ਭਾਰਤ ’ਚ ਟੈਕਸ ਭਰਨ ਵਾਲਿਆਂ ਦੀ ਗਿਣਤੀ ਹੋਈ ਦੁੱਗਣੀ, ਹਰ 3 ’ਚੋਂ 1 ਦੀ ਸਾਲਾਨਾ ਆਮਦਨ 20 ਲੱਖ ਰੁਪਏ ਤੋਂ ਵੱਧ
ਨਵੀਂ ਦਿੱਲੀ: ਭਾਰਤ ਵਿੱਚ ਵੱਧ ਆਮਦਨ ਵਾਲੇ ਟੈਕਸਦਾਤਿਆਂ ਦੀ ਗਿਣਤੀ ਵਿੱਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਕਲੀਅਰਟੈਕਸ ਦੀ ਰਿਪੋਰਟ ‘How India Filed in 2026’ ਮੁਤਾਬਕ, ਮੁਲਾਂਕਣ ਸਾਲ 2026-27 ਵਿੱਚ ਲਗਭਗ ਹਰ ਤਿੰਨ ਵਿੱਚੋਂ ਇੱਕ ਟੈਕਸਦਾਤਾ ਨੇ ਆਪਣੀ ਸਾਲਾਨਾ ਕੁੱਲ ਆਮਦਨ 20 ਲੱਖ ਰੁਪਏ ਤੋਂ ਵੱਧ ਦੱਸੀ ਹੈ। ਇਸ ਦੇ ਨਾਲ ਹੀ 50 ਲੱਖ ਰੁਪਏ ਤੋਂ ਵੱਧ ਕਮਾਈ ਕਰਨ ਵਾਲਿਆਂ ਦੀ ਹਿੱਸੇਦਾਰੀ ਵੀ ਤਿੰਨ ਸਾਲਾਂ ਵਿੱਚ ਲਗਭਗ ਦੁੱਗਣੀ ਹੋ ਗਈ ਹੈ।
ਰਿਪੋਰਟ ਮੁਤਾਬਕ, ਦੇਸ਼ ਵਿੱਚ ਲੋਕਾਂ ਦੇ ਕਮਾਈ ਕਰਨ ਦੇ ਤਰੀਕਿਆਂ ਵਿੱਚ ਵੀ ਵੱਡਾ ਬਦਲਾਅ ਆ ਰਿਹਾ ਹੈ। ਹੁਣ ਲੋਕ ਸਿਰਫ਼ ਨੌਕਰੀ ਤੋਂ ਮਿਲਣ ਵਾਲੀ ਤਨਖਾਹ ’ਤੇ ਨਿਰਭਰ ਨਹੀਂ ਰਹੇ, ਸਗੋਂ ਸ਼ੇਅਰ ਬਾਜ਼ਾਰ, ਟ੍ਰੇਡਿੰਗ, ਫ੍ਰੀਲਾਂਸਿੰਗ, ਨਿਵੇਸ਼ ਅਤੇ ਆਪਣੇ ਕਾਰੋਬਾਰ ਰਾਹੀਂ ਵੀ ਆਮਦਨ ਵਧਾ ਰਹੇ ਹਨ।
ਗੈਰ-ਤਨਖਾਹੀ ਆਮਦਨ ਦੇ ਸਰੋਤਾਂ ਵਿੱਚ ਵੱਡਾ ਵਾਧਾ
ਰਿਪੋਰਟ ਅਨੁਸਾਰ, ਮੁਲਾਂਕਣ ਸਾਲ 2026-27 ਵਿੱਚ ਲਗਭਗ 47.3 ਫ਼ੀਸਦੀ ਖ਼ੁਦ ਰਿਟਰਨ ਭਰਨ ਵਾਲੇ ਟੈਕਸਦਾਤਿਆਂ ਨੇ ਨਿਵੇਸ਼, ਕਾਰੋਬਾਰ, ਫ੍ਰੀਲਾਂਸਿੰਗ ਜਾਂ ਕ੍ਰਿਪਟੋਕਰੰਸੀ ਵਰਗੇ ਗੈਰ-ਤਨਖਾਹੀ ਸਰੋਤਾਂ ਤੋਂ ਕਮਾਈ ਦੱਸੀ ਹੈ। 2022-23 ਵਿੱਚ ਇਹ ਅੰਕੜਾ ਸਿਰਫ਼ 9.5 ਫ਼ੀਸਦੀ ਸੀ। ਇਸੇ ਤਰ੍ਹਾਂ ਦੋ ਜਾਂ ਦੋ ਤੋਂ ਵੱਧ ਗੈਰ-ਤਨਖਾਹੀ ਸਰੋਤਾਂ ਤੋਂ ਕਮਾਈ ਕਰਨ ਵਾਲਿਆਂ ਦੀ ਹਿੱਸੇਦਾਰੀ ਵੀ 3.5 ਫ਼ੀਸਦੀ ਤੋਂ ਵਧ ਕੇ 24.4 ਫ਼ੀਸਦੀ ਹੋ ਗਈ ਹੈ।
50 ਲੱਖ ਤੋਂ ਵੱਧ ਕਮਾਈ ਕਰਨ ਵਾਲਿਆਂ ਦੀ ਗਿਣਤੀ ਵਧੀ
ਰਿਪੋਰਟ ਮੁਤਾਬਕ, 20 ਲੱਖ ਰੁਪਏ ਤੋਂ ਵੱਧ ਸਾਲਾਨਾ ਆਮਦਨ ਦੱਸਣ ਵਾਲੇ ਸਵੈ-ਰਿਟਰਨ ਫਾਈਲਰਾਂ ਦੀ ਹਿੱਸੇਦਾਰੀ ਮੁਲਾਂਕਣ ਸਾਲ 2023-24 ਵਿੱਚ 22.5 ਫ਼ੀਸਦੀ ਸੀ, ਜੋ 2026-27 ਵਿੱਚ ਵਧ ਕੇ 30.5 ਫ਼ੀਸਦੀ ਹੋ ਗਈ। ਉੱਥੇ ਹੀ 50 ਲੱਖ ਰੁਪਏ ਤੋਂ ਵੱਧ ਸਾਲਾਨਾ ਆਮਦਨ ਵਾਲੇ ਟੈਕਸਦਾਤਿਆਂ ਦਾ ਅਨੁਪਾਤ 2023-24 ਦੇ 4.5 ਫ਼ੀਸਦੀ ਤੋਂ ਵਧ ਕੇ 2026-27 ਵਿੱਚ 8 ਫ਼ੀਸਦੀ ਹੋ ਗਿਆ ਹੈ।
ਔਰਤਾਂ ਦੀ ਆਮਦਨ ਵਿੱਚ ਵੀ ਵਾਧਾ
ਰਿਪੋਰਟ ਵਿੱਚ ਔਰਤਾਂ ਦੀ ਆਰਥਿਕ ਭਾਗੀਦਾਰੀ ਵਿੱਚ ਵਾਧੇ ਦੇ ਸੰਕੇਤ ਵੀ ਮਿਲੇ ਹਨ। 50 ਲੱਖ ਰੁਪਏ ਤੋਂ ਵੱਧ ਕਮਾਈ ਕਰਨ ਵਾਲੀਆਂ ਮਹਿਲਾ ਟੈਕਸਦਾਤਿਆਂ ਦੀ ਹਿੱਸੇਦਾਰੀ 2025-26 ਵਿੱਚ 3.7 ਫ਼ੀਸਦੀ ਸੀ, ਜੋ 2026-27 ਵਿੱਚ ਵਧ ਕੇ 5.1 ਫ਼ੀਸਦੀ ਹੋ ਗਈ। 20 ਲੱਖ ਰੁਪਏ ਤੋਂ ਵੱਧ ਕਮਾਈ ਕਰਨ ਵਾਲੀਆਂ ਔਰਤਾਂ ਦੀ ਹਿੱਸੇਦਾਰੀ ਵਿੱਚ ਇੱਕ ਸਾਲ ਦੌਰਾਨ 23 ਫ਼ੀਸਦੀ ਵਾਧਾ ਦਰਜ ਕੀਤਾ ਗਿਆ, ਜਦਕਿ ਪੁਰਸ਼ਾਂ ਦੇ ਮਾਮਲੇ ਵਿੱਚ ਇਹ ਵਾਧਾ 12 ਫ਼ੀਸਦੀ ਰਿਹਾ। ਹਾਲਾਂਕਿ, ਇਸ ਆਮਦਨ ਵਰਗ ਵਿੱਚ ਔਰਤਾਂ ਦਾ ਅਨੁਪਾਤ 27 ਫ਼ੀਸਦੀ ਅਤੇ ਪੁਰਸ਼ਾਂ ਦਾ 42 ਫ਼ੀਸਦੀ ਹੈ।
ਮੱਧ ਵਰਗ ਵੀ ਨਿਵੇਸ਼ ਅਤੇ ਟ੍ਰੇਡਿੰਗ ਵੱਲ ਵਧਿਆ
ਇਹ ਰੁਝਾਨ ਸਿਰਫ਼ ਵੱਧ ਆਮਦਨ ਵਾਲੇ ਲੋਕਾਂ ਤੱਕ ਸੀਮਤ ਨਹੀਂ ਹੈ। 5 ਤੋਂ 10 ਲੱਖ ਰੁਪਏ ਸਾਲਾਨਾ ਆਮਦਨ ਵਾਲੇ ਟੈਕਸਦਾਤਿਆਂ ਵਿੱਚ ਵੀ ਨਿਵੇਸ਼ ਅਤੇ ਹੋਰ ਸਰੋਤਾਂ ਤੋਂ ਕਮਾਈ ਕਰਨ ਦਾ ਰੁਝਾਨ ਵਧਿਆ ਹੈ। ਇਸ ਆਮਦਨ ਵਰਗ ਦੇ 49.6 ਫ਼ੀਸਦੀ ਲੋਕਾਂ ਨੇ ਮੁਲਾਂਕਣ ਸਾਲ 2026-27 ਵਿੱਚ ਵਿਸਤ੍ਰਿਤ ਜਾਣਕਾਰੀ ਵਾਲੇ ਇਨਕਮ ਟੈਕਸ ਰਿਟਰਨ ਦਾਖ਼ਲ ਕੀਤੇ, ਜਦਕਿ ਪਿਛਲੇ ਸਾਲ ਇਹ ਅਨੁਪਾਤ 36.2 ਫ਼ੀਸਦੀ ਸੀ। ਇਸ ਵਿੱਚ ਸ਼ੇਅਰ ਬਾਜ਼ਾਰ, ਟ੍ਰੇਡਿੰਗ, ਫ੍ਰੀਲਾਂਸਿੰਗ ਅਤੇ ਛੋਟੇ ਕਾਰੋਬਾਰਾਂ ਤੋਂ ਹੋਣ ਵਾਲੀ ਕਮਾਈ ਸ਼ਾਮਲ ਹੈ।
ਰਿਪੋਰਟ ਦੇ ਅੰਕੜੇ ਦਰਸਾਉਂਦੇ ਹਨ ਕਿ ਦੇਸ਼ ਵਿੱਚ ਆਮਦਨ ਦੇ ਸਰੋਤਾਂ ਵਿੱਚ ਵਿਭਿੰਨਤਾ ਆ ਰਹੀ ਹੈ ਅਤੇ ਨਿਵੇਸ਼ ਤੇ ਕਾਰੋਬਾਰ ਹੁਣ ਮੱਧ ਵਰਗ ਦੀ ਆਰਥਿਕ ਗਤੀਵਿਧੀ ਦਾ ਵੀ ਅਹਿਮ ਹਿੱਸਾ ਬਣ ਰਹੇ ਹਨ।
