ਅੱਜ ਤੋਂ Air India ਦੀਆਂ ਉਡਾਣਾਂ ‘ਚ ਸਫ਼ਰ ਹੋਇਆ ਮਹਿੰਗਾ
Air India flight fares hike: ਨਵੀਂ ਦਿੱਲੀ: ਹਵਾਈ ਸਫ਼ਰ ਕਰਨ ਵਾਲੇ ਯਾਤਰੀਆਂ ਨੂੰ ਹੁਣ ਟਿਕਟਾਂ ਲਈ ਵੱਧ ਪੈਸੇ ਖਰਚਣੇ ਪੈਣਗੇ। ਇੰਡੀਗੋ ਤੋਂ ਬਾਅਦ ਏਅਰ ਇੰਡੀਆ ਨੇ ਵੀ ਜੈੱਟ ਫਿਊਲ ਮਹਿੰਗਾ ਹੋਣ ਕਾਰਨ ਘਰੇਲੂ ਅਤੇ ਅੰਤਰਰਾਸ਼ਟਰੀ ਉਡਾਣਾਂ ’ਤੇ ਵਾਧੂ ਫਿਊਲ ਚਾਰਜ ਲਗਾਉਣ ਦਾ ਐਲਾਨ ਕੀਤਾ ਹੈ। ਘਰੇਲੂ ਉਡਾਣਾਂ ’ਤੇ 1,200 ਰੁਪਏ ਤੱਕ ਅਤੇ ਅੰਤਰਰਾਸ਼ਟਰੀ ਉਡਾਣਾਂ ’ਤੇ 17,800 ਰੁਪਏ ਤੱਕ ਵਾਧੂ ਚਾਰਜ ਲੱਗੇਗਾ। ਨਵੀਆਂ ਦਰਾਂ ਅੱਜ 9 ਅਕਤੂਬਰ ਦੀ ਰਾਤ 12:01 ਵਜੇ ਤੋਂ ਲਾਗੂ ਹੋ ਗਈਆਂ। ਇਹ ਵਾਧਾ ਏਅਰ ਇੰਡੀਆ ਐਕਸਪ੍ਰੈੱਸ ਦੀਆਂ ਉਡਾਣਾਂ ’ਤੇ ਵੀ ਲਾਗੂ ਹੋਵੇਗਾ। ਦੋਵੇਂ ਏਅਰਲਾਈਨਾਂ ਟਾਟਾ ਗਰੁੱਪ ਦਾ ਹਿੱਸਾ ਹਨ।
7 ਮਹੀਨਿਆਂ ਵਿੱਚ ਤੀਜੀ ਵਾਰ ਵਧਾਇਆ ਫਿਊਲ ਚਾਰਜ
ਏਅਰ ਇੰਡੀਆ ਨੇ ਇਸ ਸਾਲ ਸੱਤ ਮਹੀਨਿਆਂ ਦੌਰਾਨ ਤੀਜੀ ਵਾਰ ਫਿਊਲ ਸਰਚਾਰਜ ਵਧਾਇਆ ਹੈ। ਇਸ ਤੋਂ ਪਹਿਲਾਂ 10 ਮਾਰਚ ਅਤੇ 7 ਅਪ੍ਰੈਲ ਨੂੰ ਵੀ ਕਿਰਾਏ ਵਿੱਚ ਵਾਧਾ ਕੀਤਾ ਗਿਆ ਸੀ। ਇਸ ਤੋਂ ਦੋ ਦਿਨ ਪਹਿਲਾਂ, 6 ਅਕਤੂਬਰ ਨੂੰ ਦੇਸ਼ ਦੀ ਸਭ ਤੋਂ ਵੱਡੀ ਏਅਰਲਾਈਨ ਇੰਡੀਗੋ ਨੇ ਵੀ ਜੈੱਟ ਫਿਊਲ ਦੀਆਂ ਵਧਦੀਆਂ ਕੀਮਤਾਂ ਦੇ ਮੱਦੇਨਜ਼ਰ ਕਿਰਾਏ ਵਿੱਚ ਵਾਧਾ ਕੀਤਾ ਸੀ। ਇੰਡੀਗੋ ਨੇ ਇਸ ਸਾਲ ਮਾਰਚ ਅਤੇ ਅਪ੍ਰੈਲ ਵਿੱਚ ਵੀ ਫਿਊਲ ਚਾਰਜ ਵਧਾਏ ਸਨ।
ਅਕਤੂਬਰ ਵਿੱਚ ਜੈੱਟ ਫਿਊਲ 16 ਰੁਪਏ ਪ੍ਰਤੀ ਲੀਟਰ ਮਹਿੰਗਾ
ਜੈੱਟ ਫਿਊਲ, ਜਿਸ ਨੂੰ ਐਵੀਏਸ਼ਨ ਟਰਬਾਈਨ ਫਿਊਲ (ATF) ਕਿਹਾ ਜਾਂਦਾ ਹੈ, ਦੀ ਕੀਮਤ ਵਿੱਚ 1 ਅਕਤੂਬਰ ਤੋਂ ਵੱਡਾ ਵਾਧਾ ਹੋਇਆ ਹੈ। ਘਰੇਲੂ ਏਅਰਲਾਈਨਾਂ ਲਈ ਇਸ ਦੀ ਕੀਮਤ 121 ਰੁਪਏ ਤੋਂ ਵਧ ਕੇ 137 ਰੁਪਏ ਪ੍ਰਤੀ ਲੀਟਰ ਹੋ ਗਈ ਹੈ। ਇਸ ਤਰ੍ਹਾਂ ਇੱਕ ਮਹੀਨੇ ਵਿੱਚ ਪ੍ਰਤੀ ਲੀਟਰ ਕੀਮਤ 16 ਰੁਪਏ, ਯਾਨੀ ਲਗਭਗ 13.2 ਫ਼ੀਸਦੀ ਵਧੀ ਹੈ।
ਤਿੰਨ ਮਹੀਨਿਆਂ ਵਿੱਚ 27.28 ਰੁਪਏ ਦਾ ਵਾਧਾ
ਅਗਸਤ 2026: 5 ਰੁਪਏ ਪ੍ਰਤੀ ਲੀਟਰ ਦਾ ਵਾਧਾ
ਸਤੰਬਰ 2026: 6.28 ਰੁਪਏ ਪ੍ਰਤੀ ਲੀਟਰ ਦਾ ਵਾਧਾ
ਅਕਤੂਬਰ 2026: 16 ਰੁਪਏ ਪ੍ਰਤੀ ਲੀਟਰ ਦਾ ਵਾਧਾ
ਇਸ ਤਰ੍ਹਾਂ ਤਿੰਨ ਮਹੀਨਿਆਂ ਵਿੱਚ ਜੈੱਟ ਫਿਊਲ ਦੀ ਕੀਮਤ ਕੁੱਲ 27.28 ਰੁਪਏ ਪ੍ਰਤੀ ਲੀਟਰ ਵਧ ਗਈ ਹੈ।
ਏਅਰਲਾਈਨਾਂ ਦੇ ਖਰਚੇ ’ਤੇ ਪੈਂਦਾ ਹੈ ਸਿੱਧਾ ਅਸਰ
ਜੈੱਟ ਫਿਊਲ ਹਵਾਈ ਕੰਪਨੀਆਂ ਦੇ ਸੰਚਾਲਨ ਖਰਚਿਆਂ ਦਾ ਸਭ ਤੋਂ ਵੱਡਾ ਹਿੱਸਾ ਹੁੰਦਾ ਹੈ। ਕੁੱਲ ਖਰਚੇ ਵਿੱਚ ਇਸ ਦੀ ਹਿੱਸੇਦਾਰੀ ਲਗਭਗ 30 ਤੋਂ 40 ਫ਼ੀਸਦੀ ਤੱਕ ਹੁੰਦੀ ਹੈ। ਇਸੇ ਕਾਰਨ ਫਿਊਲ ਦੀਆਂ ਕੀਮਤਾਂ ਵਧਣ ਨਾਲ ਏਅਰਲਾਈਨਾਂ ’ਤੇ ਵਿੱਤੀ ਦਬਾਅ ਵਧਦਾ ਹੈ, ਜਿਸ ਦਾ ਅਸਰ ਯਾਤਰੀਆਂ ਦੀਆਂ ਟਿਕਟਾਂ ਦੀਆਂ ਕੀਮਤਾਂ ’ਤੇ ਵੀ ਪੈਂਦਾ ਹੈ।
