ਜ਼ਿੰਦਾ ਬਿਮਾਰ ਕੁੱਤੇ ਨੂੰ ਦਰਿਆ ’ਚ ਸੁੱਟਣ ਦੇ ਦੋਸ਼ ’ਚ ਔਰਤ ਗ੍ਰਿਫ਼ਤਾਰ
Woman arrested for throwing dog into river: ਬਜਹਾਂਗ (ਨੇਪਾਲ): ਨੇਪਾਲ ਦੇ ਬਜਹਾਂਗ ਜ਼ਿਲ੍ਹੇ ਵਿੱਚ ਇੱਕ ਬਿਮਾਰ ਕੁੱਤੇ ਨੂੰ ਪੁਲ ਤੋਂ ਜ਼ਿੰਦਾ ਸੇਤੀ ਦਰਿਆ ਵਿੱਚ ਸੁੱਟਣ ਦੇ ਦੋਸ਼ ਹੇਠ ਪੁਲਿਸ ਨੇ ਇੱਕ ਔਰਤ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਗ੍ਰਿਫ਼ਤਾਰ ਕੀਤੀ ਗਈ ਔਰਤ ਦੀ ਪਛਾਣ 42 ਸਾਲਾ ਬਿਮਲਾ ਦੇਵੀ ਰੋਕਾਇਆ ਵਜੋਂ ਹੋਈ ਹੈ। ਉਹ ਜੈਪ੍ਰਿਥਵੀ ਨਗਰਪਾਲਿਕਾ-3 ਦੇ ਪਦੇਸ ਇਲਾਕੇ ਦੀ ਰਹਿਣ ਵਾਲੀ ਹੈ। ਪੁਲਿਸ ਮੁਤਾਬਕ ਉਸ ’ਤੇ ਜੈਪ੍ਰਿਥਵੀ ਨਗਰਪਾਲਿਕਾ-10 ਦੇ ਚੈਨਪੁਰ ਸਥਿਤ ਪੈਨਕੋਟ ਪੁਲ ਤੋਂ ਕੁੱਤੇ ਨੂੰ ਸੇਤੀ ਦਰਿਆ ਵਿੱਚ ਸੁੱਟਣ ਦਾ ਦੋਸ਼ ਹੈ। ਜ਼ਿਲ੍ਹਾ ਪੁਲਿਸ ਦਫ਼ਤਰ ਬਜਹਾਂਗ ਦੇ ਡੀਐੱਸਪੀ ਟੇਕ ਜੋਰਾ ਨੇ ਦੱਸਿਆ ਕਿ ਔਰਤ ਨੂੰ ਹਿਰਾਸਤ ਵਿੱਚ ਲੈ ਕੇ ਮਾਮਲੇ ਦੀ ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ।
ਦੋ ਹਫ਼ਤਿਆਂ ਤੋਂ ਬਿਮਾਰ ਸੀ ਕੁੱਤਾ
ਮੁੱਢਲੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਕੁੱਤਾ ਕਰੀਬ ਦੋ ਹਫ਼ਤਿਆਂ ਤੋਂ ਬਿਮਾਰ ਸੀ। ਪੁਲਿਸ ਮੁਤਾਬਕ ਉਸ ਦੇ ਸਰੀਰ ਦੇ ਪਿਛਲੇ ਹਿੱਸੇ ’ਤੇ ਜ਼ਖ਼ਮ ਹੋਣ ਕਾਰਨ ਉਹ ਸੜ ਰਿਹਾ ਸੀ ਅਤੇ ਬਦਬੂ ਆ ਰਹੀ ਸੀ। ਪੁਲਿਸ ਅਨੁਸਾਰ ਬਿਮਲਾ ਦੇਵੀ ਨੇ ਦੱਸਿਆ ਕਿ ਬਿਮਾਰ ਕੁੱਤੇ ਨੇ ਉਸ ਦੇ ਘਰ ਨੇੜੇ ਸੜਕ ਤੋਂ ਲੰਘਣ ਵਾਲੇ ਲੋਕਾਂ ਨੂੰ ਕੱਟਣਾ ਸ਼ੁਰੂ ਕਰ ਦਿੱਤਾ ਸੀ। ਇਸ ਕਾਰਨ ਉਸ ਨੇ ਕੁੱਤੇ ਨੂੰ ਪੈਨਕੋਟ ਪੁਲ ਤੋਂ ਦਰਿਆ ਵਿੱਚ ਸੁੱਟ ਦਿੱਤਾ। ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਅੱਗੇ ਵਧਾਈ ਜਾ ਰਹੀ ਹੈ।
