ਅਮਰੀਕਾ ’ਚ 2 ਘਾਤਕ ਟੀਕੇ ਲੱਗਣ ਤੋਂ ਬਾਅਦ ਵੀ ਮਹਿਲਾ ਜ਼ਿੰਦਾ ਰਹੀ, ਮੌਤ ਦੀ ਸਜ਼ਾ ਟਲੀ
Woman survives after receiving two lethal injections: ਨਵੀਂ ਦਿੱਲੀ: ਅਮਰੀਕਾ ਦੇ ਟੇਨੇਸੀ ਸੂਬੇ ਵਿੱਚ ਮੌਤ ਦੀ ਸਜ਼ਾ ਦਾ ਸਾਹਮਣਾ ਕਰ ਰਹੀ ਕੈਦੀ ਕ੍ਰਿਸਟਾ ਗੇਲ ਪਾਈਕ ਨੂੰ ਘਾਤਕ ਟੀਕੇ ਦੇਣ ਦੇ ਬਾਵਜੂਦ ਉਸ ਦੀ ਮੌਤ ਨਹੀਂ ਹੋਈ। ਅਧਿਕਾਰੀਆਂ ਮੁਤਾਬਕ ਉਸ ਨੂੰ ਦੋ ਟੀਕੇ ਦਿੱਤੇ ਗਏ, ਪਰ ਉਸ ਦੀ ਧੜਕਨ ਚੱਲਦੀ ਰਹੀ ਅਤੇ ਉਹ ਨੀਂਦ ਵਿੱਚ ਖਰਾਟੇ ਲੈਂਦੀ ਰਹੀ। ਇਸ ਤੋਂ ਬਾਅਦ ਮੌਤ ਦੀ ਸਜ਼ਾ ਦੀ ਪ੍ਰਕਿਰਿਆ ਰੋਕ ਦਿੱਤੀ ਗਈ। ਪਾਈਕ ਨੂੰ 1995 ਵਿੱਚ ਆਪਣੀ 19 ਸਾਲਾ ਸਹਿਪਾਠੀ ਕੋਲੀਨ ਸਲੇਮਰ ਦੀ ਹੱਤਿਆ ਦੇ ਮਾਮਲੇ ਵਿੱਚ ਦੋਸ਼ੀ ਠਹਿਰਾਇਆ ਗਿਆ ਸੀ ਅਤੇ 1996 ਵਿੱਚ ਮੌਤ ਦੀ ਸਜ਼ਾ ਸੁਣਾਈ ਗਈ ਸੀ।
ਦੋ ਟੀਕਿਆਂ ਤੋਂ ਬਾਅਦ ਵੀ ਨਹੀਂ ਹੋਈ ਮੌਤ
ਪਾਈਕ ਨੂੰ ਬੁੱਧਵਾਰ ਸ਼ਾਮ ਕਰੀਬ 7:27 ਵਜੇ ਸਟ੍ਰੈਚਰ ਨਾਲ ਬੰਨ੍ਹ ਕੇ ਪਹਿਲਾ ਟੀਕਾ ਦਿੱਤਾ ਗਿਆ। ਇਸ ਤੋਂ ਬਾਅਦ ਰਾਤ 8:26 ਵਜੇ ਉਸ ਨੂੰ ਪੈਂਟੋਬਾਰਬਿਟਲ ਦਾ ਦੂਜਾ ਟੀਕਾ ਦਿੱਤਾ ਗਿਆ। ਵਕੀਲਾਂ ਮੁਤਾਬਕ ਇਸ ਦੇ ਬਾਵਜੂਦ ਉਸ ਦੀ ਮੌਤ ਨਹੀਂ ਹੋਈ। ਰਾਤ ਕਰੀਬ 8:53 ਵਜੇ ਪਾਈਕ ਦਾ ਮਾਈਕ੍ਰੋਫੋਨ ਬੰਦ ਕਰ ਦਿੱਤਾ ਗਿਆ ਅਤੇ ਗਵਾਹਾਂ ਨੂੰ ਬਾਹਰ ਜਾਣ ਲਈ ਕਿਹਾ ਗਿਆ। ਇਸ ਦੌਰਾਨ ਉਸ ਦੇ ਵਕੀਲਾਂ ਨੇ ਅਮਰੀਕੀ ਸੁਪਰੀਮ ਕੋਰਟ ਵਿੱਚ ਐਮਰਜੈਂਸੀ ਅਰਜ਼ੀ ਦਾਇਰ ਕਰਕੇ ਪ੍ਰਕਿਰਿਆ ਰੋਕਣ ਦੀ ਮੰਗ ਕੀਤੀ।
ਟੇਨੇਸੀ ਸਰਕਾਰ ਨੇ ਜਾਂਚ ਦੇ ਦਿੱਤੇ ਹੁਕਮ
ਟੇਨੇਸੀ ਦੇ ਗਵਰਨਰ ਨੇ ਘਟਨਾ ਦੀ ਜਾਂਚ ਦੇ ਹੁਕਮ ਦਿੱਤੇ ਹਨ। ਨਾਲ ਹੀ ਸੂਬੇ ਵਿੱਚ ਇਸ ਸਾਲ ਹੋਣ ਵਾਲੀਆਂ ਬਾਕੀ ਸਾਰੀਆਂ ਮੌਤ ਦੀਆਂ ਸਜ਼ਾਵਾਂ ’ਤੇ ਫਿਲਹਾਲ ਰੋਕ ਲਗਾ ਦਿੱਤੀ ਗਈ ਹੈ। ਟੇਨੇਸੀ ਡਿਪਾਰਟਮੈਂਟ ਆਫ਼ ਕਰੈਕਸ਼ਨ ਨੇ ਕਿਹਾ ਕਿ ਅਧਿਕਾਰੀਆਂ ਨੇ ਅਦਾਲਤ ਵੱਲੋਂ ਮਨਜ਼ੂਰ ਕੀਤੀ ਮੌਤ ਦੀ ਸਜ਼ਾ ਦੀ ਪ੍ਰਕਿਰਿਆ ਦੇ ਹਰ ਕਦਮ ਦੀ ਪਾਲਣਾ ਕੀਤੀ, ਪਰ ਪ੍ਰਕਿਰਿਆ ਸਫਲ ਨਹੀਂ ਹੋ ਸਕੀ।
1995 ਵਿੱਚ ਹੋਈ ਸੀ ਹੱਤਿਆ
ਅਦਾਲਤੀ ਰਿਕਾਰਡ ਮੁਤਾਬਕ ਜਨਵਰੀ 1995 ਵਿੱਚ ਪਾਈਕ, ਉਸ ਦੇ ਤਤਕਾਲੀ ਬੁਆਏਫ੍ਰੈਂਡ ਤਾਦਾਰਿਲ ਸ਼ਿਪ ਅਤੇ ਇੱਕ ਹੋਰ ਸਾਥੀ ਨੇ ਕੋਲੀਨ ਸਲੇਮਰ ਨੂੰ ਟੇਨੇਸੀ ਯੂਨੀਵਰਸਿਟੀ ਦੇ ਕੈਂਪਸ ਨੇੜੇ ਜੰਗਲ ਵਿੱਚ ਬੁਲਾਇਆ ਸੀ। ਉੱਥੇ ਸਲੇਮਰ ਨਾਲ ਕੁੱਟਮਾਰ ਕਰਨ ਅਤੇ ਧਾਰਦਾਰ ਚੀਜ਼ ਨਾਲ ਹਮਲਾ ਕਰਨ ਤੋਂ ਬਾਅਦ ਉਸ ਦੀ ਹੱਤਿਆ ਕਰ ਦਿੱਤੀ ਗਈ ਸੀ।
ਅਪਰਾਧ ਦੇ ਸਮੇਂ ਪਾਈਕ 18 ਸਾਲ ਦੀ ਸੀ, ਜਦਕਿ ਸ਼ਿਪ 17 ਸਾਲ ਦਾ ਸੀ। ਨਾਬਾਲਗ ਹੋਣ ਕਾਰਨ ਸ਼ਿਪ ਨੂੰ ਮੌਤ ਦੀ ਸਜ਼ਾ ਨਹੀਂ ਦਿੱਤੀ ਗਈ ਅਤੇ ਉਸ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ। ਜੇਕਰ ਬੁੱਧਵਾਰ ਨੂੰ ਮੌਤ ਦੀ ਸਜ਼ਾ ਦੀ ਪ੍ਰਕਿਰਿਆ ਪੂਰੀ ਹੋ ਜਾਂਦੀ ਤਾਂ ਪਾਈਕ 200 ਸਾਲ ਤੋਂ ਵੱਧ ਸਮੇਂ ਬਾਅਦ ਟੇਨੇਸੀ ਵਿੱਚ ਮੌਤ ਦੀ ਸਜ਼ਾ ਪਾਉਣ ਵਾਲੀ ਪਹਿਲੀ ਮਹਿਲਾ ਬਣ ਜਾਂਦੀ।
