ਬੇਖੌਫ਼ ਚੋਰ ਦੀ ਅਨੋਖੀ ਕਰਤੂਤ, ਦੁੱਧ ਲੱਭਿਆ, ਫੇਰ ਚਾਹ ਬਣਾ ਕੇ ਪੀਣ ਤੋਂ ਬਾਅਦ ਮੁੜ ਚੋਰੀ ’ਚ ਜੁਟਿਆ
Thief drink tea and stealing again: ਧੂਰੀ: ਸੰਗਰੂਰ ਦੇ ਧੂਰੀ ਸ਼ਹਿਰ ਵਿੱਚ ਚੋਰੀ ਦੀ ਇੱਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਦੋਲੇ ਵਾਲੇ ਫਾਟਕ ਨੇੜੇ ਸਥਿਤ ਕਈ ਦੁਕਾਨਾਂ ਨੂੰ ਇੱਕ ਬੇਖੌਫ਼ ਚੋਰ ਨੇ ਨਿਸ਼ਾਨਾ ਬਣਾਇਆ। ਦੱਸਿਆ ਜਾ ਰਿਹਾ ਹੈ ਕਿ ਚੋਰ ਨੇ ਕਰੀਬ ਚਾਰ ਦੁਕਾਨਾਂ ਵਿੱਚ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਇਸ ਘਟਨਾ ਦੀਆਂ ਕੁਝ ਤਸਵੀਰਾਂ ਇੱਕ ਪੈਸਟੀਸਾਈਡ ਦੀ ਦੁਕਾਨ ਵਿੱਚ ਲੱਗੇ CCTV ਕੈਮਰੇ ਵਿੱਚ ਕੈਦ ਹੋ ਗਈਆਂ। ਫੁਟੇਜ ਵਿੱਚ ਕਥਿਤ ਤੌਰ ’ਤੇ ਇੱਕ ਵਿਅਕਤੀ ਦੁਕਾਨ ਅੰਦਰ ਬੜੇ ਆਰਾਮ ਨਾਲ ਘੁੰਮਦਾ ਨਜ਼ਰ ਆ ਰਿਹਾ ਹੈ।
CCTV ਵਿੱਚ ਦਿਖਾਈ ਦੇ ਰਿਹਾ ਹੈ ਕਿ ਦੁਕਾਨ ਵਿੱਚ ਦਾਖਲ ਹੋਣ ਤੋਂ ਬਾਅਦ ਉਸ ਨੇ ਫਰਿਜ ਖੋਲ੍ਹ ਕੇ ਦੁੱਧ ਕੱਢਿਆ ਅਤੇ ਚਾਹ ਬਣਾਉਣ ਲਈ ਸਮਾਨ ਇਕੱਠਾ ਕੀਤਾ। ਇਸ ਦੌਰਾਨ ਉਸ ਨੇ ਫਰਿਜ ਵਿੱਚੋਂ ਪਾਣੀ ਵੀ ਪੀਤਾ। ਫਿਰ ਦੁਕਾਨ ਵਿੱਚ ਮੌਜੂਦ ਚੁੱਲ੍ਹੇ ’ਤੇ ਚਾਹ ਬਣਾਈ ਅਤੇ ਆਰਾਮ ਨਾਲ ਬੈਠ ਕੇ ਚਾਹ ਪੀਤੀ। ਇੱਥੋਂ ਤੱਕ ਕਿ ਚਾਹ ਪੀਣ ਤੋਂ ਬਾਅਦ ਉਸ ਨੇ ਵਰਤੇ ਗਏ ਭਾਂਡੇ ਵੀ ਸਾਫ਼ ਕੀਤੇ। ਇਸ ਤੋਂ ਬਾਅਦ ਉਹ ਮੁੜ ਕਥਿਤ ਤੌਰ ’ਤੇ ਚੋਰੀ ਦੀ ਵਾਰਦਾਤ ਨੂੰ ਅੰਜਾਮ ਦੇਣ ਵਿੱਚ ਲੱਗ ਗਿਆ।
ਦੁਕਾਨਦਾਰਾਂ ਅਨੁਸਾਰ ਚੋਰ ਨੇ ਕਾਊਂਟਰ ਦੀ ਦਰਾਜ਼ ਤੋੜ ਕੇ ਨਕਦੀ ਕੱਢੀ ਅਤੇ ਇੱਕ ਮੋਬਾਈਲ ਫੋਨ ਵੀ ਚੋਰੀ ਕਰ ਲਿਆ। CCTV ਫੁਟੇਜ ਵਿੱਚ ਫਿਲਹਾਲ ਇੱਕ ਹੀ ਵਿਅਕਤੀ ਨਜ਼ਰ ਆ ਰਿਹਾ ਹੈ। ਜਾਣਕਾਰੀ ਮੁਤਾਬਕ ਚੋਰ ਨੇ ਪਹਿਲਾਂ ਖੇਤੀਬਾੜੀ ਦੇ ਸੰਦ ਬਣਾਉਣ ਵਾਲੀ ਇੱਕ ਵਰਕਸ਼ਾਪ ਵਿੱਚੋਂ ਵਿੰਡੋ ਏਸੀ ਹਟਾ ਕੇ ਅੰਦਰ ਦਾਖਲ ਹੋਣ ਦਾ ਰਸਤਾ ਬਣਾਇਆ। ਇਸ ਤੋਂ ਬਾਅਦ ਉਸ ਨੇ ਨਾਲ ਲੱਗਦੀਆਂ ਹੋਰ ਦੁਕਾਨਾਂ ਨੂੰ ਵੀ ਨਿਸ਼ਾਨਾ ਬਣਾਇਆ।
ਦੁਕਾਨਦਾਰਾਂ ਦਾ ਦਾਅਵਾ ਹੈ ਕਿ ਵਾਰਦਾਤ ਦੌਰਾਨ ਕਰੀਬ 26 ਤੋਂ 27 ਹਜ਼ਾਰ ਰੁਪਏ ਦੀ ਨਕਦੀ, ਕੁਝ ਨਵੀਆਂ ਡਰਿੱਲ ਮਸ਼ੀਨਾਂ ਅਤੇ ਮੋਬਾਈਲ ਫੋਨ ਚੋਰੀ ਹੋਏ ਹਨ। ਪੀੜਤ ਦੁਕਾਨਦਾਰਾਂ ਨੇ ਪੁਲਿਸ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ CCTV ਫੁਟੇਜ ਦੇ ਆਧਾਰ ’ਤੇ ਮੁਲਜ਼ਮ ਦੀ ਪਛਾਣ ਕਰਕੇ ਉਸ ਨੂੰ ਜਲਦ ਕਾਬੂ ਕੀਤਾ ਜਾਵੇ ਅਤੇ ਚੋਰੀ ਹੋਇਆ ਸਮਾਨ ਬਰਾਮਦ ਕੀਤਾ ਜਾਵੇ।
