ਗੌਤਮ ਅਡਾਨੀ ਮੁੜ ਬਣੇ ਭਾਰਤ ਦੇ ਸਭ ਤੋਂ ਅਮੀਰ ਵਿਅਕਤੀ
- ਮੁਕੇਸ਼ ਅੰਬਾਨੀ ਦੂਜੇ ਸਥਾਨ ’ਤੇ
- ਫੋਰਬਸ ਦੀ 2026 ਸੂਚੀ ’ਚ ਅਡਾਨੀ ਦੀ ਦੌਲਤ 112.7 ਅਰਬ ਡਾਲਰ
Gautam Adani becomes India’s richest person: ਨਵੀਂ ਦਿੱਲੀ: ਫੋਰਬਸ ਦੀ 2026 ਦੀ ਭਾਰਤ ਦੇ 100 ਸਭ ਤੋਂ ਅਮੀਰ ਲੋਕਾਂ ਦੀ ਸੂਚੀ ਵਿੱਚ ਵੱਡਾ ਬਦਲਾਅ ਹੋਇਆ ਹੈ। ਗੌਤਮ ਅਡਾਨੀ ਮੁੜ ਭਾਰਤ ਦੇ ਸਭ ਤੋਂ ਅਮੀਰ ਵਿਅਕਤੀ ਬਣ ਗਏ ਹਨ। ਉਨ੍ਹਾਂ ਦੀ ਕੁੱਲ ਸੰਪਤੀ 112.7 ਅਰਬ ਡਾਲਰ ਹੋ ਗਈ ਹੈ, ਜਦਕਿ ਮੁਕੇਸ਼ ਅੰਬਾਨੀ 86.3 ਅਰਬ ਡਾਲਰ ਦੀ ਸੰਪਤੀ ਨਾਲ ਦੂਜੇ ਸਥਾਨ ’ਤੇ ਹਨ। ਫੋਰਬਸ ਮੁਤਾਬਕ ਅਡਾਨੀ ਦੀ ਸੰਪਤੀ ਵਿੱਚ ਇੱਕ ਸਾਲ ਦੌਰਾਨ 20.7 ਅਰਬ ਡਾਲਰ ਦਾ ਵਾਧਾ ਹੋਇਆ ਹੈ। ਉਹ ਪਿਛਲੇ ਤਿੰਨ ਸਾਲਾਂ ਤੋਂ ਸੂਚੀ ਵਿੱਚ ਦੂਜੇ ਸਥਾਨ ’ਤੇ ਸਨ। ਦੂਜੇ ਪਾਸੇ ਮੁਕੇਸ਼ ਅੰਬਾਨੀ ਦੀ ਸੰਪਤੀ ਪਿਛਲੇ ਸਾਲ ਦੇ 105 ਅਰਬ ਡਾਲਰ ਤੋਂ ਘਟ ਕੇ 86.3 ਅਰਬ ਡਾਲਰ ਰਹਿ ਗਈ ਹੈ।
ਹੁਰੁਨ ਸੂਚੀ ’ਚ ਵੀ ਅਡਾਨੀ ਪਰਿਵਾਰ ਅੱਗੇ
ਹੁਰੁਨ ਇੰਡੀਆ ਰਿਚ ਲਿਸਟ 2026 ਵਿੱਚ ਵੀ ਅਡਾਨੀ ਪਰਿਵਾਰ ਨੂੰ ਸਭ ਤੋਂ ਅਮੀਰ ਭਾਰਤੀ ਪਰਿਵਾਰ ਦੱਸਿਆ ਗਿਆ ਹੈ। ਹੁਰੁਨ ਮੁਤਾਬਕ ਅਡਾਨੀ ਪਰਿਵਾਰ ਦੀ ਸੰਪਤੀ 13 ਫ਼ੀਸਦੀ ਵਧ ਕੇ 9.23 ਲੱਖ ਕਰੋੜ ਰੁਪਏ ਹੋ ਗਈ ਹੈ। ਮੁਕੇਸ਼ ਅੰਬਾਨੀ ਅਤੇ ਪਰਿਵਾਰ ਦੀ ਸੰਪਤੀ 10 ਫ਼ੀਸਦੀ ਘਟ ਕੇ 8.63 ਲੱਖ ਕਰੋੜ ਰੁਪਏ ਰਹਿ ਗਈ ਹੈ। ਹੁਰੁਨ ਦੀ ਸੂਚੀ ਵਿੱਚ ਘੱਟੋ-ਘੱਟ 1,000 ਕਰੋੜ ਰੁਪਏ ਦੀ ਸੰਪਤੀ ਵਾਲੇ 1,810 ਲੋਕ ਸ਼ਾਮਲ ਹਨ। ਇਨ੍ਹਾਂ ਦੀ ਕੁੱਲ ਸੰਪਤੀ 187.5 ਲੱਖ ਕਰੋੜ ਰੁਪਏ ਦੱਸੀ ਗਈ ਹੈ। ਭਾਰਤ ਵਿੱਚ ਡਾਲਰ ਅਰਬਪਤੀਆਂ ਦੀ ਗਿਣਤੀ ਵੀ ਵਧ ਕੇ 391 ਹੋ ਗਈ ਹੈ।
ਫੋਰਬਸ ਅਤੇ ਹੁਰੁਨ ਦੇ ਅੰਕੜਿਆਂ ’ਚ ਫਰਕ ਕਿਉਂ ?
ਦੋਵਾਂ ਸੂਚੀਆਂ ਵਿੱਚ ਸੰਪਤੀ ਦੇ ਅੰਕੜੇ ਵੱਖਰੇ ਹਨ ਕਿਉਂਕਿ ਫੋਰਬਸ ਅਤੇ ਹੁਰੁਨ ਵੱਖ-ਵੱਖ ਤਰੀਕਿਆਂ ਅਤੇ ਵੱਖਰੀਆਂ ਤਰੀਕਾਂ ’ਤੇ ਸੰਪਤੀਆਂ ਦਾ ਮੁਲਾਂਕਣ ਕਰਦੇ ਹਨ। ਫੋਰਬਸ ਨੇ ਵਿਅਕਤੀਆਂ ਅਤੇ ਪਰਿਵਾਰਾਂ ਦੀ ਹਿੱਸੇਦਾਰੀ, ਵਿੱਤੀ ਅੰਕੜਿਆਂ ਤੋਂ ਇਲਾਵਾ ਸ਼ੇਅਰ ਬਾਜ਼ਾਰ, ਵਿਸ਼ਲੇਸ਼ਕਾਂ ਅਤੇ ਰੈਗੂਲੇਟਰਾਂ ਤੋਂ ਮਿਲੀ ਜਾਣਕਾਰੀ ਨੂੰ ਵੀ ਆਧਾਰ ਬਣਾਇਆ ਹੈ।
ਅਡਾਨੀ ਦੀ ਦੌਲਤ ਵਧਣ ਦਾ ਕਾਰਨ
ਫੋਰਬਸ ਅਨੁਸਾਰ ਅਡਾਨੀ ਦੀ ਸੰਪਤੀ ਵਿੱਚ ਵਾਧੇ ਪਿੱਛੇ ਉਨ੍ਹਾਂ ਦੇ ਇਨਫਰਾਸਟ੍ਰਕਚਰ ਕਾਰੋਬਾਰ ਦੀ ਮਹੱਤਵਪੂਰਨ ਭੂਮਿਕਾ ਹੈ। ਅਡਾਨੀ ਗਰੁੱਪ ਵੱਲੋਂ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਖੇਤਰ ਵਿੱਚ ਵੀ ਵੱਡੇ ਨਿਵੇਸ਼ ਦੀ ਯੋਜਨਾ ਦੱਸੀ ਗਈ ਹੈ। ਹਾਲਾਂਕਿ ਅਡਾਨੀ ਪਰਿਵਾਰ ਦੀ ਸੰਪਤੀ 2022 ਵਿੱਚ ਦਰਜ ਕੀਤੇ ਕਰੀਬ 150 ਅਰਬ ਡਾਲਰ ਦੇ ਸਿਖਰ ਤੋਂ ਅਜੇ ਵੀ ਘੱਟ ਹੈ।
ਅੰਬਾਨੀ ਦੀ ਸੰਪਤੀ ’ਚ ਕਮੀ
ਫੋਰਬਸ ਮੁਤਾਬਕ ਮੁਕੇਸ਼ ਅੰਬਾਨੀ ਦੀ ਸੰਪਤੀ ਵਿੱਚ ਕਮੀ ਦਾ ਸਬੰਧ ਰਿਲਾਇੰਸ ਦੇ ਕਾਰੋਬਾਰ ’ਤੇ ਮੁਨਾਫ਼ੇ ਦੇ ਦਬਾਅ ਨਾਲ ਹੈ। ਖਾਸ ਤੌਰ ’ਤੇ ਰਿਟੇਲ ਕਾਰੋਬਾਰ ਦੇ ਮਾਰਜਿਨ ਵਿੱਚ ਕਮੀ ਦਾ ਅਸਰ ਕੰਪਨੀ ਦੇ ਸ਼ੇਅਰ ਮੁੱਲ ’ਤੇ ਪਿਆ। ਇਸ ਦੇ ਨਾਲ ਹੀ ਰਿਲਾਇੰਸ ਦੀ ਡਿਜੀਟਲ ਇਕਾਈ ਜਿਓ ਪਲੇਟਫਾਰਮਜ਼ ਦੇ ਸੰਭਾਵਿਤ IPO ’ਤੇ ਵੀ ਨਜ਼ਰ ਹੈ। ਜੇਕਰ ਇਹ IPO ਲਗਭਗ 3.8 ਅਰਬ ਡਾਲਰ ਦਾ ਹੁੰਦਾ ਹੈ ਤਾਂ ਇਹ ਭਾਰਤ ਦੇ ਵੱਡੇ IPO ਵਿੱਚ ਸ਼ਾਮਲ ਹੋ ਸਕਦਾ ਹੈ।
ਸੂਚੀ ’ਚ ਨਵੇਂ ਅਰਬਪਤੀ ਵੀ ਸ਼ਾਮਲ
ਇਸ ਸਾਲ ਸੂਚੀ ਵਿੱਚ ਕੁਝ ਨਵੇਂ ਨਾਮ ਵੀ ਸ਼ਾਮਲ ਹੋਏ ਹਨ। ਇਨ੍ਹਾਂ ਵਿੱਚ ਕ੍ਰਿਸ਼ਨਾ ਚਿਵੁਕੁਲਾ, ਕੁਸ਼ਲ ਅਤੇ ਚੈਤਨਿਆ ਦੇਸਾਈ, ਆਦਿਤਿਆ ਖੇਮਕਾ ਅਤੇ ਬਾਲਾਜੀ ਵੇਫਰਜ਼ ਦੇ ਸੰਸਥਾਪਕ ਪਰਿਵਾਰ ਦੇ ਮੈਂਬਰ ਸ਼ਾਮਲ ਹਨ।
ਦੂਜੇ ਪਾਸੇ ਐੱਚਸੀਐੱਲ ਟੈਕਨਾਲੋਜੀਜ਼ ਦੇ ਚੇਅਰਮੈਨ ਐਮੇਰਿਟਸ ਸ਼ਿਵ ਨਾਡਰ, ਵਿਪਰੋ ਦੇ ਸੰਸਥਾਪਕ ਅਜ਼ੀਮ ਪ੍ਰੇਮਜੀ ਅਤੇ ਇਨਫੋਸਿਸ ਦੇ ਸਹਿ-ਸੰਸਥਾਪਕ ਐੱਨ.ਆਰ. ਨਾਰਾਇਣ ਮੂਰਤੀ ਦੀ ਸੰਪਤੀ ਵਿੱਚ ਇਸ ਸਾਲ ਕਮੀ ਦਰਜ ਕੀਤੀ ਗਈ ਹੈ।
ਸੂਚੀ ਵਿੱਚ ਸਾਵਿਤਰੀ ਜਿੰਦਲ 39.8 ਅਰਬ ਡਾਲਰ ਦੀ ਸੰਪਤੀ ਨਾਲ ਤੀਜੇ ਸਥਾਨ ’ਤੇ ਹਨ, ਜਦਕਿ ਸਟੀਲ ਕਾਰੋਬਾਰੀ ਲਕਸ਼ਮੀ ਮਿੱਤਲ 34.7 ਅਰਬ ਡਾਲਰ ਦੀ ਸੰਪਤੀ ਨਾਲ ਚੌਥੇ ਸਥਾਨ ’ਤੇ ਹਨ।
