ਅਮਰੀਕਾ ‘ਚ ਨੋ ਕਿੰਗਜ਼ ਰੈਲੀ, ਗੋਲੀਬਾਰੀ ਵਿੱਚ 1 ਦੀ ਮੌਤ: ਫੌਜੀ ਪਰੇਡ ਦੌਰਾਨ ਲੋਕ ਟਰੰਪ ਵਿਰੁੱਧ ਕਰ ਰਹੇ ਸਨ ਪ੍ਰਦਰਸ਼ਨ
No Kings Rally America; ਅਮਰੀਕਾ ਦੇ ਸਾਲਟ ਲੇਕ ਸਿਟੀ ਵਿੱਚ “ਨੋ ਕਿੰਗਜ਼” ਨਾਮਕ ਇੱਕ ਵਿਰੋਧ ਪ੍ਰਦਰਸ਼ਨ ਦੌਰਾਨ ਹਿੰਸਾ ਭੜਕ ਗਈ। ਵਿਰੋਧ ਪ੍ਰਦਰਸ਼ਨ ਵਿੱਚ ਸ਼ਾਮਲ ਇੱਕ ਵਿਅਕਤੀ ਨੇ ਪ੍ਰਦਰਸ਼ਨਕਾਰੀਆਂ ‘ਤੇ ਗੋਲੀ ਚਲਾਉਣ ਦੀ ਕੋਸ਼ਿਸ਼ ਕਰ ਰਹੇ ਇੱਕ ਵਿਅਕਤੀ ‘ਤੇ ਹਮਲਾ ਕਰ ਦਿੱਤਾ। ਇਸ ਨਾਲ ਰਾਈਫਲ ਲੈ ਕੇ ਖੜ੍ਹੇ ਵਿਅਕਤੀ ਅਤੇ ਇੱਕ ਰਾਹਗੀਰ ਦੋਵੇਂ ਜ਼ਖਮੀ ਹੋ ਗਏ। ਰਾਹਗੀਰ ਦੀ ਬਾਅਦ ਵਿੱਚ ਹਸਪਤਾਲ ਵਿੱਚ ਮੌਤ ਹੋ ਗਈ।
ਪੁਲਿਸ ਨੇ ਦੱਸਿਆ ਕਿ ਹਮਲਾ ਕਰਨ ਵਾਲੇ 24 ਸਾਲਾ ਨੌਜਵਾਨ ਦਾ ਨਾਮ ਆਰਟੂਰੋ ਗੈਂਬੋਆ ਹੈ। ਉਸਨੂੰ ਸ਼ਨੀਵਾਰ ਸ਼ਾਮ ਨੂੰ ਕਤਲ ਦੇ ਦੋਸ਼ਾਂ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਗੋਲੀ ਨਾਲ ਜ਼ਖਮੀ ਹੋਏ ਰਾਹਗੀਰ ਦੀ ਪਛਾਣ 39 ਸਾਲਾ ਆਰਥਰ ਫੋਲਾਸਾ ਆਹ ਲੂ ਵਜੋਂ ਹੋਈ ਹੈ, ਜਿਸਦੀ ਬਾਅਦ ਵਿੱਚ ਹਸਪਤਾਲ ਵਿੱਚ ਮੌਤ ਹੋ ਗਈ। ਸਾਲਟ ਲੇਕ ਸਿਟੀ ਪੁਲਿਸ ਮੁਖੀ ਬ੍ਰਾਇਨ ਰੈੱਡ ਨੇ ਐਤਵਾਰ ਨੂੰ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਇਸ ਘਟਨਾ ਬਾਰੇ ਜਾਣਕਾਰੀ ਦਿੱਤੀ।
ਦਰਅਸਲ, ਅਮਰੀਕੀ ਫੌਜ ਦੀ 250ਵੀਂ ਵਰ੍ਹੇਗੰਢ ਨੂੰ ਮਨਾਉਣ ਲਈ ਸ਼ਨੀਵਾਰ ਨੂੰ ਵਾਸ਼ਿੰਗਟਨ ਵਿੱਚ ਇੱਕ ਫੌਜੀ ਪਰੇਡ ਦਾ ਆਯੋਜਨ ਕੀਤਾ ਗਿਆ ਸੀ। ਇਸ ਦੌਰਾਨ, ਟਰੰਪ ਦੇ ਵਿਰੋਧ ਵਿੱਚ ਅਮਰੀਕਾ ਭਰ ਵਿੱਚ ਲਗਭਗ 2 ਹਜ਼ਾਰ ਥਾਵਾਂ ‘ਤੇ ਨੋ ਕਿੰਗਜ਼ (ਭਾਵ ਅਮਰੀਕਾ ਦਾ ਕੋਈ ਰਾਜਾ ਨਹੀਂ) ਵਿਰੋਧ ਪ੍ਰਦਰਸ਼ਨ ਹੋਏ।
