50 ਰੁਪਏ ਦੀ ਟਿਕਟ ਨੇ ਬਦਲੀ ਕਿਸਮਤ, ਜਿੱਤੀ 21 ਲੱਖ ਰੁਪਏ ਦੀ ਲਾਟਰੀ
ਪਟਿਆਲਾ: ਕਿਸਮਤ ਕਦੋਂ ਕਿਸੇ ‘ਤੇ ਮਿਹਰਬਾਨ ਹੋ ਜਾਵੇ, ਇਸ ਦਾ ਅੰਦਾਜ਼ਾ ਲਗਾਉਣਾ ਮੁਸ਼ਕਲ ਹੈ। ਅਜਿਹਾ ਹੀ ਕੁਝ ਸਮਾਣਾ ਦੇ ਰਹਿਣ ਵਾਲੇ ਰੁਦਰ ਪ੍ਰਸਾਦ ਨਾਲ ਹੋਇਆ, ਜਿਨ੍ਹਾਂ ਦੀ 21 ਲੱਖ ਰੁਪਏ ਦੀ ਲਾਟਰੀ ਨਿਕਲੀ ਹੈ। ਖ਼ਾਸ ਗੱਲ ਇਹ ਹੈ ਕਿ ਰੁਦਰ ਦਾ ਲਾਟਰੀ ਦੀ ਟਿਕਟ ਖਰੀਦਣ ਦਾ ਕੋਈ ਇਰਾਦਾ ਨਹੀਂ ਸੀ, ਪਰ ਦੋਸਤ ਦੇ ਜ਼ੋਰ ਪਾਉਣ ‘ਤੇ ਉਨ੍ਹਾਂ ਨੇ 50 ਰੁਪਏ ਦੀ ਟਿਕਟ ਖਰੀਦ ਲਈ। ਹੁਣ ਇਸੇ ਟਿਕਟ ਨੇ ਉਨ੍ਹਾਂ ਦੀ ਕਿਸਮਤ ਚਮਕਾ ਦਿੱਤੀ ਹੈ।
ਜਾਣਕਾਰੀ ਮੁਤਾਬਕ ਪਟਿਆਲਾ ਦੇ ਸ਼ੇਰਾਂ ਵਾਲੇ ਗੇਟ ਸਥਿਤ ਅਗਰਵਾਲ ਲਾਟਰੀ ਸਟਾਲ ਤੋਂ ਵਿਕੀ ਟਿਕਟ ‘ਤੇ ਰੁਦਰ ਪ੍ਰਸਾਦ ਦਾ 21 ਲੱਖ ਰੁਪਏ ਦਾ ਇਨਾਮ ਨਿਕਲਿਆ ਹੈ। ਇਸ ਸਬੰਧੀ ਰੁਦਰ ਨੇ ਦੱਸਿਆ ਕਿ ਜਿਸ ਦਿਨ ਉਨ੍ਹਾਂ ਨੇ ਲਾਟਰੀ ਦੀ ਟਿਕਟ ਖਰੀਦੀ ਸੀ, ਉਸ ਦਿਨ ਉਨ੍ਹਾਂ ਦਾ ਮਨ ਕਾਫ਼ੀ ਖ਼ਰਾਬ ਸੀ। ਉਹ ਲਾਟਰੀ ਖਰੀਦਣਾ ਨਹੀਂ ਚਾਹੁੰਦੇ ਸਨ, ਪਰ ਦੋਸਤ ਦੇ ਕਹਿਣ ‘ਤੇ ਉਨ੍ਹਾਂ ਨੇ ਟਿਕਟ ਲੈ ਲਈ।
ਰੁਦਰ ਦੇ ਦੋਸਤ ਨੇ ਦੱਸਿਆ ਕਿ ਜਦੋਂ ਉਸ ਨੂੰ ਪਤਾ ਲੱਗਿਆ ਕਿ ਰੁਦਰ ਦੀ ਲਾਟਰੀ ਨਿਕਲ ਆਈ ਹੈ ਤਾਂ ਉਸ ਦੀ ਖ਼ੁਸ਼ੀ ਦਾ ਕੋਈ ਟਿਕਾਣਾ ਨਹੀਂ ਰਿਹਾ। ਉਹ ਤੁਰੰਤ ਰੁਦਰ ਨੂੰ ਨਾਲ ਲੈ ਕੇ ਲਾਟਰੀ ਸਟਾਲ ਪਹੁੰਚਿਆ। ਉੱਥੇ ਟਿਕਟ ਚੈੱਕ ਕਰਵਾਉਣ ‘ਤੇ ਪੁਸ਼ਟੀ ਹੋਈ ਕਿ ਉਨ੍ਹਾਂ ਦਾ 21 ਲੱਖ ਰੁਪਏ ਦਾ ਇਨਾਮ ਨਿਕਲਿਆ ਹੈ।
ਦੋਸਤ ਨੇ ਇਹ ਵੀ ਦੱਸਿਆ ਕਿ ਉਸ ਨੇ ਖ਼ੁਦ ਵੀ ਲਾਟਰੀ ਦੀ ਟਿਕਟ ਖਰੀਦੀ ਸੀ ਅਤੇ ਰੁਦਰ ਦੀ ਟਿਕਟ ਦੇ 50 ਰੁਪਏ ਵੀ ਉਸ ਨੇ ਹੀ ਦਿੱਤੇ ਸਨ। ਇਸ ਤਰ੍ਹਾਂ ਦੋਸਤ ਦੇ ਜ਼ੋਰ ਪਾਉਣ ‘ਤੇ ਖਰੀਦੀ ਗਈ ਟਿਕਟ ਰੁਦਰ ਲਈ ਵੱਡੀ ਖ਼ੁਸ਼ਖ਼ਬਰੀ ਲੈ ਕੇ ਆਈ।
ਉੱਧਰ, ਇਨਾਮ ਨਿਕਲਣ ਦੀ ਖ਼ਬਰ ਮਿਲਦਿਆਂ ਹੀ ਪਟਿਆਲਾ ਦੇ ਸ਼ੇਰਾਂ ਵਾਲੇ ਗੇਟ ਸਥਿਤ ਅਗਰਵਾਲ ਲਾਟਰੀ ਸਟਾਲ ‘ਤੇ ਜਸ਼ਨ ਦਾ ਮਾਹੌਲ ਬਣ ਗਿਆ। ਸਟਾਲ ‘ਤੇ ਢੋਲ ਵਜਾ ਕੇ ਅਤੇ ਮਿਠਾਈ ਵੰਡ ਕੇ ਖ਼ੁਸ਼ੀ ਮਨਾਈ ਗਈ।
