ਪੰਜਾਬ ਕਾਂਗਰਸ ‘ਚ ਫਿਰ ਵੱਡੀ ਬਗਾਵਤ ਦੇ ਆਸਾਰ: ਸੂਬਾ ਪ੍ਰਧਾਨ ਨਾ ਬਣਾਏ ਜਾਣ ‘ਤੇ ਚਰਨਜੀਤ ਚੰਨੀ ਧੜਾ ਖ਼ਫ਼ਾ

ਸਾਲ 2027 ਦੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਧੜੇਬੰਦੀ ਨੂੰ ਠੱਲ੍ਹ ਪਾਉਣ ਅਤੇ ਖੇਤਰੀ-ਸਮਾਜਿਕ ਸਮੀਕਰਨਾਂ ਨੂੰ ਸਾਧਣ ਦੀ ਕਾਂਗਰਸ ਹਾਈਕਮਾਂਡ ਦੀ ਰਣਨੀਤੀ ਉਲਟੀ ਪੈਂਦੀ ਨਜ਼ਰ ਆ ਰਹੀ ਹੈ। ਪਾਰਟੀ ਦੇ ਅੰਦਰੂਨੀ ਫੈਸਲਿਆਂ ਨੇ ਸੁਲਘ ਰਹੀ ਬਗਾਵਤ ਨੂੰ ਮੁੜ ਹਵਾ ਦੇ ਦਿੱਤੀ ਹੈ। ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੂੰ ਪੰਜਾਬ ਕਾਂਗਰਸ (PPCC) ਦਾ ਪ੍ਰਧਾਨ ਨਾ ਬਣਾਏ ਜਾਣ ਕਾਰਨ ਉਨ੍ਹਾਂ ਦਾ ਧੜਾ ਹਾਈਕਮਾਂਡ ਤੋਂ ਬੇਹੱਦ ਨਾਰਾਜ਼ ਹੈ।

ਇਸੇ ਨਾਰਾਜ਼ਗੀ ਦੇ ਚੱਲਦਿਆਂ ਚੰਨੀ ਨੇ ਪ੍ਰਚਾਰ ਕਮੇਟੀ (Campaign Committee) ਦਾ ਚੇਅਰਮੈਨ ਨਿਯੁਕਤ ਕੀਤੇ ਜਾਣ ‘ਤੇ ਕੇਂਦਰੀ ਲੀਡਰਸ਼ਿਪ ਦਾ ਧੰਨਵਾਦ ਤੱਕ ਨਹੀਂ ਕੀਤਾ। ਅੰਦਰੂਨੀ ਸੂਤਰਾਂ ਮੁਤਾਬਕ, ਚੰਨੀ ਅਤੇ ਉਨ੍ਹਾਂ ਦੇ ਹਮਾਇਤੀਆਂ ਨੇ ਇਸ ਨਿਯੁਕਤੀ ਨੂੰ ਪੂਰੀ ਤਰ੍ਹਾਂ ਨਕਾਰ ਦਿੱਤਾ ਹੈ।

ਅੱਜ ਹੋਵੇਗਾ ਸ਼ਕਤੀ ਪ੍ਰਦਰਸ਼ਨ: ‘ਆਰ ਜਾਂ ਪਾਰ’ ਦੀ ਲੜਾਈ ਦੇ ਮੂਡ ‘ਚ ਚੰਨੀ

ਸਿਆਸੀ ਹਲਚਲ ਨੂੰ ਤੇਜ਼ ਕਰਦਿਆਂ ਚਰਨਜੀਤ ਸਿੰਘ ਚੰਨੀ ਨੇ ਅੱਜ (3 ਜੁਲਾਈ) ਆਪਣੇ ਹਮਾਇਤੀ ਸੰਸਦ ਮੈਂਬਰਾਂ, ਵਿਧਾਇਕਾਂ ਅਤੇ ਹਲਕਾ ਇੰਚਾਰਜਾਂ ਦੀ ਇੱਕ ਅਹਿਮ ਬੈਠਕ ਤਲਬ ਕੀਤੀ ਹੈ।

• ਸੰਭਾਵਿਤ ਹਾਜ਼ਰੀ: ਇਸ ਗੁਪਤ ਰਣਨੀਤਕ ਮੀਟਿੰਗ ਵਿੱਚ ਕਾਂਗਰਸ ਦੇ 2 ਤੋਂ 3 ਮੌਜੂਦਾ ਸੰਸਦ ਮੈਂਬਰ, 10 ਤੋਂ 12 ਵਿਧਾਇਕ ਅਤੇ ਲਗਭਗ 40 ਹਲਕਾ ਇੰਚਾਰਜ ਸ਼ਾਮਲ ਹੋ ਸਕਦੇ ਹਨ।
• ਫੈਸਲਾਕੁੰਨ ਕਦਮ: ਚੰਨੀ ਦੇ ਇੱਕ ਬੇਹੱਦ ਨਜ਼ਦੀਕੀ ਆਗੂ ਨੇ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਦੱਸਿਆ, “ਚੰਨੀ ਸਾਹਿਬ ਪ੍ਰਧਾਨਗੀ ਦਾ ਅਹੁਦਾ ਨਾ ਮਿਲਣ ਕਾਰਨ ਹਾਈਕਮਾਂਡ ਦੇ ਵਤੀਰੇ ਤੋਂ ਦੁਖੀ ਹਨ। ਹੁਣ ਉਹ ਆਰ-ਪਾਰ ਦੀ ਲੜਾਈ ਦੇ ਮੂਡ ਵਿੱਚ ਹਨ ਅਤੇ ਕੇਂਦਰੀ ਲੀਡਰਸ਼ਿਪ ਨੂੰ ਆਪਣੀ ਸਿਆਸੀ ਤਾਕਤ ਦਾ ਅਹਿਸਾਸ ਕਰਵਾਉਣਗੇ।”

ਚੰਨੀ ਦੇ ‘ਤਾਕਤ ਪ੍ਰਦਰਸ਼ਨ’ ਪਿੱਛੇ 2 ਮੁੱਖ ਸਿਆਸੀ ਉਦੇਸ਼

ਰਾਜਨੀਤਿਕ ਮਾਹਿਰ ਪਵਨਦੀਪ ਸ਼ਰਮਾ ਮੁਤਾਬਕ, ਪੰਜਾਬ ਕਾਂਗਰਸ ਦਾ ਇੱਕ ਪੁਰਾਣਾ ਇਤਿਹਾਸ ਰਿਹਾ ਹੈ ਕਿ ਚੋਣਾਂ ਵੇਲੇ ਜੋ ਆਗੂ ਸੂਬਾ ਪ੍ਰਧਾਨ ਹੁੰਦਾ ਹੈ, ਪਾਰਟੀ ਦੀ ਜਿੱਤ ਤੋਂ ਬਾਅਦ ਮੁੱਖ ਮੰਤਰੀ ਦੀ ਕੁਰਸੀ ‘ਤੇ ਉਸ ਦਾ ਦਾਅਵਾ ਸਭ ਤੋਂ ਮਜ਼ਬੂਤ ਹੁੰਦਾ ਹੈ। ਕੈਪਟਨ ਅਮਰਿੰਦਰ ਸਿੰਘ ਦੇ ਮਾਮਲੇ ਵਿੱਚ ਦੋਵੇਂ ਵਾਰ ਅਜਿਹਾ ਹੀ ਹੋਇਆ ਸੀ। ਇਸੇ ਰਣਨੀਤੀ ਤਹਿਤ ਚੰਨੀ ਧੜਾ ਦੋ ਮੁੱਖ ਮੰਗਾਂ ‘ਤੇ ਅੜਿਆ ਹੋਇਆ ਹੈ:

1. ਰਾਜਾ ਵੜਿੰਗ ਦੀ ਛੁੱਟੀ ਅਤੇ ‘ਕੈਪਟਨ ਫਾਰਮੂਲੇ’ ਤਹਿਤ ਪ੍ਰਧਾਨਗੀ ਦੀ ਮੰਗ

ਚੰਨੀ ਧੜਾ ਲੰਬੇ ਸਮੇਂ ਤੋਂ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਅਗਵਾਈ ਦਾ ਵਿਰੋਧ ਕਰ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਇੱਕ ‘ਅਸਫ਼ਲ ਪ੍ਰਧਾਨ’ ਵਜੋਂ ਪੇਸ਼ ਕਰਦਾ ਆਇਆ ਹੈ। ਸਾਲ 2017 ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਨੇ ਵੀ ਹਾਈਕਮਾਂਡ ‘ਤੇ ਦਬਾਅ ਬਣਾ ਕੇ ਪ੍ਰਤਾਪ ਸਿੰਘ ਬਾਜਵਾ ਨੂੰ ਹਟਵਾਇਆ ਸੀ ਅਤੇ ਖ਼ੁਦ ਪ੍ਰਧਾਨ ਬਣੇ ਸਨ, ਜਿਸ ਲਈ ਉਨ੍ਹਾਂ ਨੇ ਜਾਟ ਮਹਾਂਸਭਾ ਨੂੰ ਵੀ ਲਾਮਬੰਦ ਕੀਤਾ ਸੀ। ਚੰਨੀ ਵੀ ਉਸੇ ਨਕਸ਼ੇ-ਕਦਮਾਂ ‘ਤੇ ਚੱਲ ਰਹੇ ਹਨ। ਉਹ ਚਾਹੁੰਦੇ ਹਨ ਕਿ ਟਿਕਟਾਂ ਦੀ ਵੰਡ ਵਿੱਚ ਅੰਤਿਮ ਫੈਸਲਾ ਉਨ੍ਹਾਂ ਦਾ ਹੋਵੇ, ਤਾਂ ਜੋ ਚੋਣ ਜਿੱਤਣ ਤੋਂ ਬਾਅਦ ਵਫ਼ਾਦਾਰ ਵਿਧਾਇਕਾਂ ਦੀ ਮਦਦ ਨਾਲ ਮੁੱਖ ਮੰਤਰੀ ਬਣਨਾ ਆਸਾਨ ਹੋ ਸਕੇ।

2. ਜੇ ਪ੍ਰਧਾਨਗੀ ਨਹੀਂ, ਤਾਂ ‘ਮੁੱਖ ਮੰਤਰੀ ਦਾ ਚਿਹਰਾ’ ਐਲਾਨਿਆ ਜਾਵੇ

ਸਾਲ 2022 ਵਿੱਚ ਜਦੋਂ ਨਵਜੋਤ ਸਿੰਘ ਸਿੱਧੂ ਪ੍ਰਧਾਨ ਸਨ, ਤਾਂ ਚੰਨੀ ਨੇ ਅੰਦਰੂਨੀ ਲਾਬਿੰਗ ਕਰਕੇ ਚੋਣਾਂ ਤੋਂ ਪਹਿਲਾਂ ਖ਼ੁਦ ਨੂੰ ਮੁੱਖ ਮੰਤਰੀ ਦਾ ਚਿਹਰਾ ਐਲਾਨਣ ਲਈ ਹਾਈਕਮਾਂਡ ਨੂੰ ਮਜਬੂਰ ਕਰ ਦਿੱਤਾ ਸੀ। ਚੰਨੀ ਜਾਣਦੇ ਹਨ ਕਿ ਜੇਕਰ ਵੜਿੰਗ ਦੀ ਪ੍ਰਧਾਨਗੀ ਹੇਠ ਚੋਣਾਂ ਜਿੱਤੀਆਂ ਗਈਆਂ, ਤਾਂ ਜਿੱਤ ਦਾ ਸਿਹਰਾ ਵੜਿੰਗ ਸਿਰ ਸਜੇਗਾ। ਇਸ ਲਈ, ਮਾਹਿਰਾਂ ਮੁਤਾਬਕ ਜੇਕਰ ਕਾਂਗਰਸ ਜਾਟ ਸਿੱਖ ਵੋਟ ਬੈਂਕ ਦੇ ਡਰੋਂ ਵੜਿੰਗ ਨੂੰ ਪ੍ਰਧਾਨਗੀ ਤੋਂ ਨਹੀਂ ਹਟਾਉਂਦੀ, ਤਾਂ ਚੰਨੀ 31 ਫੀਸਦੀ ਦਲਿਤ ਵੋਟ ਬੈਂਕ ਅਤੇ ਆਪਣੇ ਸਮਰਥਕ ਆਗੂਆਂ ਦੇ ਦਬਾਅ ਸਦਕਾ ਖ਼ੁਦ ਨੂੰ ‘ਸੀਐਮ ਫੇਸ’ (CM Face) ਐਲਾਨਣ ਦੀ ਮੰਗ ‘ਤੇ ਅੜ ਸਕਦੇ ਹਨ।

ਹਾਈਕਮਾਂਡ ਨੇ ਮੰਗਾਂ ਨਕਾਰੀਆਂ ਤਾਂ ਕੀ ਹੈ ‘ਪਲਾਨ-ਬੀ’?

ਨਵੀਂ ਪਾਰਟੀ ਦਾ ਗਠਨ: ਰਾਜਨੀਤਿਕ ਵਿਸ਼ਲੇਸ਼ਕ ਪਵਨਦੀਪ ਸ਼ਰਮਾ ਦਾ ਮੰਨਣਾ ਹੈ ਕਿ ਜੇਕਰ ਕਾਂਗਰਸ ਹਾਈਕਮਾਂਡ ਨੇ ਚੰਨੀ ਦੀਆਂ ਮੰਗਾਂ ਨੂੰ ਖਾਰਜ ਕਰ ਦਿੱਤਾ, ਤਾਂ ਉਹ ਆਪਣੇ ਸਮਰਥਕਾਂ ਨਾਲ ਮਿਲ ਕੇ ਇੱਕ ਨਵੀਂ ਸਿਆਸੀ ਪਾਰਟੀ ਦਾ ਗਠਨ ਕਰ ਸਕਦੇ ਹਨ। ਜੇਕਰ ਅਜਿਹਾ ਹੁੰਦਾ ਹੈ, ਤਾਂ ਇਹ ਕਾਂਗਰਸ ਲਈ ਬਹੁਤ ਵੱਡਾ ਝਟਕਾ ਹੋਵੇਗਾ। ਚੰਨੀ ਦੇ 111 ਦਿਨਾਂ ਦੇ ਮੁੱਖ ਮੰਤਰੀ ਦੇ ਕਾਰਜਕਾਲ ਕਾਰਨ ਦਲਿਤ ਅਤੇ ਗਰੀਬ ਵਰਗ ਵਿੱਚ ਉਨ੍ਹਾਂ ਦਾ ਅਕਸ ਮਜ਼ਬੂਤ ਹੈ। ਚੰਨੀ ਦੀ ਬਗਾਵਤ ਨਾਲ ਕਾਂਗਰਸ ਦਾ ਰਵਾਇਤੀ ਵੋਟ ਬੈਂਕ ਖਿਸਕ ਸਕਦਾ ਹੈ, ਜਿਸ ਦਾ ਸਿੱਧਾ ਫਾਇਦਾ ਵਿਰੋਧੀ ਧਿਰਾਂ ਨੂੰ ਮਿਲੇਗਾ।

ਚੰਨੀ ਦੇ ਹੱਕ ‘ਚ ਨਿੱਤਰੇ ਕਾਂਗਰਸ ਦੇ ਦਿੱਗਜ: ਸੋਸ਼ਲ ਮੀਡੀਆ ‘ਤੇ ਮਚੀ ਤੜਥੱਲ਼ੀ

ਹਾਈਕਮਾਂਡ ਦੇ ਇਸ ਫ਼ੈਸਲੇ ਤੋਂ ਬਾਅਦ ਚੰਨੀ ਧੜੇ ਦੇ ਕਿਸੇ ਵੀ ਵੱਡੇ ਨੇਤਾ ਨੇ ਕੇਂਦਰੀ ਲੀਡਰਸ਼ਿਪ ਦੀ ਸਿਫ਼ਾਰਿਸ਼ ਦਾ ਸਵਾਗਤ ਨਹੀਂ ਕੀਤਾ। ਇਸ ਧੜੇ ਵਿੱਚ ਕਾਂਗਰਸ ਦੇ ਕਈ ਅਹਿਮ ਚਿਹਰੇ ਸ਼ਾਮਲ ਹਨ: