ਪਰਵਾਣੂ ‘ਚ ਬਿਜਲੀ ਵਿਭਾਗ ਦੀ ਲਾਪਰਵਾਹੀ, HT ਤਾਰਾਂ ਦੀ ਚਪੇਟ ‘ਚ ਆਉਣ ਨਾਲ ਦੋ ਬਾਈਕ ਸਵਾਰਾਂ ਦੀ ਮੌਤ
Bikers die in Parwanoo, Solan: ਬੀਤੀ ਰਾਤ ਪਰਵਾਣੂ ਦੇ ਸੈਕਟਰ-4 ਨਾਰੀਆਲ ਵਿੱਚ ਦਿਲ ਦਹਿਲਾ ਦੇਣ ਵਾਲਾ ਹਾਦਸਾ ਵਾਪਰਿਆ। ਬਿਜਲੀ ਵਿਭਾਗ ਦੇ ਟ੍ਰਾਂਸਫਾਰਮਰ ਦੇ ਕੰਡੈਂਸਰ ਦੇ ਫਟਣ ਕਾਰਨ ਤਾਰ ਅਚਾਨਕ ਸੜਕ ‘ਤੇ ਡਿੱਗਣ ਗਈ, ਅਤੇ ਦੋ ਬਾਈਕ ਸਵਾਰ ਹਾਈ ਵੋਲਟੇਜ ਤਾਰ ਦੇ ਸੰਪਰਕ ਵਿੱਚ ਆ ਗਏ।ਤਾਰ ਨਾਲ ਟਕਰਾਉਣ ਤੋਂ ਬਾਅਦ ਦੋਵੇਂ ਨੌਜਵਾਨ ਮੌਕੇ ‘ਤੇ ਹੀ ਸੜ ਗਏ।
ਸਥਾਨਕ ਲੋਕਾਂ ਨੇ ਦੋਵਾਂ ਨੂੰ ਗੰਭੀਰ ਹਾਲਤ ਵਿੱਚ ESI ਹਸਪਤਾਲ ਪਰਵਾਣੂ ਪਹੁੰਚਾਇਆ, ਪਰ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਨੌਜਵਾਨਾਂ ਦੀ ਪਛਾਣ ਬਸੰਤ ਕੁਮਾਰ, ਬ੍ਰਜੇਸ਼ ਕੁਮਾਰ ਵਜੋਂ ਹੋਈ ਹੈ। ਹਾਦਸੇ ਤੋਂ ਬਾਅਦ ਪੂਰੇ ਇਲਾਕੇ ਵਿੱਚ ਦਹਿਸ਼ਤ ਅਤੇ ਗੁੱਸਾ ਫੈਲ ਗਿਆ ਹੈ। ਬਿਜਲੀ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਵਿਕਾਸ ਗੁਪਤਾ ਨੇ ਹਾਦਸੇ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਇਹ ਕੰਡੈਂਸਰ ਦੇ ਫਟਣ ਕਾਰਨ ਹੋਇਆ ਹੈ।
ਇਹ ਮਾਮਲਾ ਵੱਡੀ ਲਾਪਰਵਾਹੀ ਦਾ ਪ੍ਰਤੀਕ ਬਣ ਗਿਆ ਹੈ, ਕਿਉਂਕਿ ਪਰਵਾਣੂ ਵਿੱਚ ਪਹਿਲਾਂ ਵੀ ਅਜਿਹਾ ਹਾਦਸਾ ਵਾਪਰ ਚੁੱਕਾ ਹੈ, ਜਿਸ ਵਿੱਚ ਇੱਕ ਵਿਅਕਤੀ ਨੂੰ ਆਪਣੀ ਜਾਨ ਗੁਆਉਣੀ ਪਈ ਸੀ। ਉਸ ਸਮੇਂ ਵੀ ਇੱਕ ਬੱਸ ਟੱਕਰਾਉਣ ਤੋਂ ਵਾਲ-ਵਾਲ ਬਚੀ ਸੀ।
ਹੁਣ ਸਥਾਨਕ ਲੋਕ ਇਹ ਸਵਾਲ ਉਠਾ ਰਹੇ ਹਨ ਕਿ ਜਦੋਂ ਤਾਰਾਂ ਖਰਾਬ ਸੀ, ਤਾਂ ਵਿਭਾਗ ਨੇ ਸਮੇਂ ਸਿਰ ਉਨ੍ਹਾਂ ਦੀ ਮੁਰੰਮਤ ਕਿਉਂ ਨਹੀਂ ਕੀਤੀ? ਲੋਕਾਂ ਨੇ ਦੋਸ਼ੀਆਂ ਵਿਰੁੱਧ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ।
ਐਸਪੀ ਸੋਲਨ ਗੌਰਵ ਸਿੰਘ ਦੇ ਅਨੁਸਾਰ, ਜਾਂਚ ਦੌਰਾਨ ਇਹ ਪਾਇਆ ਗਿਆ ਕਿ ਉਪਰੋਕਤ ਦੋਵੇਂ ਨੌਜਵਾਨ ਨਰਿਆਲ ਪਰਵਾਣੂ ਵਿੱਚ ਇੱਕ ਪ੍ਰਿੰਟਿੰਗ ਪ੍ਰੈਸ ਵਿੱਚ ਕੰਮ ਕਰਦੇ ਸੀ ਤੇ ਛੁੱਟੀ ਤੋਂ ਬਾਅਦ, ਦੋਵੇਂ ਆਪਣੇ ਮੋਟਰਸਾਈਕਲਾਂ ‘ਤੇ ਆਪਣੇ ਕੁਆਰਟਰਾਂ ਨੂੰ ਜਾ ਰਹੇ ਸੀ। ਜਾਂਚ ਦੌਰਾਨ ਇਹ ਵੀ ਪਾਇਆ ਗਿਆ ਕਿ ਉਸ ਸਮੇਂ ਸੜਕ ‘ਤੇ ਲਟਕਦੀਆਂ/ਡਿੱਗਦੀਆਂ ਤਾਰਾਂ ਵਿੱਚ ਸਪਲਾਈ ਚੱਲ ਰਹੀ ਸੀ, ਜੇਕਰ ਐਚਟੀ ਲਾਈਨ ਦੀ ਸਪਲਾਈ ਸਮੇਂ ਸਿਰ ਕੱਟ ਦਿੱਤੀ ਜਾਂਦੀ, ਤਾਂ ਇਸ ਹਾਦਸੇ ਤੋਂ ਬਚਿਆ ਜਾ ਸਕਦਾ ਸੀ।
ਹੁਣ ਤੱਕ ਦੀ ਜਾਂਚ ਤੋਂ ਇਹ ਪਤਾ ਲੱਗਿਆ ਹੈ ਕਿ ਇਹ ਹਾਦਸਾ ਬਿਜਲੀ ਵਿਭਾਗ ਪਰਵਾਣੂ ਵਿੱਚ ਉਸ ਸਮੇਂ ਡਿਊਟੀ ‘ਤੇ ਤਾਇਨਾਤ ਕਰਮਚਾਰੀਆਂ ਦੀ ਲਾਪਰਵਾਹੀ ਕਾਰਨ ਵਾਪਰਿਆ ਹੈ।
