਨਾਕ ਹਾਦਸੇ ਵਿੱਚ ਮਾਸੂਮ ਬੱਚੇ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ ਦਾਦੀ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਈ। ਜ਼ਖਮੀ ਬਜ਼ੁਰਗ ਔਰਤ ਨੂੰ ਤੁਰੰਤ ਨਜ਼ਦੀਕੀ ਨਿੱਜੀ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ, ਜਿੱਥੇ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਹੈ। ਮ੍ਰਿਤਕ ਬੱਚੇ ਦੀ ਪਛਾਣ ਵੰਸ਼ ਵਜੋਂ ਹੋਈ ਹੈ।
ਬਿਸਤਰੇ ‘ਤੇ ਲੋਡਡ ਪਿਸਤੌਲ ਛੱਡਣਾ ਬਣਿਆ ਕਾਲ
ਮਿਲੀ ਜਾਣਕਾਰੀ ਮੁਤਾਬਕ, ਬੱਚੇ ਦਾ ਪਿਤਾ ਸਾਜਨ ਸ਼ਨੀਵਾਰ ਸਵੇਰੇ ਆਪਣੇ ਬੱਚਿਆਂ ਨੂੰ ਸਕੂਲ ਵਿੱਚ ‘ਪੇਰੈਂਟਸ-ਟੀਚਰ ਮੀਟਿੰਗ’ (PTM) ਲਈ ਲੈ ਕੇ ਗਿਆ ਸੀ। ਸੁਰੱਖਿਆ ਦੇ ਲਿਹਾਜ਼ ਨਾਲ ਉਹ ਆਪਣੀ ਲਾਇਸੈਂਸੀ ਪਿਸਤੌਲ ਵੀ ਨਾਲ ਹੀ ਲੈ ਗਿਆ ਸੀ। ਦੁਪਹਿਰ ਵੇਲੇ ਜਦੋਂ ਉਹ ਘਰ ਪਰਤਿਆ, ਤਾਂ ਕੱਪੜੇ ਬਦਲਣ ਦੌਰਾਨ ਉਸਨੇ ਲਾਪਰਵਾਹੀ ਵਰਤਦਿਆਂ ਗੋਲੀਆਂ ਨਾਲ ਭਰੀ ਹੋਈ ਪਿਸਤੌਲ ਨੂੰ ਬਿਸਤਰੇ (ਬੈੱਡ) ਉੱਤੇ ਹੀ ਛੱਡ ਦਿੱਤਾ। ਇਸੇ ਦੌਰਾਨ ਕਮਰੇ ਵਿੱਚ ਖੇਡ ਰਹੇ 3 ਸਾਲਾ ਵੰਸ਼ ਦੀ ਨਜ਼ਰ ਪਿਸਤੌਲ ‘ਤੇ ਪੈ ਗਈ। ਖਿਡੌਣਾ ਸਮਝ ਕੇ ਜਿਵੇਂ ਹੀ ਬੱਚੇ ਨੇ ਪਿਸਤੌਲ ਚੁੱਕੀ, ਤਾਂ ਅਚਾਨਕ ਗੋਲੀ ਚੱਲ ਗਈ।
ਗੋਲੀ ਦੀ ਆਵਾਜ਼ ਸੁਣ ਕੇ ਪਰਿਵਾਰ ਵਿੱਚ ਚੀਕ-ਚਿਹਾਰਾ ਮਚ ਗਿਆ। ਲਹੂ-ਲੁਹਾਨ ਹਾਲਤ ਵਿੱਚ ਬੱਚੇ ਅਤੇ ਉਸਦੀ ਦਾਦੀ ਨੂੰ ਹਸਪਤਾਲ ਲਿਜਾਇਆ ਗਿਆ, ਪਰ ਡਾਕਟਰਾਂ ਨੇ ਦੇਖਦਿਆਂ ਹੀ ਮਾਸੂਮ ਵੰਸ਼ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪਰਿਵਾਰਕ ਮੈਂਬਰਾਂ ਮੁਤਾਬਕ ਵੰਸ਼ ਜੁੜਵਾਂ (ਟਵਿਨਜ਼) ਬੱਚਿਆਂ ਵਿੱਚੋਂ ਇੱਕ ਸੀ। ਇਸ ਹਾਦਸੇ ਤੋਂ ਬਾਅਦ ਪੂਰੇ ਇਲਾਕੇ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ ਅਤੇ ਮਾਪਿਆਂ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ।
ਲਾਪਰਵਾਹੀ ਕਾਰਨ ਵਾਪਰਿਆ ਹਾਦਸਾ, ਪੁਲਿਸ ਵੱਲੋਂ ਜਾਂਚ ਸ਼ੁਰੂ
ਘਟਨਾ ਦੀ ਸੂਚਨਾ ਮਿਲਦੇ ਹੀ ਛੇਹਰਟਾ ਥਾਣੇ ਦੀ ਪੁਲਿਸ ਟੀਮ ਮੌਕੇ ‘ਤੇ ਪਹੁੰਚੀ ਅਤੇ ਜਾਂਚ ਵਿੱਚ ਜੁਟ ਗਈ। ਮਾਮਲੇ ਸਬੰਧੀ ਜਾਣਕਾਰੀ ਦਿੰਦਿਆਂ ਥਾਣਾ ਛੇਹਰਟਾ ਦੇ ਐਸਐਚਓ (SHO) ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਮੁਢਲੀ ਜਾਂਚ ਤੋਂ ਸਾਫ਼ ਹੈ ਕਿ ਇਹ ਹਾਦਸਾ ਮਹਿਜ਼ ਇੱਕ ਦੁਰਘਟਨਾ ਹੈ, ਜੋ ਹਥਿਆਰ ਰੱਖਣ ਵਿੱਚ ਵਰਤੀ ਗਈ ਘੋਰ ਲਾਪਰਵਾਹੀ ਕਾਰਨ ਵਾਪਰਿਆ।
ਪੁਲਿਸ ਮੁਤਾਬਕ ਪਿਸਤੌਲ ਬਿਨਾਂ ਕਿਸੇ ਲਾਕ ਦੇ ਖੁੱਲ੍ਹੀ ਹਾਲਤ ਵਿੱਚ ਪਈ ਸੀ, ਜਿਸ ਕਾਰਨ ਮਾਸੂਮ ਬੱਚੇ ਦਾ ਹੱਥ ਆਸਾਨੀ ਨਾਲ ਟ੍ਰਿਗਰ ਤੱਕ ਪਹੁੰਚ ਗਿਆ। ਫਿਲਹਾਲ ਪੁਲਿਸ ਨੇ ਲਾਸ਼ ਨੂੰ ਕਬਜ਼ੇ ਵਿੱਚ ਲੈ ਕੇ ਸੀਆਰਪੀਸੀ (CrPC) ਦੀ ਧਾਰਾ 174 ਦੇ ਤਹਿਤ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ ਅਤੇ ਹਾਦਸੇ ਦੇ ਹਰ ਪਹਿਲੂ ਦੀ ਬਾਰੀਕੀ ਨਾਲ ਪੜਤਾਲ ਕੀਤੀ ਜਾ ਰਹੀ ਹੈ।
