🌞ਗਲੋਬਲ ਵਾਰਮਿੰਗ 🌞

ਸਰਦੀ ਬੀਤਣ ਤੋਂ ਪਹਿਲਾਂ ਆਈ ਗਰਮੀ,
ਏ ਸੀ ਵਿਕਣਗੇ ਹੋਊ ਕਮਾਈ ਭਰਵੀਂ।
ਫਸਲ ਸਰਦੀਆਂ ਦੀ ਮੰਗਦੀ ਪਾਣੀ ਜਾਪੇ,
ਮਨੁੱਖ ਇਹਦੇ ਲਈ ਜਿੰਮੇਵਾਰ ਆਪੇ।
ਕੱਟ ਕੱਟ ਕੇ ਪਹਾੜ ਰਸਤਾ ਕੱਢਿਆ,
ਜਾਲ਼ ਸੜਕਾਂ ਦਾ ਹਰ ਥਾਂ ਵਿਛਾ ਛੱਡਿਆ।
ਕੁਦਰਤ ਰੱਖਦੀ ਸਬਰ ਬੇਇੰਤਹਾ ਜਾਪੇ,
ਮਨੁੱਖ ਇਹਦੇ ਲਈ ਜਿੰਮੇਵਾਰ ਆਪੇ।
ਘਰ ਘਰ ਹੋ ਗਈਆਂ ਮੋਟਰਾਂ, ਗੱਡੀਆਂ,
ਗੈਸਾਂ ਜ਼ਹਿਰੀਲੀਆਂ ਚੌਗਿਰਦੇ ਵਿੱਚ ਛੱਡੀਆਂ।
ਧੂੰਆਂ ਫੈਕਟਰੀਆਂ ਵਿੱਚੋਂ ਵੀ ਰਲੇ ਆ ਕੇ,
ਮਨੁੱਖ ਇਹਦੇ ਲਈ ਜਿੰਮੇਵਾਰ ਆਪੇ।
ਖੇਤ ਵੇਚ ਕੇ ਕੰਕਰੀਟ ਬੀਜ ਛੱਡੇ,
ਹਰਿਆਲੀ ਦੂਰ ਦੂਰ ਤੱਕ ਨਾ ਲੱਭੇ।
ਲੋਭ ਖਾਤਰ ਥਾਂ ਥਾਂ ਖੜੇ ਕੀਤੇ ਸਿਆਪੇ,
ਮਨੁੱਖ ਇਹਦੇ ਲਈ ਜਿੰਮੇਵਾਰ ਆਪੇ।
ਗਲੋਬਲ ਵਾਰਮਿੰਗ ਦੀ ਦੁਹਾਈ ਪਾਉ ਜਾਂਦੇ,
ਇੱਕ ਦੂਜੇ ਤੇ ਤੋਹਮਤਾਂ ਲਾਈ ਜਾਂਦੇ।
ਗੱਲਾਂ ਨਾਲ ਨਾ ਹੁੰਦਾ ਕੋਈ ਹੱਲ ਜਾਪੇ,
ਮਨੁੱਖ ਇਹਦੇ ਲਈ ਜਿੰਮੇਵਾਰ ਆਪੇ।
ਇੱਕ ਦੂਜੇ ਤੋਂ ਮੋਹਰੀ ਹੋਣ ਦੀ ਹੋੜ ਲੱਗੀ,
ਕੁਦਰਤ ਵੀ ਸੈਨਤਾਂ ਨਾਲ ਸਮਝਾਉਣ ਲੱਗੀ।
ਆਪੇ ਫਾਥੜਿਆਂ ਨੂੰ ਹੁਣ ਕੌਣ ਛੁਡਾਏ ਆ ਕੇ,
ਮਨੁੱਖ ਇਹਦੇ ਲਈ ਜਿੰਮੇਵਾਰ ਆਪੇ।
ਤਿਵਾੜੀ ਮਨਜੀਤ।

ਇਸ਼ਤਿਹਾਰ